Մայիսը սկսվում է գրքով․ Կիրակի տեղի կունենա «Երազի գիրք» 5-րդ մանկական փառատոնը (տեսանյութ)

«Բարի լույսի» տաղավարում ներկա են եղել փառատոնի կազմակերպիչներ, Newmag հրատարակչության «Երազ» մատենաշարի ղեկավար Գոհար Մանուկյանը և Yeraz Projects-ի անդամ Նարե Հարությունյանը։

Գոհար Մանուկյանը հիշեց, թե երբ ու ինչու հրատարակչությունը սկսեց անցկացնել մանկական փառատոներ. «Երեք տարի առաջ որոշեցինք Yeraz Projects-ի հետ հրատարակել մանկական գրքեր ու ստեղծեցինք «Երազ» մատենաշարը։ Ամեն տարի երկու անգամ՝ գարնանն ու աշնանը երեխաների ու նրանց ծնողների հետ նշում ենք մանկական գրքերի ծնունդը։ 

Արդեն 5-րդ անգամ անցկացնում ենք «Երազի գիրք» մանկական փառատոնը։ Այս անգամ միջոցառումը կլինի մայիսին՝ արձակուրդներից առաջ, որպեսզի ծնողներն ու ուսուցիչները չմտահոգվեն, թե ինչ են կարդալու երեխաները, մենք առաջարկում ենք մեր գրքերի ցանկը»։

«Երազի գիրք» փառատոնին բոլոր երեխաներին ու նրանց մեծերին սպասում է գունեղ ու հետաքրքիր շոու, երաժշտություն, ինտերակտիվ խաղեր ու հինգ նոր գիրք։ 

Փառատոնին մասնակցելու համար Լատվիայից Հայաստան է գալու մանկագիր, դրամատուրգ Ռասա Բուգավիչուտե–Պեցեն։ Նրա՝ «Մթության մեջ տեսնող տղան» գիրքը Newmag–ը հրատարակել էր անցյալ տարի։ 

Գոհար Մանուկյանն ասում է, որ որ գիրքը սովորեցնում է ապրումակցել, սիրել մարդկանց, գրքի հերոսը հենց այդպիսի կերպար է. «Ուրախ ենք, որ հեղինակը գրեթե մեկ շաբաթ կլինի Հայաստանում, կհանդիպի ընթերցողների հետ դպրոցներում, ու նաև գրքի մասին քննարկում կլինի փառատոնի ժամանակ»։

Գոհար Մանուկյանը ներկայացրեց փառատոնի հինգ գրքերը։ Դրանցից մեկը ծնողների համար է. «Մի քանի չափանիշներով ենք ընտրում գրքերը, հաշվի ենք առնում միջազգային տենդենցները, մենք ենք կարդում ու ընտրում, հայ երեխաների առանձնահատկություններն ենք հաշվի առնում, մեզ շատ օգնում ենք միջազգային փառատոները, քանի որ տեսնում ենք, թե ամբողջ աշխարհում, ինչ են գրում մանկագիրները, ինչպես են ընտրվում գրքի շապիկից, մինչև բովանդակություն։ 

Ամենակարևոր հրատարկություններից են ծնողավարման գրքերը։ Երբեմն մենք ամբողջ պատասխանատվությունը դնում ենք դպրոցների, մանկապարտեզների վրա, բայց ընտանիքը, ծնողների մոտեցումը շատ կարևոր է։ Ինքս այս փառատոնին ներկայացվող ծնողավարման գրքի խմբագիրն եմ ու շատ եմ հավանել այն. շատ նոր հմտություններ եմ սովորել»։

Yeraz Projects-ի ամենաերիտասարդ անդամ Նարե Հարությունյանն ասում է, որ իրենք մանկական գրքերի հրատարակման նախաձեռնությանը միացան, որովհետև սպառողական աշխարհում, կարևորում են երեխաների կրթությունն ու զարգացումը. 

«Սպառողական դարաշրջանում ենք ապրում ու շատ կարևոր է, որ երեխաները ոչ միայն սպառեն, այլ նաև կարդան, մտածեն ու երևակայեն, դրա համար կարևոր ենք համարում ընթերցանությունը, որը կկերտի նրանց երազանքերը, արժեքները։ Գաջեթները երեխաների կյանքում շատ մեծ տեղ են զբաղեցնում, դրա համար կարևոր է, որ լինեն լավ ու որակյալ գրքեր»։

Նարեն պատմեց իր ընթերցած առաջին գրքերի մասին, որից հետո ընթերցանությունը դարձավ սիրելի ու կարևոր զբաղմունք. «Իմ ամենասիրելի ֆիլմերից մեկի գիրքը կարդացի, քանի որ մայրս ասաց, որ այդ հերոսների կերպարներն ու աշխարհը բացահայտելու համար պետք է գիրքը կարդալ։ 

Այդպես սկսեցի շատ սիրեցի կարդալ։ Սկզբում միայն ֆանտաստիկ ժանրի գրականություն էի կարդում, հիմա շատ եմ սիրում դետեկտիվ գրքեր։ Ես բոլոր երեխաներին խորհուրդ եմ տալիս շատ կարդալ, քանի որ ամեն գրքում նրանք կբացահայտեն նոր աշխարհ, որտեղ հերոսները սպասում են ընթերցողներին»։

ԾԱՆՈԹԱՆԱԼ ՓԱՌԱՏՈՆԻ ԾՐԱԳՐԻՆ

Նարեն բոլոր երեխաներին մոտիվացնելու համար ասում է, որ պետք է ոչ թե պարտադրել գիրք կարդալ, այլ գտնել նրա նախասիրությունները, փորձել պայմանավորվել, գտնել լավագույն մոտեցումը։ «Երազի գիրք» փառատոնը հենց այդպիսի մթնոլորտ ու միջավայր է ստեղծում։

Կարդացեք նաև

• Newmag-ն ու Yeraz Projects-ը Երազ մատենաշարով ներկայացնում են Աննա Ստարոբինեցի «Գազան դետեկտիվ. Գայլի որջը» գիրքը (թրեյլեր)
• Newmag-ն ու Yeraz Projects-ը Երազ մատենաշարով ներկայացնում են Վիոլետ Վաիսի «Բրիոշն ու Տարտինը. Շնիկն ու անհեթեթ բաներ» կոմիքսը (թրեյլեր)
• Newmag-ն ու Yeraz Projects-ը Երազ մատենաշարով ներկայացնում են «Վտվտիկի օրագիրը․ Համբերության վերջին կաթիլը» գիրքը (թրեյլեր)
• Newmag-ն ու Yeraz Projects-ը Երազ մատենաշարով ներկայացնում են Էդմոնդո դե Ամիչիսի «Սիրտը» (թրեյլեր)
• 5-րդ անգամ Newmag-ն ու Yeraz Projects-ը ներկայացնում են «Երազի գիրք» մանկական փառատոնը (անոնս) 
• Newmag-ն ու Yeraz Projects-ը Երազ մատենաշարով ներկայացնում են «Ավելի հանդարտ, ավելի հեշտ և ավելի երջանիկ ծնողավարում» գիրքը (թրեյլեր)