Սարգիս Ստեփանյան
Հաղթում ես դիմացինիդ, հաղթում ես հակառակորդիդ, երբ ինքդ քեզ ես հաղթում։
Հեղինակի մասին
Սարգիս Ստեփանյանը (ծնվ.1983 թ.) հայկական բանակի լավագույն հատուկջոկատայիններից է։ 2014-ին ականի պայթյունի պատճառով հետախույզը զրկվեց երկու ոտքից և աջ թևից։Բայց որոշեց ոտքի կանգնել ու մարզվել։ Այժմ աշխարհի ու Եվրոպայի բազկամարտի բազմակի չեմպիոն է։ Սարգիս Ստեփանյանը հաշմանդամություն ունեցողների համար հիմնել է մարզասրահ, վերականգնողական կենտրոն և իր համախոհների հետ պատրաստում է հաշմանդամային սպորտի ապագա չեմպիոնների։ Դավիթ Դավթյանը (ծնվ.1992 թ.) ռազմական լրագրող է, վավերագրել է 2020-ի Արցախյան պատերազմը։ 2015-ից «Զինուժ» հեռուստածրագրի մեկնաբանն է։ Մանկավարժական համալսարանի շրջանավարտ Դավիթ Դավթյանն աշխատել է «Արմնյուզ» (2011-2015) և «Արմենիա» (2015-2018) հեռուստաալիքների լրատվական ծրագրերում։ Սա նրա հեղինակած առաջին գիրքն է։
Եթե դու քեզ չընկալես որպես հաշմված մարդու, եթե փորձես քեզ լիարժեք դրսևորել, կպարզես, որ մյուսներից ոչնչով պակաս չես։ Կարևորը հաղթանակն է, ներքին հաղթանակը, ոգու հաղթանակը։ Պիտի կռիվ տաս ճակատագրիդ դեմ ու պիտի հաղթես, այլապես ժամանակը քեզ չի ների:
Սարգիս Ստեփանյան
«Բազկամարդը» պարզապես կենսագրական չէ, այլ ճանաչողական և ուսուցողական ձեռնարկ, հոգեբանական խորհրդատվություն, թե ինչպես է հնարավոր դուրս գալ ամենամեծ ողբերգությունից և փոխել իրականությունը։ 2014-ին ծանր վիրավորվելու պատճառով երկու ոտքն ու աջ ձեռքը կորցնելուց 3 ամիս անց Սարգիս Ստեփանյանը սկսում է քայլել, 3 տարի անց դառնում աշխարհի չեմպիոն։ Իր օրինակով ապացուցում է, որ անելանելի վիճակներ չկան, եթե ունես կամքի ուժ և կյանքի ծարավ։ Գիրքը հաշմանդամություն ունեցողներին կօգնի արագ գտնել ոտքի կանգնելու մոտիվացիա և նոր հորիզոններ կբացի նրանց համար։ Գրքի հերոսն այսօր առաջնորդում է մի ամբողջ խմբի, ինչպես նախկինում, վիրավորումից առաջ։ Շատերն են նրա շնորհիվ վերագտել իրենց, կրկին հուսավառվել, պայքարել ու դարձել պրոֆեսիոնալ, ռեկորդակիր մարզիկներ։
Ես խմբագրել եմ ճակատագիրս։ Եթե ցանկանում ես հասնել մոլորակի ամենախուլ անկյունը, կհասնես, եթե նույնիսկ փող ու հնար չունես, բայց ունես նպատակ։ Այդպես էլ մեր կյանքն է. եթե ոտքեր չունես, բայց ուզում ես քայլել, իմացիր՝ կքայլես: Ոտքդ կորցրիր, ձեռքդ կորցրիր՝ կապրես։ Բայց եթե ոգիդ կորցնես, կյանքդ կզրկվի իմաստից: