Մեծ հոբելյանին՝ բացառիկ հրատարակություն. Newmag-ը ներկայացնում է Շառլ Ազնավուրի պոեզիան և արձակը երկհատորյակով (թրեյլեր)

May 20, 2024

Դարի երգչի 100-ամյակին նրա պոեզիան ու արձակը newmag-ը ներկայացնում է երկերի բացառիկ երկհատորյակով։ Սա 6-ամյա երկար ու ձիգ աշխատանք է, որը հրատարակչությունն անցել է Ամունդի Ակբա Ասեթ Մենեջմենթի հետ։ Այս տարիների ընթացքում ոչ միայն գրական գործերն են հրատարակվել հայերեն, այլև հայերեն են հնչել նրա հայտնի ու սիրելի երգերը։ newmag-ն Ազնավուրի հենց 100-ամյակի օրը կներկայացնի «Ազնավուր. երկերի ժողովածու. արձակ» բացառիկ երկհատորյակը։ Հոբելյանական երեկոն տեղի կունենա մայիսի 22-ին, 19:00, O2 Gardens-ում:

Ազնավուրի մահից հետո newmag-ը շանսոնյեի գրական ժառանգությունը բացառիկ իրավունքով թարգմանեց ու հրատարակեց հայերեն: Առաջին հատորում արձակն է. բոլոր ինքնակենսագրականներն ու նովելները, երկրորդում՝ 500 երգերի ժողովածուն։ Բացառիկ ու սահմանափակ քանակությամբ հրատարակությունը կոչվում է «Ազնավուր. երկերի ժողովածու. արձակ»:  

«Կյանքից կառչած», «Քանի սիրտը բաբախում է», «Մեղմ շշուկով», «Անցած օրեր», «Վերջին դուռը» Շառլ Ազնավուրի գրքերի վերնագրերն են, որոնք հայալեզու ընթերցողին արդեն հայտնի են առանձին հատորներով: Այս ստեղծագործությունների մի մասը նրան հաջողություն է բերել, որոշները մեծ աղմուկ են բարձրացրել, որոշներն էլ ստիպել են կատարելագործել սեփական ոճն ու մուտք գործել գրական աշխարհ: Կիրք, սեր, դավաճանություն, նվիրում, բաժանում, ինքնասպանություն, խաբեություն, խաղամոլություն, ապաշխարում, զրույց Աստծո հետ. Ազնավուրի գրչի համար փակ թեմաներ չկան։ 

Շառլ Ազնավուրի արձակ ստեղծագործությունների այս լիակատար հատորը ներառում է 5 ինքնակենսագրական գործերը և պատմվածքների ժողովածուն, որոնք Newmag-ը հրատարակել է 2019-ից 2023 թվականներին: Այստեղ են նաև մաեստրոյի 16 նովելները՝ գրված իրեն հատուկ հումորով և երևակայությամբ: Հայաստան, բոհեմ, սերեր, ընկերներ, Հոլիվուդ. ինչի մասին էլ Ազնավուրը պատմի, միշտ անկեղծ է ու շիտակ, համեստ ու հանդուրժող։ 

Ազնավուրի ստեղծագործությունները քսաներորդ դարի պատմությունն են երգերով, մարդկանց ճակատագրերը՝ նոտաներով ու խոհերով, որոնցից 500-ը հենց Դարի երգիչն իր ձեռքով է ընտրել և մեկտեղել է մեկ ժողովածուում`L’Intégrale: newmag-ը դրանք նախ հրատարակեց 4 հատորով`«Նոր երկիր»,  «Սեր և պատերազմ»«Քեզ համար, Հայաստան» և «Ես չեմ հեռանում…»:

Այստեղ ներկայացված են շանսոնյեի ստեղծագործական առաջին լուրջ քայլերից մինչև կյանքի մայրամուտին գրված երգերը. newmag-ի հսկայական աշխատանքի շնորհիվ Հայաստանում Ազնավուրին ճանաչեցին խորությամբ` ամբողջ գունապնակով, կյանքի փորձով ու տարիների խորագիտությամբ:  

6 տարիների ընթացքում նախագծի շնորհիվ նաև հայերեն է հնչել 6 երգ։ Newmag-ը հայաֆիկացրեց Շառլ Ազնավուրի «Մնա», «Տարեք ինձ», «Ով», «Մեռնել սիրելով»,  «Վենետիկն է տխուր», «Այս կռվի ամնուկները» գործերը։  

Ազնավուրյան այս յուրօրինակ նախագիծը հրատարակչությունն իրագործել է Ամունդի-Ակբա ասեթ մենեջմենթի հետ։ Ընկերությունը ինչպես գրքերի, երգերի, այնպես էլ հոբելյանական Ազնավուր. երկերի ժողովածու. արձակ» երկհատորյակի  անփոխարինելի գործընկերն է։  

Գրքի շնորհանդեսը տեղի է ունենալու հենց Ազնավուրի 100-ամյակի օրը՝ մայիսի 22-ին, 19:00, O2 Gardens-ում, (հասցե՝ Սիլիկյան թաղամաս (3-րդ գյուղ), 13-րդ փողոց, №2/8)։  Հոբելյանական երեկոյին կհնչեն նաև այն երգերը, որոնք newmag-ն ու Ամունդի Ակբա Ասեթ Մենեջմենթը ներկայացրել են նրա մահից հետո։ Երեկոյի ընթացքում «Խալուլի» գինու հյուրասիրություն։ Հոբելյանի գլխավոր հովանավորը «Պրոֆալ» ընկերությունն է։ Հատուկ հրատարակությունն այդ օրը կվաճառվի զեղչով։