Newmag-ը ներկայացրեց պատվաստումների մասին բժիշկ Փոլ Օֆիթի գիրքը
Գրքի շնորհանդեսին մասնակցել են Առողջապահության նախկին նախարար Լևոն Ալթունյանը, ԱԺ առողջապահական հանձնաժողովի նախագահ Նարեկ Զեյնալյանը, Althealth առողջապահական հիմնադրամի և Վարդանանց բժշկական կենտրոնի ներկայացուցիչները, ՀԱՀ-ի բիզնեսի և տնտեսագիտության քոլեջի ղեկավար Վաչե Գաբրիելյանը:
«Մահաբեր ընտրություն. ինչ սպառնալի հետևանքներ ունի պատվաստանյութերի դեմ շարժումը» բժշկագիտական բեսթսելլերը քողազերծում է պատվաստանյութերի հետևանքների մասին տարածված սարսափելի պատմությունները: Newmag -ն այս գրքի վրա աշխատել է մեկուկես տարի:
Գիրքը պատմում է Միացյալ Նահանգներում և Մեծ Բրիտանիայում պատվաստանյութերի ստեղծման, դրանց դեմ պայքարի և այդ պայքարն առաջնորդողների մասին: «Մահաբեր ընտրություն» գրքի շնորհիվ հասարակությունը հասկացավ, թե իրականում ինչ են պատվաստումներն ու ինչքան կարևոր են մարդկանց համար:
Հայերեն հրատարակությունը պահպանել է Փոլ Օֆիթի բոլոր ծանոթագրությունները: Եթե որևէ միտք կամ հետազոտության տվյալ է պետք, դրանց սկզբնաղբյուրները գրքի վերջում են: Սա գիտական և միևնույն ժամանակ հանրամատչելի գիրք է:
Գրքի նախաբանը գրել է Հայաստանի առողջապահության նախկին նախարարը: Լևոն Ալթունյանի խոսքով, անտեղյակ լինելու պատճառով է, որ ծնողները խուսափում են պատվաստումներից՝ մահացու ռիսկի ենթարկելով եւ տառապանքների դատապարտելով իրենց երեխաներին:
Այն օգտակար կլինի ոչ միայն հայ մասնագետներին, այլ նաև բժշկությամբ ու հատկապես պատվաստանյութերով հետաքրքրվող մարդկանց: Վաչե Գաբրիելյանի խոսքով, բժշկագիտական բեսթելլերը համաշխարհային գիտության նվաճումները ներկայացնում է պարզ և հասկանալի լեզվով։
Փոլ Օֆիթը գիրքը գրել է դետեկտիվ ժանրին բնորոշ դինամիկայով: Այն թարգմանվել է ավելի քան 10 լեզվով, ճանաչվել տարվա գիրք ու գլխավորել բժշկական բեսթսելլերների ցուցակը: Այս գրքով Փոլ Օֆիթը վերջակետ է դնում հակապատվաստումների մասին բոլոր պատմություններին: Սա դժնի համաճարակների վերադարձը կանխելու և մահաբեր ընտրությանը չտրվելու ուղեցույց է:
Տարածել
Կարդա նաև
«Ներկայիս Թուրքիայի հիմքում ռասսայական խտրականությունն է». Թաներ Աքչամ
Ինչո՞ւ Թուրքիան գեթ մեկ քրիստոնյա, հրեա, քուրդ բարձրաստիճան պաշտոնյա չի ունեցել. Երեւանում կայացավ Թաներ Աքչամի նոր գրքի շնորհանդեսը
«Ահռելի, բծախնդիր աշխատանք է կատարված». «Ցեղասպանագիտության շաբաթը» բացվեց Վահագն Դադրյանի գրքի շնորհանդեսով
«Հրազդան» մարզադաշտը՝ ազգային արժեք եւ թիմային աշխատանքի արգասիք