Ավելի քան 25 տարի առաջ Տիգրան Հայրապետյանը կանխատեսել էր 44-օրյա պատերազմից մինչև ներքին խժդժություններ

Չենք ուզում, որ հայրենիքի անբաժանելի մասնիկի ու նրա բնակչության հանձնումը թշնամի-հարևանի (ով ինչպես կուզի) ողորմածությանը հիմնավորվի մի խումբ արկածախնդիրների տհասության հետևանքով առաջացած աղետով, ինչպես որ չենք ուզում, որ ժողովուրդը զոհ դառնա պարբերական, բախտի քմահաճույքին հանձնված, ուստի անհեռանկարային պատերազմին:  

Որովհետև անընդունելի ենք համարում զգացմունքայնության և անձեռնահասության վրա հիմնված ցանկացած եզրահանգում, իսկ առարկայական իրողությունների վրա հիմնված դատողություններ անելու, առավել ևս որոշումներ կայացնելու համար անհրաժեշտ նվազագույն աշխատանքը, ձեռնհաս կառույցները ոչ ոք չի կատարել և չի կատարոււմ, չի ունեցել և չունի՝ սկսած վարչակարգից մինչև հեղինակավոր կուսակցությունները: 

...Միաբանության հարցում չի կարելի իդեալիստ լինել: Մեր պատմության ճակատագրական պահերին սեփական փոքրոգի անհամաձայնության զոհ գնալու ավանդույթը նույնքան կայուն է, որքան դառը պարտությունների կրելու ավանդությունը: Այս երկուսը համարժեք են միմյանց, իսկ ավելի ճիշտ՝ փոխադարձաբար պայմանավորված են մեկը մյուսով:  

Անհոգ լավատեսությամբ համակվելու հիմքեր չկան, ինչպես որ հիմքեր չկան կարծելու, թե մեր պատմության այս փուլում ժողովուրդը ներկայացնող քաղաքական ուժերն ու նրանց առաջնորդները կխախտեն այս կործանարար ավանդականությունը: Կա միայն անհրաժեշտության գիտակցություն, որի իրականացումը մեծ և խիստ ծանր աշխատանք է պահանջում: 

Սա է ճանապարհը դեպի քաղաքակրթություն, զարգացող, բարգավաճող և ուժեղ հասարակություն, որն ընդունակ կլինի լուծելու իր հիմնահարցերը՝ ներառյալ արնածոր ազգային խնդիրը: Իսկ հարցադրումը կատարում ենք այն պարզ պատճառով, որ նման ընտրության համար պետք է ժողովրդի բոլոր խավերի աջակցությունը, քանզի միայն այդ դեպքում ինտելեկտուալ միջավայրը կազմելու կոչված անհրաժեշտ կառույցները կարող են ստեղծվել, հագեցվել մասնագետներով և նյութատեխնիկական միջոցներով, իսկ անհրաժեշտության դեպքում նաև օգտագործել ժողովրդի քվեն՝ քաղաքական բախտախնդրությունը կանխելու համար:  

Կարդացեք նաև

• «Փրկե՞նք հայրենիքը». Newmag-ը ներկայացնում է Տիգրան Հայրապետյանի 3-րդ գիրքը (թրեյլեր)
• Տեղի ունեցավ Տիգրան Հայրապետյանի «Փրկե՞նք հայրենիքը» գրքի հեռուստաշնորհանդեսը (լուսանկարներ, տեսանյութ)
• Շնորհանդես-քննարկում ԵՊՀ Արևելագիտության ֆակուլտետում՝ նվիրված Տիգրան Հայրապետյանին (տեսանյութ, լուսանկարներ)
• «Փրկե՞նք հայրենիքը». Հատվածներ Տիգրան Հայրապետյանի գրքից

Ինքնուրույն, զարգացած և բարձրորակ ազգային միտքը ցանկացած ժողովրդի ազգային անվտանգության միակ կայուն և իրական երաշխիքն է: Այլ ճանապարհի ընտրությունը տանում է հայրենիքը դեպի հարատև խավար, որի մեջ կկորսվեն ազատության, պետականության և ազգային երազները: