«Սկզբունքներ». Բիզնեսում ու կյանքում հաջողության մասին գիրք՝ «Արմբրոկ»-ի աջակցությամբ

Դալիոն իր ներդրումային Bridgewater Associates ընկերությունը հիմնել է Նյու Յորքի երեք սենյականոց բնակարանում։ 40 տարի անց այն դարձել է պատմության մեջ ամենաշատ գումար վաստակած հեջ ֆոնդն ու ԱՄՆ-ում 5-րդ խոշոր մասնավոր ընկերությունը:

Time ամսագիրը Դալիոյին ընդգրկել է աշխարհի 100 ամենաազդեցիկ մարդկանց ցուցակում:

Banks.am-ը ներկա է եղել գրքի շնորհանդեսին ու առանձնացրել դրա հետաքրքիր դրվագները:«Մեզ պակասում են հաջողության պատմությունները»«Դալիոյի «Սկզբունքներ» գիրքը հիմնված է հաջողության պատմության վրա ու ներկայացնում է՝ ինչպես զրոյից հիմնել կայուն ընկերություն: Սա շատ է ոգեւորում: Այս գիրքը հայերեն թարգմանելու առաջարկն անելիս հույս ունեինք, որ ոգեւորությունը վարակիչ կլինի նաեւ մյուսների համար», - Banks.am-ի հետ զրույցում ասել է «Արմբրոկ» ներդրումային ընկերության գործադիր տնօրեն Արամ Կայֆաջյանը. «Գրքում տեղ գտած որոշ գաղափարներ փորձել ենք կիրառել նաեւ մեր ընկերությունում»:

Նրա խոսքով՝ շուկայում գործելով 30 տարի՝ «Արմբրոկ»-ը եւս ունի սեփական փորձը, հաջողության պատմությունն ու սկզբունքները: «Դրանք բացարձակ թափանցիկությունն ու ազնվություն են: Այս մոտեցումներն օգնում են, որ մեր եւ հաճախորդների միջեւ ձեւավորվի վստահության միջավայր», - ասել է Արամ Կայֆաջյանը: Նա ընդգծել է՝ գիրքը ոչ միայն հաջողությունների, այլեւ ձախողումների ու դրանցից քաղած դասերի մասին է: Փորձելու, չստացվելու, նորից ու նորից փորձելու ճանապարհով է միայն հնարավոր հասնել ցանկալի արդյունքի.

«Կարեւոր է ասել, որ սա միայն մասնագիտական՝ ֆինանսիստներին կամ ներդրողներին ուղղված գրականություն չէ։ Այն ներկայացնում է կյանքում երջանիկ լինելու եւ հաջողության հասնելու սկզբունքները եւս։ Հետեւաբար, հասանելի է ընթերցողների լայն շրջանակի: Կարծում եմ՝ մեզ որոշ առումով պակասում են հաջողության պատմությունները:

Հույս ունեմ՝ Դալիոյի օրինակը կոգեւորի հասարակության այն անդամներին, որոնք ունեն գաղափարներ, բայց կարծում են, որ իրենց միջոցները բավարար չեն դրանք իրականություն դարձնելու համար: Ինչպես Սթիվ Ջոբսը սկսեց ավտոտնակից կամ Ռեյ Դալիոն իր բնակարանի մեկ սենյակից, իրենք եւս կարող են մինչեւ վերջ գնալ դեպի ցանկալի հաջողություն՝ սկսելով զրոյական կետից»: «Բծախնդիր հետազոտական աշխատանք՝ հիմնված սեփական փորձի ու պատմության վրա»Newmag հրատարակչության գլխավոր խմբագիր Գնել Նալբանդյանի կարծիքով՝ գիրքն առավել օգտակար կլինի բիզնեսներ, տնտեսություններ կառավարողների համար, բայց շատ հետաքրքիր՝ ընթերցողների լայն շրջանակի: «Սա անձնական աճի, առաջնորդության, ռեսուրսների կառավարման մեծ շտեմարան է։ Օրինակ՝ մարդկային ռեսուրսների կառավարման մասնագետները գրքում կարող են բազմաթիվ կիրառական խորհուրդներ գտնել», - Banks.am-ին ասել է Գնել Նալբանդյանը:

