Փետրվար-մարտին սպասվող հիվանդությունների ու վիրուսների թոփ հնգյակը
Հաճախ հանդիպող հիվանդությունների այս շարքը փոխվում է եղանակին համահունչ: Ամեն սեզոն ունի հիվանդությունների իրեն բնորոշ սրացումները: Ձմռանը մասնագետները խորհուրդ են տալիս հատկապես ուշադիր լինել և զգուշանալ սուր շնչառական հիվանդություններից: Աշխարհում սեզոնային գրիպից տարեկան մահանում է 250-500 հազար մարդ: Ընդ որում՝ գրանցվում է նաև մոտ 5 միլիոն բարդացման դեպք:
H3N2 կամ, ինչպես հաճախ ասում են, Հոնկոնգյան գրիպ
Հայաստանում ու հարևան երկրներում համաճարակաբաններն այս ձմեռ հայտնաբերեցին գրիպի հենց այս շտամը: Հոնկոնգյան գրիպը վտանգավոր է ոչ թե իր ընթացքով, այլ՝ բարդություններով: Գոյություն ունի վիրուսի 3 տեսակ՝ A, B և C: Ամենավտանգավորը ենթատեսակների միքսացիաներն են: Հայ մասնագետները վիրուսի սրացման 2-րդ փուլը կանխատեսել են փետրվարի կեսերից:
Սուր շնչառական վարակներ
Գարնան առաջին ամսվա ընթացքում հավանականությունը մեծ է, որ եղանակային փոփոխություններին զուգահեռ մրսածությունն ու վարակիչ հիվանդությունները կշարունակեն լինել առաջատարների շարքում: Խնդիրն այն է, որ ձմռանը օրգանիզմն անհարժեշտ վիտամինների պաշար չի ստանում, հետևաբար ընկնում է օրգանիզմի դիմադրողականությունը: Վարակների նկատմամբ առավել զգայուն են մանկահասակ երեխաները: Բժիշկները ծնողներին խորհուրդ են տալիս այս շրջանում հետեւել երեխայի սննդակարգին, կերակրել վիտամիններով հարուստ սննդով, թույլ չտալ վարակի ներթափանցումն օրգանիզմ:
Քրոնիկ հիվանդություններ
Մասնագետները վստահեցնում են, որ եղանակի տաքացմանը զուգահեռ գլուխ կբարձրացնեն նաև քրոնիկ հիվանդությունները: Եղանակային տատանումներն ու անցումային ջերմաստիճանները հատկապես դառնում են գլխացավերի, գլխապտույտների սրացման պատճառ: Փետրվարից-մարտ անցումային շրջանում սրացող քրոնիկ հիվանդություններից ամենավտանգավորը զարկերակային ճնշման բարձրացումն է: Դա է պատճառը, որ հենց այդ ընթացքում մեծանում է իշեմիկ ինսուլտների վտանգը:
- Ի՞նչ է Ավիտամինոզը. գլխավոր հարցերն ու պատասխանները A, B և C վիտամինների մասին
- Ինչպես բուժել մրսածությունը մեկ օրում
- 21-րդ դարի մայրաքաղաքային ամենատարածված հիվանդություն
Սրտանոթային հիվանդություններ
Այս ամիսներին բնորոշ խնդիրներից մեկն էլ անոթային հիվանդների առողջական վիճակի բարդացումն է: Ջերմաչափի սնդիկի սյան բարձրանալուն զուգահեռ՝ մարդու օրգանիզմում ակտիվանում է արյան շրջանառությունը, բոլոր օրգան-համակարգերի ֆունկցիոնալ գործունեությունը, որն առաջին հերթին սրտանոթային խնդիրներ է առաջացնում: Նշված հիվանդություններն ունենում են որոշակի սրացումներ։ Մասնագետները նշում են, որ մեր երկրում մահացության մոտ կեսը բաժին է ընկնում սիրտ-անոթային հիվանդություններին: Հատկապես սրտամկանի ինֆարկտով 4-5 անգամ ավելի հաճախ տառապում են տղամարդիկ, քան կանայք։ Սիրտ-անոթային հիվանդության նախանշաններն են՝ ցավ կրծքավանդակում, հաճախ կապված է լինում ֆիզիկական լարվածության հետ, ուղեկցվում է սառը քրտինքով, հևոց, գիտակցության մթագնում։ Այն անձինք, ովքեր ծխում են, ապրում են սթրեսային կյանքով, ֆիզիկապես ակտիվ չեն, ունեն ավելորդ քաշ, ռիսկային խմբում են:
21-րդ դարի հիվանդություն՝ դեպրեսիա
Սեզոնային փոփոխությունները կարող են բացասական ազդեցություն ունենալ նաև մարդու հոգեկան աշխարհի վրա: Հոգեբանները նշում են, որ ձմռանը մարդու օրգանիզմում որոշակի ռեսուրսներ սպառվում են և դա է պատճառը, որ մարտի սկիզբը դառնում է ճգնաժամային ժամանակահատված: Դեպրեսիվ վիճակներ են առաջանում հիմնականում այն մարդկանց մոտ, ովքեր վարքային «ռեպերտուարի» առումով ավելի պասիվ են և հակված են շրջապատից ինչ-որ բան ստանալու: Սակայն պետք է տարբերել դեպրեսիան և տրամադրության անկումը:Պետք չէ անկումային տրամադրությունը շփոթել դեպրեսիայի հետ: Դեպրեսիան ունի հստակ ախտանիշեր. մարդը կարծես ներքին տառապանք է զգում, ապագայի նկատմամբ վախ, անորոշություն, հուսալքություն, կտրվում է իրականությունից, դառնում անզոր, վրա են հասնում քնկոտությունը կամ անքնությունը: Մարտ ամսվա ընթացքում գլուխ են բարձրացնում նաև հոգեկան հիվանդությունները, ինչը հոգեբանների խոսքով, պայմանավորված է մարդու հոգեկան տառապանքի և բնության զարթոնքի միջև հակադրության առաջացմամբ: