Ծնողական խնամքը՝ ՄԻԱՎ/ՁԻԱՀ-ի կանխարգելման միջոց

Աշխարհում 35 մլն մարդ ապրում է ՄԻԱՎ/ՁԻԱՀ վարակով: Նախորդ երկու տարիներին 2 միլիոն մարդ դարձել է նոր վարակակիր: Հայաստանում ՄԻԱՎ/ՁԻԱՀ-ով ապրում է 1924 մարդ: Գերակշիռ մասը տղամարդ է, 38-ը՝ երեխաներ: Նախկինում ամենաշատ վարակակիրները համարվում էին թմրամոլները: 2005-ից հետո պատկերը փոխվել է:
ՄԻԱՎ/ՁԻԱՀ-ի տարածման առաջին հորիզոնականում հետերոսեքսուալ հարաբերություններն են: Ընտանիքի տղամարդը մեկնում է արտագնա աշխատանքի, վերադառնում վարակված, վարակում է նաև կնոջը: Հայաստանում ՄԻԱՎ/ՁԻԱՀ-ով ապրող մարդկանց 69 տոկոսը տղամարդ է, 31 տոկոսը՝ կին: 58 տոկոսը վարակվել է Հայաստանից դուրս:
Խնդիրը մեղմելու, միգրանտներին սպասվող բարդույթներից պաշտպանելու համար ՄԱԿ-ի մանկական հիմնադրամը ԵՄ ֆինանսավորմամբ 2012-ին սկսեց եռամյա ծրագիր՝ «Սոցիալական արձագանքը աշխատանքային միգրացիայի հիմնախնդրին» վերնագրով: Այն նպատակ ունի ոչ թե նվազեցնել միգրացիան, այլ մեղմել սոցիալական հետևանքները: Ծրագրի սկզբում իրականացվել է հետազոտություն: Պարզվել է, որ ընտանիքի միգրանտը մեծ մասամբ դառնում է սեռավարակակիր: