Լայնեզր գլխարկով, գոթական ոճով բարոնուհին ու էքսցենտրիկ գրող Ամելի Նոտոմբը (տեսանյութ)

Նա չորս տարեկանում հազիվ է փրկվում մահից, պատանեկության շրջանում երազում պրիմաբալերինա դառնալու մասին, իսկ Ճապոնիայում ապրելու տարիներին, երբ հայրը Բելգիայի հյուպատոսն էր Ծագող արևի երկրում, տարված էր ճապոնական մշակույթով: Տարիներ անց, այդ առիթով կխոստովանի․ ձախողված ճապոնուհի է, պրիմաբալերինա, նահատակ, բայց այդ ամենը նրան դարձրեց քիչ թե շատ հաջողակ արվեստագետ: Նա Ֆրանսիայում ամենահայտնի ժամանակակից գրողն է.

«Բառերը կործանելու հատկություն ունեն: Մի բառը կարող է ձեզ փրկել, մեկուրիշ բառը կարող է սպանել: Այն օրը, երբ սա հասկացա, ինքս ինձ ասացի, որ լեզվի մեջ նիտրոգլիցերին կա, և եթե զգուշավոր չլինեմ, ապա անկախ իմ կամքից կարող եմ սպանել կամ փրկել»։

Ամելի Նոտոմբը ստեղծագործելիս երաժշտություն չի լսում, ասում է դա կսպանի իր ներսի մեղեդին, որ բառեր է դառնում ու հնչում ընթերցողի սրտում: Բելգիացի վիպասանը գրելը համեմատում է ծննդաբերության հետ. չգիտես` ինչ դիմագծերով փոքրիկ կունենաս, թեև քոնն է : Իսկ նրա յուրաքանչյուր փոքրիկը կարճ նախադասություններով, կտրուկ և անսպասելի երկխոսություններով առեղծվածային պատմություն է.

«Գրելիս միշտ լսում եմ իմ ներքին ձայնը, որը մետալ ռոք է: Անքնության ընթացքում է հնչյունը` միտքը ծագում գլխումս, այնուհետև առավոտյան այն թղթին եմ հանձնում և որքան գրում եմ, այնքան ի զարմանս ինձ, սյուժեն ինքնաբերաբար հարստանում է»։ 

Նա երեխաներ ունենալու փոխարեն որոշել է իրեն ամբողջովին նվիրել իր գրչին, առանց որի, խոստովանում է՝ կկորցնի կյանքի գույներն ու ապրելու իմաստը։ Newmag-ը վերջին մեկ տարում հայերեն է թարգմանել Նոտոմբի երկու գործ՝ «Կապույտ մորուքը» և «Թշնամու հարդարանքը»։

Կարդացեք նաև

• Ֆրանկոֆեստին Newmag-ը կներկայացնի Ամելի Նոտոմբի նոր վեպը՝ «Թշնամու հարդարանքը» (թրեյլեր)
• Միանգամից ֆրանսիական 2 նոր բեսթսելլեր, որ կգրավեն ձեր սրտերը (տեսանյութ, լուսանկարներ)