Հրատարակչատուն

Newmag ամսագրի առաջին համարը թողարկվել է 2007 թվականի սեպտեմբերին։ Անվանումը ձևավորվել է անգլերեն new (նոր) և magazine (հանդես) բառերի միախառնումով։ Սկզբում խմբագրությունը եղել է որպես «Ուլիս մեդիա» խմբի մաս, որի կազմում էին «Նոր ալիք» հեռուստաընկերությունը, «Նոր ռադիո» ռադիոկայանը և «Նոր հանդես» ամսագիրը։ Անվանումը նախապես ընտրվել է անգլերեն, ապա կրճատվել ու դարձել է Newmag։

Ամսագիրը 2011-ին ձեռք է բերել լրագրող և մեդիամենեջեր Արտակ Ալեքսանյանը։ Նա հիմնել է «Նյու Մեգ» ՍՊԸ-ն։ Ընկերությունը պաշտոնապես գրանցվել է 2011 թվականի սեպտեմբերի 26-ին, որն էլ համարվում է Newmag-ի հիմնադրման օրը։

2011-2017 թվականներին ամսագիրը հրատարակվել է ամեն ամիս։ Թողարկված ավելի քան 90 համարները դարձել են այդ ժամանակաշրջանի հայելին։ 2012-ին գործարկվել է newmag.am կայքը՝ գիտության ու մշակույթի թարմ շունչը հասցնելով համացանց։ Տպագիր ամսագրի վերջին համարը լույս է տեսել 2017-ի դեկտեմբերին։

2018-ի սկզբին ընկերությունը նոր ուղի ընտրեց՝ անցնելով գրահրատարակչության։ Հունիսի 30-ին հանրությանը ներկայացվեց առաջին գիրքը․ հայերեն թարգմանվեց և հրատարակվեց Մարկ Մենսոնի համաշխարհային բեսթսելլեր «Թքած ունենալու նուրբ արվեստը» աշխատությունը։

Հրատարակչությունը նախ կենտրոնացավ համաշխարհային գիտահանրամատչելի գրականության թարգմանությունների վրա, այնուհետև ընդգրկեց հայ հեղինակների ստեղծագործությունները։ Հետագայում հրատարակչական ծրագրում ավելացան հայկական և համաշխարհային գեղարվեստական գրքերը, 2023-ից գործում է մանկական մատենաշարը։

Newmag հրատարակչատունն աջակցում է Հայաստանի համայնքային գրադարաններին, կազմակերպում սեփական գրական փառատոները և մասնակցում միջազգային գրական միջոցառումների։

Newmag-ն այսօր Հայաստանի հրատարակչությունների մեջ առանձնանում է ուրույն ոճով ու դիմագծով, արդիական, բարձրակարգ գրականություն է մատուցում իր ընթերցողներին՝ առանց տարիքային կամ այլ սահմանափակումների։