«Ինձ քիչ ճանաչողներին խորհուրդ կտամ դիտել իմ խաղը «Արսենալում». Մխիթարյանի առաջին օրը լոնդոնյան ակումբում
Մխիթարյանը երակարաժամկետ պայմանագիր է կնքել Արսենալի հետ: Ոչ պաշտոնական տվյալով, համաձայնագիրը նախատեսված է 3.5 տարվա համար: Հայ ֆուտբոլիստն առաջին ֆոտոսեսիան եւ հարցազրույցն է ունեցել:
«Շատ ուրախ եմ, որ այստեղ եմ: Երազանքս կատարվեց. միշտ երազել եմ խաղալ Արսենալում: Կանեմ առավելագույնն այս ակումբի համար եւ կփորձեմ պատմություն ստեղծել: Միշտ հավանել եմ Արսենալի խաղը, թե ինչպես է Արսեն Վենգերը ղեկավարում թիմը: Այստեղ շատ են եղել երիտասարդ խաղացողներ, որոնք առաջադիմել են նրա ղեկավարությամբ: Ցանկանում եմ որքան հնարավոր է շուտ թիմակիցներիս հետ սկսել մարզումներս եւ շատ արագ նրանց հետ լեզու գտնել խաղադաշտում»
[gallery columns="5" ids="49899,49900,49898,49901"]
Իր առաջին հարցազրույցում հայ ֆուտբոլիստը նշել է Արսենալը սիրելու գուցե ամենաիրական պատճառը. խոսքը Թիերի Անրիի մասին է: Երկրպագուները մեծ ուրախությամբ են ընդունել Մխիթարյանի տեղափոխությունը:
«Ինձ քիչ ճանաչողներին խորհուրդ կտամ դիտել իմ խաղը «Արսենալում»: Ես խաղում եմ ամբողջ խաղադաշտում եւ չեմ սեւեռվում մի դիրքի վրա: Ձգտում եմ տարածություն ստեղծել թիմակիցներիս համար եւ օգնել նրանց»
Կարդացեք նաև.
- Ո՞ւր կորան կրքերը. Ահա ինչու 2018-ը կարող է բեկումնային լինել Մխիթարյանի համար
- Մոուրինյու vs Մխիթարյան. Ո՞ւր գնալ, երբ երկու քարի արանքում ես
- Ի՞նչ ասաց Մխիթարյանը, ի՞նչ պլաններ ունի Հայաստանի հետ կապված. Հենոյի ասուլիսի մանրամասները
Արսենալում իր նորամուտին եւ մարզչի հետ աշխատելուն հայ կիսապաշտպանը սպասում է անհամբեր: Արսենալի գլխավոր մարզիչ Արսեն Վենգերը լավատեսորեն է տրամադրված եւ կարծում է, որ այս տրանսֆերը մեծ օգուտ կտա թիմին:
«Մխիթարյանը կատարյալ ֆուտբոլիստ է: Նա շատ պահեր է ստեղծում թիմակիցների համար, միշտ շարժման մեջ է մի քանի դիրքերում: Նա ունի անհրաժեշտ բոլոր որակները: Նա կարող է խաղալ եզրերում կամ կիսապաշտպանության կենտրոնում, եւ լավ համագործակցել Օզիլի հետ: Շատ ուրախ եմ, որ Մխիթարյանի նման ֆուտոլիստ ունեցանք»
[gallery columns="5" ids="49902,49903,49904,49905"]
Խաղաշապիկի համարը Մխիթարյանը դեռեւս չի ընտրել: Ալեքսիս Սանչեսի եւ Թեո Ուոլքոթի հեռանալուց հետո Արսենալում ազատ են 7 եւ 14, ինչպես նաև 22 համարները, եւ ամենայն հավանականությամբ, հայ ֆուտբոլիստը կընտրի դրանցից մեկը: Արսենալի հաջորդ հանդիպումը հունվարի 25-ին է: Անգլիայի լիգայի գավաթի խաղարկության կիսաեզրափակիչի` Չելիսի հետ պատասխան խաղը, հնարավոր է, Մխիթարյանը բաց թողնի: Զինագործների կազմում նրա նորամուտը կարող է կայանալ հունվարի 30-ին, Պրեմիեր լիգայի Սուոնսիի հետ արտագնա խաղում: