Գրքի վերնագիրը միանգամից տեղափոխեց ինձ մանկություն
Լաուրա Հարությունյան
Գրքի վերնագիրը միանգամից տեղափոխեց ինձ մանկություն, երբ ընկերուհիներիս հետ չարաճճիություններ էինք անում ու անթիվ-անհամար պատմություններ հնարում միմյանց ապագայի մասին... Մենք նույնպես ունեինք մեր «վախենալու» դոն Աքիլեն՝ նկուղում շրջող խոշոր ճամպրուկով... Գիրքը Էլենայի և Լիլայի ընկերության, մանկության, իրենց ապրած աշխարհի, ու միևնույն ժամանակ, ներաշխարհի մասին է։ Ընկերություն, որը ավելի շատ կարելի է համարել մրցակցություն, խաղ, մեկը մեկից առաջ անցնելու ու «նոր նշաձող սահմանելու» մասին մի խենթ մանկական զբաղմունք։ Գրքում 1950_ականների Նեապոլն է՝ իր աղքատիկ շնչով։ Ծերը ծերին հասցնող բնակչությունն ու նրանց կողքին ամենահարուստ խավը. միջակություն կարծես թե գոյություն չունի։ Սովորելու ձգտում, բայց հնարավորությունների սահմանափակ վիճակ... Պատերի ներսում խնդիրներ, սեր, դավաճանություն... Թվում է, Նեապոլը սովորական քաղաք է, սովորական մարդկանցով ու առօրյայով, բայց չէ, Նեապոլում ապրում են համարձակ գրողի հերոսները, որոնք սիրում են, պայքարում, արարում ու ձգտում... «Իմ հանճարեղ ընկերուհին » Էլենա Ֆերանտե անվան տակ թաքնված հեղինակի «Նեապոլիտանական քառյակ»_ի առաջին վեպն է։ Գիրքը համարձակ է, բաց տեքստերով ու մարտահրավերներով... Քաղաք՝ լցված սիրո հրապույրով... Ընկերություն՝ օր օրի անքակտելի դառնալու ձգտումով... Կյանք՝ մի օր վերջանալու ակնկալիքով... իսկ գուցե սպառնալիքո՞վ...
Տարածել
Իմ հանճարեղ ընկերուհին
Էլենա Ֆերանտե
3400 ֏
Նկարագրություն
Էլենա Ֆերանտեն ժամանակակից իտալացի գրող է: Նրա ինքնությունը մինչև այժմ անհայտ է, թեև նա բավականաչափ հայտնի հեղինակ է։ Համաշխարհային ճանաչում ստացելէ «Նեապոլիտանական քառյակի» շնորհիվ։ Այդ 4 վեպերի մեջ առաջինը հենց այս գիրքն է։
Նեապոլի արվարձանային աղքատ, բայց աշխույժ թաղամասում 1950-ականներին սկսված պատմությունը շարունակվում է գրեթե 60տարի: Գլխավոր հերոսներն են տաքարյուն Լիլան և գրքի հեղինակ Էլենան։ Նրանք դառնում են կին, մայր, առաջնորդ և այդ ամբողջ ընթացքում պահպանում են իրենց բարդ, երբեմն նաև հակասական ընկերությունը:
Առաջին վեպը հյուսում է Լիլայի և Էլենայի պատմությունը՝ սկսած 10 տարեկանում նրանց բախտորոշ հանդիպումից մինչև դպրոց և պատանեկություն: «Իմ հանճարեղ ընկերուհին» վեպն ընկերության էությունը քննող հուզիչ խորհրդածում է, նաև պատմություն մի ամբողջ ազգի մասին: Այս երկու կանանց կյանքի պատմության միջոցով Ֆերանտեն պատմում է թաղամասի, քաղաքի և երկրի մասին, որոնք, ժամանակի ընթացքում վերափոխվելով, փոխում են նաև երկու գլխավոր հերոսուհիների փոխհարաբերությունները:
