5 նոր գրքով, արտասահմանյան հեղինակով ու նոր ծրագրերով սկսվեց «Երազի գիրք» մանկական փառատոնը (տեսանյութ, լուսանկարներ)

Այս տարի Երազի գիրք» փառատոնը փոքրերի ու մեծերի համար ներկայացրեց հինգ գիրք։ Yeraz Projects-ի անդամ Նարե Հարությունյանը հանդիսավոր բացմանը խոսեց Newmag-ի հետ գործակցության մասին.

«Այսօր արդեն հինգերորդ անգամ հավաքվում ենք նույն գաղափարի շուրջ՝ գրքի, ընթերցանության ու երևակայության։ Ամեն անգամ թվում է, թե սա պարզապես միջոցառում է, բայց իրականում՝ հիշեցում է, թե ինչքան ուժեղ է գիրքը, երբ հանդիպում է իր ընթերցողին ճիշտ պահին։ 

«Երազ» մատենաշարը ստեղծվել է Newmag հրատարակչության և «Սոմնիում» ընկերությունների խմբի «Երազ Փրոջեքթսի» համատեղ աշխատանքի արդյունքում՝ մի պարզ մտքից, որ մանկական գիրքը լինի հասանելի, հասկանալի ու մոտ երեխային։ 

Այստեղ ամեն ինչ արված է երեխայի համար, որը դեռ նոր է բացում գրքերի մեծ ու կախարդական աշխարհը՝ տառերից մինչև պատկերներ։ «Երազ» մատենաշարի խորհրդանիշը՝ թռչող Միեղջյուրը, կարծես հիշեցնում է, որ գրքերի էջերին երևակայությունը սահմաններ չունի, իսկ միտքը մաքուր է ու ազատ»։   

«Երազ» մատենաշարի ղեկավար Գոհար Մանուկյանը խոսեց երեքամյա «Երազ» մատենաշարի ստեղծման, առաջին քայլերի ու հասունացման մասին. «Սա այն տարիքն է, երբ սկսվում են հարցերը՝ «ինչու՞», «ինչպե՞ս», «իսկ եթե՞»… Եվ, երևի, հենց այս հարցերից ծնվում են ամենակարևոր պատմությունները։ Մեր մատենաշարն էլ այդ հարցերից է ծնվել։

Ինչ կլինի, եթե գիրքը դառնա երեխայի ամենամոտ ընկերը։ Ինչ կլինի, եթե պատմությունը սկսվի հենց իրենից։ Ինչ կլինի, եթե ընթերցելը դառնա ոչ թե պարտականություն, այլ՝ ցանկություն։ Այս երեք տարիներին մենք փորձել ենք ոչ միայն գրքեր ստեղծել, այլ միջավայր, որտեղ երեխան կարող է մտածել, հարց տալ, երևակայել ու մի փոքր էլ փոխել աշխարհն իր ձևով։ 

Այսօրվա փառատոնն այդ ճանապարհի շարունակությունն է։ Տեղ, որտեղ գիրքը պարզապես առարկա չէ, այլ հանդիպում է մարդկանց միջև, գաղափարների միջև, սրտերի միջև»։   

5-րդ «Երազի գիրք» փառատոնի հատուկ հյուրը լատվիացի դրամատուրգ, գրող Ռասա Բուգավիչուտե–Պեցեն էր։ Նրա գիրքը՝ «Մթության մեջ տեսնող տղան», Newmag-ը հրատարակել է անցյալ տարի։ Հեղինակը հանդիպեց իր ընթերցողների հետ, մակագրեց նրանց գրքերը ու պատմեց իր հերոսի մասին. 

«Եկաբի կերպարն ունի նախատիպ։ Իմ ամուսինն է։ Նրա ընտանիքի անդամները չեն տեսնում, ես պատմել եմ այդ փորձառության մասին։ Ամուսինս պատմեց իր մանկությունից, և ես որոշեցի գրել գիրք, չնայած կան նաև հերոսներ, որոք մտացածին են, իրական չեն: 

Ինձ շատ են դուր գալիս տրագիկոմիկ գրքերն ու պատմությունները, երբ կարդում ես ինչ-որ զվարճալի բան ու զվարճանում ես, տխուր պատմություն կարդալիս էլ կարող ես հուզվել, սա ինձ համար գրքի հիմնական արժեքներից է:»։  

Ռասա Բուգավիչուտե–Պեցեն պատմեց նաև, որ ազգությամբ լատվիացի ու լիտվացի է, բայց վերջերս արել է ԴՆԹ թեստ ու պարզել, որ ունի հայի արյուն. «Ես գիտեի, որ լատվիացու ու լիտվացու արյուն ունեմ։ ԴՆԹ թեստով պարզվեց, սակայն, որ 60 %-ով հայ եմ։ Իմ տոհմածառին ծանոթ չեմ, բայց սա շատ հետաքրքիր ու զարմանալի փաստ է ինձ համար։ Հաշվի առնելով այդ փաստը, ես ինձ այստեղ կզգամ ինչպես տանը, և պատրաստ եմ ցանկացած արկածների»։ 

«Երազ» մատենաշարն այս փառատոնին ներկայացրեց 5 նոր գիրք. Ջեֆ Քիննի. «Վտվտիկի օրագիրը. «Համբերության վերջին կաթիլը», Էդմոնդո դե Ամիչիս. «Սիրտը», Աննա Ստարոբինեց. «Գազան Դետեկտիվ», Վիոլետ Վաիս «Բրիոշն ու Տարտինը», Նոյել Ջենիս-Նորթոն. «Ավելի հանդարտ, ավելի հեշտ և ավելի երջանիկ ծնողավարում»։

Լատվիացի գրողի հետ հանդիպմանն ու բոլոր մյուս շնորհանդեսներին մասնակցում ու գրքերը ներկայացնում էին նաև երեխաները։ Բոլոր հինգ գրքերի շնորհանդեսները տարբերվող ձևաչափով էին։ Իտալացի դասական գրող Էդմոնդո դե Ամիչիսի «Սիրտը» վեպը ներկայացրին «Ուսում» դպրոցի սաները։ Ուսուցչուհի Մարիամ Սահակյանը կազմակերպել էր բաց դաս, որի ժամանակ աշակերտները վերլուծեցին վեպի հերոսներին, հեղինակի ուղերձներն ու վեպի արդիականությունը։ 

«Գազան դետեկտիվի» առաջին մասը՝ «Գայլի որջը» ինտերակտիվ հարց ու պատասխան էր հանդիսատեսի հետ։ «Բրիոշն ու Տարտինը» կոմիքսը նույնպես հարց ու պատասխանի ձևաչափով էր։ 

Նոյել Ջենիս-Նորթոնի «Ավելի հանդարտ, ավելի հեշտ և ավելի երջանիկ ծնողավարում» գիրքը ներկայացվեց քննարկման ձևաչափով, որտեղ գրքի թարգմանիչը, խմբագիրը, դպրոցական ծնողավարման ակումբի ղեկավարն ու հոգեբանը կարծիք հայտնեցին հեղինակի ռազմավարությունների ու մեթոդների մասին, որոնք օգնում են ծնողավարումն ու երեխաների հետ շփումը դարձնել ավելի հեշտ ու արդյունավետ։   

Փառատոնի երաժշտական մասն ապահովեցին Ալեքսեյ Հեքիմյանի անվան երաժշտական դպրոցի սաները և Հասմիկ Մուրադյանը։ Վերջում փոքրիկներին սպասում էր համեղ հյուրասիրություն։ 

Կարդացեք նաև

• Newmag-ն ու Yeraz Projects-ը Երազ մատենաշարով ներկայացնում են Աննա Ստարոբինեցի «Գազան դետեկտիվ. Գայլի որջը» գիրքը (թրեյլեր)
• Newmag-ն ու Yeraz Projects-ը Երազ մատենաշարով ներկայացնում են Վիոլետ Վաիսի «Բրիոշն ու Տարտինը. Շնիկն ու անհեթեթ բաներ» կոմիքսը (թրեյլեր)
• Newmag-ն ու Yeraz Projects-ը Երազ մատենաշարով ներկայացնում են «Վտվտիկի օրագիրը․ Համբերության վերջին կաթիլը» գիրքը (թրեյլեր)
• Newmag-ն ու Yeraz Projects-ը Երազ մատենաշարով ներկայացնում են Էդմոնդո դե Ամիչիսի «Սիրտը» (թրեյլեր)
• 5-րդ անգամ Newmag-ն ու Yeraz Projects-ը ներկայացնում են «Երազի գիրք» մանկական փառատոնը (անոնս) 
• Newmag-ն ու Yeraz Projects-ը Երազ մատենաշարով ներկայացնում են «Ավելի հանդարտ, ավելի հեշտ և ավելի երջանիկ ծնողավարում» գիրքը (թրեյլեր)
• Մայիսը սկսվում է գրքով․ Կիրակի տեղի կունենա «Երազի գիրք» 5-րդ մանկական փառատոնը (տեսանյութ)
• «Բարի լույսի» տաղավարում հյուրընկալել են «Մթության մեջ տեսնող տղան» վեպի հեղինակին՝ Ռասա Բուգավիչուտե–Պեցեին (տեսանյութ)