«Գրքարվեստ» միջազգային մրցույթում հաղթած հայկական գրքերի հրատարակիչներին հանձնվեցին մրցանակներ. գլխավոր պարգևը տրվել է «Դադիվանք» պատկերագրքի համար

October 17, 2022 Armenpress

ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: «Գրքարվեստ» 19-րդ միջազգային մրցույթին, որն անցկացվել է 2022 թվականի հունիսի 23-24-ը Ղրղզստանի Հանրապետության մայրաքաղաք Բիշքեկում, Հայաստանն ինը գիրք է ներկայացրել:  Գրքերից ութն արժանացել են մրցանակային պատվավոր տեղերի։

«Արմենպրես»-ի հաղորդմամբ՝ մրցանակների հանձնման հանդիսավոր արարողությունը տեղի ունեցավ հոկտեմբերի 14-ին ՀՀ կրթության, գիտության, մշակույթի և սպորտի նախարարությունում:

«Իմ երկիրը» անվանակարգում «Երկրորդ մրցանակ»-ի է արժանացել Պողոս Պողոսյանի «Լեռան հառաչանքը և լճի մրմունջները» հայերեն և անգլերեն հրատարակությունը (Երևան, «Տիգրան Մեծ», 2021 թ.):

«Մշակութային երկխոսություն» անվանակարգում «Երկրորդ մրցանակ»-ի է արժանացել Սերգեյ Գալստյանի «Փելեշյան։ Մեր ժամանակների լեգենդը» հայերեն և ռուսերեն հրատարակությունը (Երևան, «Էդիթ Պրինտ», 2021 թ.):

«Մանկապատանեկան գիրք» անվանակարգում «Առաջին մրցանակ» է ստացել Երազիկ Գրիգորյանի «Կախարդին գումարած ագռավ» գիրքը (Երևան, «Զանգակ», 2021 թ.):

«Գիտություն և կրթություն» անվանակարգում «Առաջին մրցանակ»-ի է արժանացել Արտակ Մովսիսյանի «Հայաստանի նախամաշտոցյան գրավոր մշակույթի պատմություն» մենագրությունը (Երևան, «Զանգակ», 2021 թ.):

«Արվեստի գիրք» անվանակարգում «Երկրորդ մրցանակ»-ի է արժանացել Եղիշե Չարենցի «Դանթեական առասպել» հայերեն և իտալերեն հրատարակությունը (Երևան, «Ակտուալ արվեստ», 2022 թ.):

«Նկարազարդումների արվեստ» անվանակարգում «Երկրորդ մրցանակ»-ը շնորհվել է «Հին հայկական լեգենդներ և ավանդույթներ» հրատարակությանը (Երևան, «301 պրոյեկտ», 2022 թ.):

«Փոխադարձ բարեկամություն» անվանակարգում «Առաջին մրցանակ»-ի են արժանացել «Հայաստան-Ռուսաստան բարեկամություն, համագործակցություն և փոխադարձ օգնություն», «Հայ-ռուսական ռազմավարական դաշինքի արդի վիճակն ու տեսանելի հեռանկարները», «ԵԱՏՄ-ին Հայաստանի անդամակցության յոթ տարին. եվրասիական ինտեգրման հաջողությունները, դասերն ու հեռանկարները» հայերեն և ռուսերեն հրատարակությունները (Երևան, «Նահապետ», 2022 թ.):

«Հատուկ մրցանակ» է ստացել Կարեն Բալյանի «Ֆենիքս Դարբինյան. քաղաքին ուրախություն պարգևած ճարտարապետը» հրատարակությունը (Երևան, «Նյումեգ», 2020 թ.):

Գլխավոր մրցանակը «Դադիվանք» պատկերագրքի համար տրվել է «Տիգրան Մեծ» հրատարակչությանը:

ՀՀ ԿԳՄՍ նախարարի տեղակալ Արա Խզմալյանը շնորհակալություն հայտնեց մրցանակակիրներին նրանց կատարած աշխատանքի համար՝ ընդգծելով, որ այն շատ բարձր են գնահատում: Ըստ Խզմալյանի՝ հաջողության բացատրությունն այն է, որ գրահրատարակչության ավանդույթները Հայաստանում խորը արմատներ ունեն:

«Ակնհայտ է, որ վերջին ժամանակաշրջանում գրահրատարակչության ոլորտում  նկատելի աշխուժություն և առաջընթաց կա: Ոլորտի մասնագետները, պատասխանատուները, չնայած բնագավառի դժվարություններին, որոնք օրենսդրական են, նյութատեխնիկական և այլ, կարողանում են առաջ մղել այն: Այն, ինչ այսօր տեղի է ունենում, դրա վառ վկայություններից է»,-նշեց փոխնախարարը:

Խզմալյանը հիշեցրեց, որ վերջերս ոլորտային մի քանի հետաքրքիր միջոցառումներ են անցկացվել երկրում: Հայաստանի ազգային գրադարանը նախաձեռնել է միջազգային մեծ համաժողով, որի շրջանակում գրքին, գրահրատարակչությանը, գրքի պահպանմանն ու տարածմանը վերաբերող լայն օրակարգ է ձևավորվել, հետաքրքիր ու հագեցած քննարկումներ են ծավալվել: Նա կարևորեց Գրքի երևանյան փառատոնի անցկացումը, որը տարեցտարի ընդլայնում է իր շրջանակները, իսկ 2022-ին միջազգային է եղել:

Փոխնախարարի հավաստիացմամբ՝ Գրքի երևանյան փառատոնը դառնում է  գրահրատարակչական արդյունքը ներկայացնելու լավագույն հարթակը:  Առաջիկայում հայ մասնագետները մեկնելու են Ֆրանկֆուրտի գրքի փառատոնին:

«Գրքարվեստ» 19-րդ միջազգային մրցույթին ներկայացվել է յոթանասունյոթ հրատարակություն ԱՊՀ ութ երկրից (Հայաստան, Ռուսաստան, Բելառուս, Ղազախստան, Ղրղզստան, Տաջիկստան, Ուզբեկստան և Ադրբեջան):

Մրցույթին Հայաստանի մասնակցության աշխատանքները համակարգել է ՀՀ կրթության, գիտության, մշակույթի և սպորտի նախարարությունը: Հայաստանի ազգային գրադարանի կողմից ստեղծված համապատասխան հանձնաժողովը նախապես ընտրել է մրցույթին ներկայացվող գրքերը: Միջազգային մրցույթի ժյուրիի հայաստանյան ներկայացուցիչը Հայաստանի ազգային գրադարանի տնօրեն Աննա Չուլյանն է եղել: