newmag-ը զրուցել է Ադրբեջանի դրոշը վերցրած հայ երկրպագուի հետ (տեսանյութ)
Մոսկվայում մարտեր առանց կանոնների մրցաշարը վերածվել է առանց կանոնների մարտի հայերի և ադրբեջանցիների միջև: Երկու հայ մարզիկների երկրպագելու եկած հայերն իրենց ֆան տրիբունայում ծածանել են Հայաստանի և Արցախի դրոշները, ինչը հունից հանել է ադրբեջանցիներին:
Ադրբեջանցիները ներխուժել են հայկական տրիբունա` փորձելով խլել Արցախի դրոշը: Սկսվել է զանգվածային ծեծկռտուք: Միջամտել է օմոնը:
«Ադրբեջանցիների մի խումբ, երևի 30-40 հոգի փորձեցին հայկական դրոշները վերցնել: Իրենք փորձում են սեփական կարծիքը թելադրել, բայց հաստատ չի ստացվելու»,- ասում է Տիգրան Մադոյանը:
Բախումն ավարտվել է ադրբեջանցիների փախուստով: Ավելին` Արցախի դրոշը վերցնելու եկած ադրբեջանցիները փախչելիս հայերի մոտ են թողել իրենց սեփական դրոշը:
«Երբ փորձում էին դրոշը քաշել, տեսա, որ ադրբեջանցիներից մեկի մոտ իրենց դրոշն է ու պահը չկորցրեցի, վերցրեցի»-ասում է Տիգրան Մադոյանը:
Ծեծկռտուքի մասին հայտարարություն է տարածել նաև ադրբեջանական կողմը` փորձելով արդարանալ ու բացատրել, թե ինչու է ադրբեջանական դրոշը հայտնվել հայերի ոտքերի տակ: Մեղադրում են ադրբեջանցի երիտասարդին, որը թեև գիտեր, որ գնում են հայերի հետ կոնֆլիկտի, իր հետ վերցրել էր ադրբեջանի դրոշը: