Newmag-ն ու Yeraz Projects-ը Երազ մատենաշարով ներկայացնում են Վիոլետ Վաիսի «Բրիոշն ու Տարտինը. Շնիկն ու անհեթեթ բաներ» կոմիքսը (թրեյլեր)

Վիոլետ Վաիսի «Բրիոշն ու Տարտինը. Շնիկն ու անհեթեթ բաներ» կոմիքսը պատմություն է ընկերության մասին, որտեղ ամեն ինչ սկսվում է շատ պարզ մի ճշմարտությունից՝ նմանը նմանին է գտնում։ 

Բրիոշն ու Տարտինը հենց այդպիսի զույգ են․ նրանք ունեն նույն հումորի զգացումը, նույն հետաքրքրասիրությունն ու նույն՝ երբեմն անհեթեթ թվացող հարցերով աշխարհը բացահայտելու ձգտումը։

Նրանց զրույցները հաճախ սկսվում են «լուրջ» թեմաներից՝ օրինակ՝ այծերն ունե՞ն ատամներ, բայց շատ արագ վերածվում են թունդ վեճերի, որտեղ տրամաբանությունը խառնվում է երևակայությանը։ 

Առաջին հայացքից Տարտինը ավելի խելամիտ է թվում, բայց հենց այդ հարաբերական «խելամտությունն» է դառնում Բրիոշի կատակների ու խաղերի թեման։ Նրանք միշտ խառն են. հարցեր, վեճեր, հաշտություն ու նոր խաղեր։

Այս գիրքը պարզապես զվարճալի պատմություն չէ։ Այն ցույց է տալիս, թե ինչպես են երեխաները մտածում՝ ազատ, առանց սահմանների, երբ նույնիսկ ամենաանտրամաբանական հարցը կարող է դառնալ բացահայտման սկիզբ։ Այդ իմաստով կոմիքսային ձևաչափը պատահական չէ։ 

Պատկերներն ու կարճ, դինամիկ երկխոսությունները ստեղծում են այն միջավայրը, որտեղ փոքրիկ ընթերցողը հեշտությամբ է ներգրավում, հետևում է պատմությանը և համադրում տեսածն ու կարդացածը։ 

Մինչև 6 տարեկանների համար նախատեսված գիրքը թեթև պատմությունների շարք է՝ գունեղ ու հումորով։

Վիոլետ Վաիսը ֆրանսիացի նկարազարդող է, սովորել է Բրյուսելի Saint-Luc արվեստի բարձրագույն դպրոցում։ Աշխատում է նաև նորաձևության և դիզայնի ոլորտում՝ գործակցելով տարբեր բրենդների հետ և ստեղծելով փառատոնային միջավայրերի պատկերային լուծումներ։ Միաժամանակ Վաիսը մանկական և պատանեկան կոմիքսների հեղինակ է, և «Բրիոշն ու Տարտինը» նրա երեքմասանոց շարքերից մեկն է։

«Շնիկն ու անհեթեթ բաները» այս շարքի առաջին գիրքն է, որտեղ ձևավորվում է հերոսների աշխարհը՝ իր խաղի կանոններով։ Այստեղ կարևոր չեն ճիշտ պատասխանները։ Կարևոր է հարց տալը, վիճելը և փորձել հասկանալ ամենաանլուրջ թեմաները։

«Բրիոշն ու Տարտինը» ֆրանսերենից հայերեն է թարգմանել Տաթևիկ Մանուկյանը։ Գրքի շնորհանդեսը տեղի կունենա մայիսի 3-ին՝ «Երազի գիրք» մանկական փառատոնի շրջանակում։ Գրքի գլխավոր գործընկեր՝ Yeraz Projects։