Հեղինակ

Հենրիխ Մխիթարյան

Հենրիխ Մխիթարյանը (ծնվ. 1989 թ․) Հայաստանի ֆուտբոլի ազգային հավաքականի բոլոր ժամանակների լավագույն ռմբարկուն է, նախկին ավագը։ Ազգային ընտրանու կազմում Մխիթարյանն անցկացրել է 95 հանդիպում և խփել 32 գոլ։ Կարիերայի ընթացքում նվաճել է 26 տիտղոս։ Կարիերան սկսել է Երևանի «Փյունիկում», խաղացել է ուկրաինական «Մետալուրգ» և «Շախտյոր» ակումբներում։ Միրչա Լուչեսկուի գլխավորությամբ «Շախտյորի» կազմում 2012-2013 մրցաշրջանն ավարտել է ռեկորդային 29 գոլով։ Հանդես է եկել Դորտմունդի «Բորուսիայում», որտեղ նրան մարզել են Յուրգեն Կլոպը, ապա Թոմաս Տուխելը։ Հենրիխը նրանց օգնությամբ հարստացրել ու զարգացրել է ֆուտբոլիստի իր որակները։ Այնուհետև տեղափոխվել է անգլիական Պրեմիեր լիգա, խաղացել «Մանչեսթեր Յունայթեդ» և «Արսենալ» ակումբներում։ Մանչեսթերյան թիմի կազմում հաղթել է Եվրոպա լիգայում՝ եզրափակիչում խփելով վճռորոշ գոլ։ Հենրիխը կարիերան շարունակել է իտալական Ա Սերիայում։ «Ռոմայում» անցկացրել է 3 մրցաշրջան (116 խաղ, 29 գոլ) ու հռոմցիների հետ նվաճել Կոնֆերենցիաների լիգայի գավաթը։ 2022-ից կրում է Միլանի «Ինտերի» մարզաշապիկը։ Դարձել է Իտալիայի չեմպիոն, նվաճել Իտալիայի Սուպերգավաթը, Իտալիայի գավաթը և մասնակցել Չեմպիոնների լիգայի երկու եզրափակիչի։ Ի՞նչ գիտենք Հենրիխի մասին մարզադաշտից դուրս։ Հայ ֆուտբոլիստը խոսում է հինգ լեզվով, ունի երկու դիպլոմ․ մեկը՝ ֆիզիկական կուլտուրայի ոլորտում, մյուսը՝ տնտեսագիտության։ Հավատացյալ է, ակտիվորեն մասնակցում է սոցիալական նախաձեռնություններին, աղքատ և հաշմանդամություն ունեցող հայ երեխաներին սատարող ծրագրերին։ Պատասխանատու անձնավորություն է ու բարձր գիտակցությամբ քաղաքացի, հանրային կյանքում իրական փոփոխությունների ջատագով է։ Դաշտից դուրս ունի բազմաթիվ հետաքրքրություններ, սիրում է շախմատ խաղալ։ 2016-ից ՅՈՒՆԻՍԵՖ-ի ազգային դեսպան է։