Աննա Աստվածատուրյանը ԵՊՀ-ում ներկայացրել է իր «Արտաքսում դեպի անհայտություն» գիրքը

Նոյեմբերի 4-ին Երևանի պետական համալսարանի Ուսանողների հետ տարվող աշխատանքների կենտրոն նախաձեռնությամբ տեղի է ունեցել ամերիկահայ գրող, իրավաբան, բարերար Աննա Աստվածատուրյան Թերքոթի «Արտաքսում. դեպի անհայտություն» գրքի ներկայացումը։

Գիրքն Աննա Աստվածատուրյանի ‘’Nowhere, a Story of Exile’’ ինքնակենսագրականի հայերեն թարգմանությունն է, որն իրականացրել է Newmag հրատարակչությունը։

ԵՊՀ Եվրոպական ուսումնասիրությունների կենտրոնում հանդիպման ընթացքում Աննա Աստվածատուրյանը պատմել է Բաքվում ապրած տարիների, իր հուշերի, անցած ճանապարհի և գիրքը գրելու գաղափարի մասին։

«Արտաքսում. դեպի անհայտություն» գիրքը պատմում է Բաքվի ջարդերից փախչող ընտանիքի պատմությունը՝ տասնմեկամյա հեղինակի աչքերով: Աննա Աստվածատուրյանն իր ապրածն ու տեսածը օրագրի տեսքով գրել սկսել է 14 տարեկանում, և քսան տարի անց միայն հուշերը դարձել են փաստարկված գիրք։

ԵՊՀ-ում տեղի ունեցած հանդիպման ընթացքում հեղինակը ներկայացրել է գրքի էջերում տեղ գտած իր անձնական պատմությունը և պատասխանել ներկաների հարցերին։

«Ամբողջ աշխարհին, բայց առաջին հերթին հենց մեր ժողովրդին ու երիտասարդ սերնդին պետք է պատմել ու տեղ հասցնել այն ամբողջ ճշմարտությունը, որի մասին այսօր գրեթե չեն հիշում ու խոսում։ Բաքվում և Սումգայիթում բնակվող տասնյակ հազարավոր հայերին բաժին հասած ողբերգությունը ոչ մի դեպքում չպետք է մոռացության մատնվի, հատկապես՝ այսօրվա իրականությունում։ Գիրքը հայերեն հրատարակելու համար վճռորոշ է եղել 44-օրյա պատերազամը։ Պատերազմից հետո հասկացա, որ մեր պատմությունը շարունակվում է, չի ավարտվում։ Շարունակվում է ցեղասպանությունը Բաքվում, որն իմ պապն է վերապրել դեռ 1918 թվականին, և այն շարունակվում է նաև հիմա», - նշել է Աննա Աստվածատուրյանը։

Աննա Աստվածատուրյանը ծնունդով Բաքվից է, որտեղից նրա ընտանիքը 90-ականներին մազապուրծ փրկվել է ջարդարարներից՝ փախչելով Հայաստան, հետո էլ բնակություն հաստատել Միացյալ Նահանգներում։ ԱՄՆ-ում Աննան իրավաբանական կրթություն է ստացել, ամուսնացել։ Ներկայումս նա հայտնի իրավաբան է, նաև Վեստբրուկի քաղխորհրդի ընտրված նախագահը: Գրքի թարգամանությունն Արցախյան 44-օրյա պատերազմից հետո միակ նախաձեռնությունը չէ Աննա Աստվածատուրյանի կողմից. նա 2020թ.-ին հիմնել է«Աննա Աստվածատուրյան» բարեգործական հիմնադրամը, իրականացրել է մի շարք ծրագրեր՝ «Արցախյան պատերազմ 2020. կորուստներ, մարտահրավերներ և դիմակայության զարգացման հնարավորություններ» հետազոտությունը, ինչպես նաև մեկնարկել է «Սեր Արցախ» ծրագիրը՝ ի աջակցություն Արցախում նորածին երեխաներ ունեցող ընտանիքների: