Հայաստանը՝ ֆրանսիական ամենահեղինակավոր Գոնկուր գրական մրցանակաբաշխության ընտանիքի անդամ․ «Վերնատուն»

Ֆրակոֆեստ 2024 –ը տեղի է ունենալու Թարգմանչաց տոնին զուգահեռ և ստորագրվելու է հուշագիր Ֆրանսիական ամենահեղինակավոր՝ Գոնկուր գրական մրցանակաբաշխության հետ, որը հայտարարելու է Հայաստանում Գոնկուր մրցանակի ազգային ժյուրի ձևավորելու մասին։

Newmag հրատարակչության գլխավոր խմբագիր Գնել Նալբանդյանն ասում է, որ սա հայ գրական կյանքի համար պատմական իրադարձություն է և մշակութային այս իրադարձությունը հնարավոր է դարձել Newmag–ի, Ֆրանսիական ինստիտուտի և Ֆրանսիական համալսարանի համատեղ ջանքերով։ Այդ առիթով Երևան են ժամանելու Գոնկուր ակադեմիայի գլխավոր դելեգատ Ֆրանսուազ Ռոսինոն և Գոնկուր մրցանակի ժյուրիի անդամ, ֆրանսիացի անվանի գրող, փիլիսոփա Պասկալ Բրյուկները։

«Ֆրանսիական կամ ֆրանսալեզու գրականությունն ավելի շատ հայտնի է Հյուգոյի կամ Բալզակի տեսքով ու դրանից այն կողմ չի անցնում, բայց մենք չգիտենք թե 21–րդ դարում, հենց հիմա, ովքեր են ֆրանսալեզու գրականության նորաձևությունն ու տենդենցները թելադրողները», – ասում է Գնել Նալբանդյանը։

Ուսանողներից կազմված հայաստանյան հանձնախումբը հնարավորություն է ունենալու ընտրել իրեն հետաքրքրող ֆրանսալեզու գրականությունն ու հեղինակներին։ Newmag հրատարակչությունը կհրատարակի հայկական ժյուրիի ընտրած հեղինակների ստեղծագործությունները և հայ ընթերցողը հնարավորություն կունենա կարդալու ժամանակակից ֆրանսալեզու գրականության լավագույն ստեղծագործությունները։

Newmag հրատարակչության մուլտիմեդիա բովանդակության պատասխանատու Մանու Իրիցյանը ներկայացնում է հրատարակչության հինգ նոր ֆրանսալեզու գրքերը և փառատոնային ծրագիրը։

Փառատոնի նոր հրատարակություններից են 2021 թ․-ի Գոնկուրի արժանացած աֆրիկացի հեղինակ՝ Մուհամմեդ Մբուգար Սաառի վեպը «Հուշագրություն Շառլ Ազնավուրի մասին», որը կազմված է Ազնավուրի անտիպ մտքերից, հարցազրույցներից, լուսանկարներից, փաստաթղթերից, մյուս գիրքը՝ Միսաք Մանուշյանի կնոջ՝ Մելինե Մանուշյանի երկու մասանոց հուշագրությունն է Միսաք Մանուշյանի մասին և երկու ֆրանսիական բեսթսելլեր՝ ժամանակակից կին հեղինակներ՝ Անիես Մարտեն Լյուգանի և Ամելի Նոտոմբի վեպերը։ 

Ֆրանսալեզու գրքերից բացի, փառատոնի շրջանակներում կլինի նաև պանելային քննարկումներ, ֆրանսիական նորաձևություն, երաժշտություն և խոհանոց:

Ֆրանսիական գրականության և արվեստի Ֆրակոֆեստ 2024 փառատոնը տեղի կունենա հոկտեմբերի 12-ին, Կոնգրես հյուրանոցում, ժամը 12.00-ից մինչև 21:00–ը։