Բացվել է «Ընթերցող Երևան» խորագրով գրքերի բացօթյա տոնավաճառը

«Ընթերցող Երևան» տոնավաճառում այցելուներին ներկայացվել են բազմազան ու բազմալեզու գրականություն:

Երկրորդ տարին անընդմեջ «Երևանյան ամառ» ծրագրի միջոցառումներից է «Ընթերցող Երևան» խորագրով գրքերի բացօթյա տոնավաճառը։  «Ընթերցող Երևան» գրքերի բացօթյա տոնավաճառին մասնակցում են մայրաքաղաքում գործող գրախանութները, հրատարակչությունները, գրադարանները, Երևանի գրողների միությունը, ինչպես նաև բազմաթիվ ասմունքողներ, գրքասերներ, գրենական պիտույքների վաճառքով զբաղվող կազմակերպություններ։ Գրքերի երկօրյա տոնավաճառ-ցուցահանդեսի բացման արարողությանը մասնակցել է Երևանի քաղաքապետի տեղակալ Արամ Սուքիասյանը։ Քաղաքապետի տեղակալը շրջել է տոնավաճառում, ծանոթացել տաղավարների առաջարկներին։

«Ամռանը Երևանում բազմաթիվ են միջոցառումները. «Երևանյան ամառ 2015»-ում ընդգրկված են ամենատարբեր հետաքրքրություններն ունեցող երեխաներին ու մեծահասակներին հետաքրքրող միջոցառումներ։ «Երևանյան ամառ»-ն արդեն երրորդ տարին է` իրականացնում ենք, և ծրագրի ամենամեծ արձագանք ունեցած միջոցառումները դառնում են ավանդական։ «Ընթերցող Երևան» խորագրով գրքերի բացօթյա տոնավաճառը դրանցից մեկն է։ Շատ հաճախ խոսվում է, որ ընթերցասիրությունը նահանջում է, բայց պետք է փաստենք, որ վերջին շրջանում գիրքը վերադառնում է իր բարձրադիր տեղը և դրանում մեծ է նաև հրատարակիչների ու գրախանութների դերը։ Այսօր ուշադրության կենտրոնում են նաև գրադարանները։ Վերջին երեք տարիներին Երևանի քաղաքապետարանը մեծածավալ ծրագրեր է իրականացնում մայրաքաղաքի գրադարաններում՝ վերանորոգման, հիմնանորոգման, ինչպես նաև գրաֆոնդերի համալրման ուղղությամբ»,- նշել է քաղաքապետի տեղակալը։

«Ընթերցող Երևան» տոնավաճառում հրատարակչություններն ու գրախանութները գրքասեր, ընթերցասեր այցելուներին ներկայացրել են բազմազան ու բազմալեզու գրականություն, այդ թվում և նորատիպ գրքեր, մանկական գրականություն։ Իսկ գրադարանների համար տոնավաճառը ոչ միայն ընթերցասերներին իրենց գրաֆոնդը ծանուցելու միջոց է, այլև հրատարակչությունների ու գրախանութների առաջարկած նորույթներին ծանոթանալու և գործընկրային կապեր ձեռքբերելու լրացուցիչ հնարավորություն։
Գրքի տոնավաճառի օրերին նախատեսված են նաև գրքերի շնորհանդեսներ՝ հեղինակների մասնակցությամբ, ինչպես նաև գրական հանդիպումներ գրողների հետ։

Երևանի քաղաքապետարանի տեղեկատվության և հասարակայնության հետ կապերի վարչության հաղորդագրության համաձայն՝ Երևանի Միսակ Մանուշյանի անվան պուրակում ընթացող «Ընթերցող Երևան» խորագրով գրքերի բացօթյա տոնավաճառը երկօրյա է և կգործի նաև հուլիսի 11-ին։

 

Գրել կարծիք