Նրա խոսքով՝ գրքում տեղ է գտել հեղինակի անձնական փորձառությունը. «Այստեղ տրվող ցանկացած խորհուրդ հիմնված է տասնյակ, նույնիսկ՝ հարյուրավոր փորձերի, սխալների ու հաջողությունների վրա։ Դալիոն կառավարել է տարբեր ֆոնդեր եւ հեղինակություն ձեռք բերել բծախնդիր հետազոտական աշխատանքի շնորհիվ։ Բացի այդ, Ռեյ Դալիոն, լինելով պատմության սիրահար, ուսումնասիրել է վերջին մի քանի հարյուրամյակի աշխարհի կարեւորագույն տնտեսությունների օրինաչափությունները։ Այսինքն, սա գիրք է թե անձնական փորձառության, թե պատմության հիման վրա»: Գնել Նալբանդյանը նշել է՝ հայ ընթերցողի համար գիրքը կարեւոր է հատկապես հիմա, երբ մենք, օրինակ, առնչվում ենք կենսաթոշակային ֆոնդերին. «Մարդկանց պետք է հետաքրքրի՝ ինչպես են աշխատում նրանց ֆոնդերի կառավարիչները, ինչպես է աշխատում գումարը, առհասարակ՝ ներքին խոհանոցը: Կարող ենք ասել, որ այս գիրքը ֆինանսական միջնորդի հանդեպ վստահության ցուցանիշների հավաքածու է»:

Խմբագրի խոսքով՝ գիրքը գրված է պարզ լեզվով, ինչը պահպանվել է նաեւ հայերեն թարգմանության դեպքում: Հետևաբար` այն հասանելի եւ հասկանալի է ոչ միայն ոլորտի մասնագետներին, այլեւ՝ բոլոր հետաքրքրվողներին: «Լինել ազնիվ եւ ադեկվատ»«Դուք հաճույք կստանաք հայերեն թարգմանությունից», - գրքի շնորհանդեսի ժամանակ ասել է Newmag հրատարակչության գործադիր տնօրեն Արտակ Ալեքսանյանը. «Մեզ համար շատ կարեւոր է, որ ընթերցողներից որեւէ մեկը չասի՝ «ամեն դեպքում անգլերենով կամ ռուսերենով կկարդամ»»:

Արտակ Ալեքսանյանի խոսքով՝ Newmag-ը հրատարակում է գրքեր, փնտրում գործընկերներ, բայց Ռեյ Դալիոյի գիրքն այս առումով հաճելի բացառություն էր: «Այս գիրքը թարգմանելու առաջարկը մեզ արեց Արամ Կայֆաջյանը: Դալիոյի մասին գիտեինք, բայց անկեղծորեն զարմացանք, որ այսքան լավ գիրքը դուրս է մնացել մեր տեսադաշտից: Արդյունքում՝ հաճույքով համագործակցեցինք: Որպեսզի ընթերցողներին առավել հասկանալի լինի նման գործընկերության կարեւորությունը, ասեմ, որ հիմա Ռեյ Դալիոյի «Սկզբունքներ» գիրքը կարող ենք վաճառել 7800 դրամով, իսկ առանց «Արմբրոկի» աջակցության դրա արժեքը 18 000 դրամ կլիներ», - ասել է Արտակ Ալեքսանյանը:

Նա առանձնացրել է գրքի կարեւորագույն սկզբունքներից մեկը՝ «լինել ազնիվ եւ ադեկվատ». «Կարծում եմ՝ այս սկզբունքը շատ կարեւոր է նաեւ այսօրվա Հայաստանի համար: Պետք է ազնիվ լինել ինքդ քո, թիմիդ, հաճախորդներիդ հետ ու ադեկվատ լինել կայացված որոշումներում ու դրանց հետեւանքներում»: 

Յանա Շախրամանյան

Լուսանկարները՝ Էմին Արիստակեսյանի