Գրող Ռուսլան Սաղաբալյանի տարեդարձին Newmag & Friends ծրագրով տեղի կունենա նրա նոր գրքի շնորհանդեսը (թրեյլեր)

«Городской сумасшедший» գրքի շնորհանդեսը կդառնա ոչ միայն գրական իրադարձություն, այլև ջերմ հանդիպում, որի ընթացքում կկենդանանան մարդու և քաղաքի մասին պատմությունները։ Ռուսլան Սաղաբալյանի գիրքը քաղաքային պատմությունների հավաքածու է՝ սիրո և կանանց, բարեկամության և լուռ քաջության, առանց կարգախոսի հայրենասիրության, ազգային ավանդույթների և այն ամենի մասին, ինչի մասին մենք իսկապես ուզում ենք խոսել և մտածել։ 

Սա արձակ գործերի Ժողովածու է, որտեղ հավաքված են Ռուսլան Սաղաբալյանի լավագույն գրական ակնարկները, ինքնակենսագրական «Մի ժամանակ» («Լինում է, չի լինում») ստեղծագործությունը և հուշագրություններ հայտնի ու սիրված մարդկանց մասին՝ նրանց, ովքեր հետք են թողել նրա հիշողությունների և քաղաքի վրա։ Պատմությունները վառ երևանյան շնչով են՝ ճշգրիտ դիտարկումներով, սուր գրչով։ 

Ռուսլան Սաղաբալյանը բազմաժանր ստեղծագործող է։ Նա հեղինակել է արձակ, դրամատուրգիա, գիտաֆանտաստիկ գործեր, ինչպես նաև ֆիլմերի, մուլտֆիլմերի և վավերագրական ֆիլմերի սցենարներ։ Ավարտել է Երևանի պետական համալսարանի ռուս բանասիրության ֆակուլտետը և ԽՍՀՄ Պետկինոյի սցենարիստների և ռեժիսորների բարձրագույն դասընթացները։ Եղել է «Լիտերատուրնայա Արմենիա» ամսագրի հրապարակախոսության և արվեստի բաժնի վարիչը, «Առագաստ» թերթի ռուսական հավելվածի և Մոսկվայի մի շարք պարբերականների գլխավոր խմբագիրը։ 

«Կյանքս անցնում էր Երևանի և Մոսկվայի միջև։ Չէի հրաժարվի երրորդ քաղաքից, չորրորդից, հինգերորդից, բայց ճակատագիրը քմահաճ է. ո՞վ է որոշում, թե մարդը որտեղ և երբ պիտի ծնվի»։

Սաղաբալյանը Հայաստանի և Մոսկվայի Գրողների միության անդամ է, ավելի քան 2000 հրապարակումների հեղինակ։ Նրա ստեղծագործությունները թարգմանվել են 15 լեզվով։ Հեղինակը արժանացել է Կիևի միջազգային կինոփառատոնի «Գրան պրի» մրցանակին, Մոսկվայի Գրողների միության մեդալին և Մեդիա-միության միջազգային «Ոսկե բառ» մրցանակին։

«Իմ պատմվածքները թարգմանվել են 15 լեզուներով, որոշները ադապտացվել են ֆիլմերի համար և ընդգրկվել են օրացույցներում ու ժողովածուներում։ Ես արժանացել եմ մրցանակների, երբեմն՝ միջազգային։ Յոթ գրքի և պարբերական մամուլում շուրջ 2000 հրապարակումների հեղինակ եմ։ Արձակը խանդոտ տիկին է․ բազմակնություն չի հանդուրժում։ Բայց լրագրությունն էր ինձ կերակրում, և ես ինձ համար գտա ոսկե միջինը, որը կոչեցի «գրողական լրագրություն»»։

Newmag-ը մեկ տարի առաջ «Երազ» մատենաշարով ներկայացրեց հեղինակի «7 գալակտիկաների դպրոցը» գիրքը։ Մեկ տարի անց Newmag & Friends ծրագրով ներկայացնում ենք նաև Ռուսլան Սաղաբալյանի ռուսերեն ժողովածուն՝ «Городской сумасшедший», որը հիմք է դարձել նաև հայերեն նոր գրքի գաղափարական առանցքի համար։ 

Հունվարի 15-ին՝ գրողի ծննդյան օրը, J Space-ում տեղի կունենա հանդիպում ու գրքի շնորհանդես։ Հանդիպման ընթացքում ընթերցողներին սպասվում է հարց ու պատասխան հեղինակի հետ, գրքերի մակագրում, իսկ միջոցառման ավարտին՝ տորթի և գինու հյուրասիրություն։