Tax Stamp. Բջջային նոր հավելված կամ ամեն ինչ ապրանքի մասին

Հեռախոսներում ներբեռնելով` սպառողը անմիջապես խանութում կտեղեկանա արտադրողի, պիտանելիության ժամկետի մասին:

2013-2014 թվականներից Հայաստանում արտադրված կամ ներմուծված ջրեղենը, գարեջուրը, հյութերը, դեղորայքը, կաթնամթերքը, պահածոները, լվացող պարագաները և այլ ապրանքներ ենթակա են պարտադիր պիտակավորման: Բոլոր այն ոլորտներում, որտեղ ներդրվել էր պարտադիր պիտակավորման պահանջը, արձանագրվել է շրջանառությունների և հարկային մուտքերի շուրջ 20-ից 86% աճ:

Ֆինանսների նախարարության հաղորդագրության համաձայն, այնուամենայնիվ դեռ առկա են առանձին խնդիրներ, որոնք առնչվում են հարկ վճարողների կողմից ըստ ապրանքի տեսակի և տարողության էլեկտրոնային հաշվառմանը և պիտակավորման գործընթացում տարատեսակավորմանը:

Ըստ ֆինանսների նախարարի տեղակալ Արմեն Ալավերդյանի, ներկայում հարկային մարմինն իրականացնում է հսկողական միջոցառումներ, որոնց արդյունքների մասին պարբերաբար կտեղեկացվի հանրությանը:

Չբավարարվելով միայն հսկողական միջոցառումներով` ՖՆ մասնագետները մշակել են Tax Stamp ծրագիրը, որը բջջային հեռախոսներում ներբեռնելով` սպառողը հնարավորություն կստանա անմիջապես խանութում տեղեկանալ արտադրողի, պիտանելիության ժամկետի, տարողունակության և այլնի մասին:

ՖՆ ՏՏԵՆԶ վարչության պետ Փաշայանի կարծիքով` ծրագիրը եռակողմ շահավետ համակարգ է, որի շնորհիվ բիզնեսը կարողանում է պաշտպանել արտադրանքը կեղծումից, սպառողին հնարավորություն է ընձեռվում պաշտպանել իրավունքները, պետությունն էլ իր հերթին կարողանում է վերահսկել ապրանքների հաշվառումը և հարկերի վճարումը:  Ի դեպ, ծրագիրը կարելի է ներբեռնել հետևյալ հասցեից:

Գրել կարծիք