Ռոնալդուի մասին հայերեն գիրքը գրախանութներ կբերի տղամարդկանց
«Ինձ դուր է գալիս Քրիշտիանու Ռոնալդու լինելը: Սիրում եմ կյանքը, ես երջանիկ եմ»՝ այսպես է սկսվում Պորտուգալիայի հավաքականի ու Թուրինի «Յուվենթուսի» հարձակվող Ռոնալդուի մասին պատմող գիրքը, որի հայերեն հրատարակությունն իրականացրել է Newmag ընկերությունը: Լուկա Կայոլիի «Ռոնալդու. կատարելության տենչով» գրքի հայերեն տարբերակի շնորհանդեսը մարդաշատ էր: Պորտուգալացու տաղանդն ու ճանաչումը Երեւանում հավաքել էին ոչ միայն ֆուտբոլասերներին:
Նրանց հետաքրքրում են աշխարհի ամենահայտնի ֆուտբոլիստներից մեկի կյանքի թաքնված ու դեռ անհայտ փաստերը: Իսկ գիրքը դրանից շատերն է ներկայացնում՝ Ռոնալդուի պատանեկությունից մինչեւ երեխաների ծնունդն ու սիրավեպերը, մարզիչների ու թիմակիցների հետ փոխհարաբերություններն ու Արքայական ակումբը լքելը: Գիրքն անգլերենից թարգմանել է Լիանա Զաքարյանը, թարգմանության խմբագիրն էլ Վասակ Դարբինյանն է: «Գիրքը մատուցվել է մատչելի, գրավիչ ու գրագետ: Շատ բծախնդիր ենք աշխատել»,- խոստովանել է Դարբինյանը:
«Ռոնալդու. կատարելության տենչով» գրքի հրատարակչական ծրագրի ղեկավար Արտակ Ալեքսանյան էլ նշել է՝ իրենց առաջնային նպատակն է եղել գրախանութներ բերել տղամարդկանց.«Հայաստանում հիմնականում կանայք են գրքեր գնում: Մեզ մոտ տղամարդիկ ոչ միայն շիկահերների կամ սեւահերների, «Mercedes» ու «BMW» սիրողների են բաժանվում են, այլ նաեւ Ռոնալդուին ու Մեսսիին նախընտրողների»,- ասել է նա: Հաջորդը հայերեն է թարգմանվելու հենց Լիոնել Մեսսիի մասին գիրքը: