«Տագնապած սերունդը» գրքի հեղինակը ողջունել է հայ ընթերցողներին ու փոխանցել գրքի գլխավոր ուղերձը (տեսանյութ)

Սոցիալական հոգեբան Ջոնաթան Հայթն իր գրքում պատասխանում է կարևոր հարցերի՝ խաղազբաղ մանկությունն ինչպե՞ս աստիճանաբար փոխարինվեց հեռախոսազբաղ մանկությամբ, և երեխաներն այժմ ինչո՞ւ են ավելի շատ ժամանակ անցկացնում սմարթֆոնների հետ։

«Տագնապած սերունդը» գիրքը հրատարակվել է տարբեր լեզուներով, հիմա նաև հայերեն։ Այդ առիթով Newmag-ը զրուցել է գրքի հեղինակի հետ.

«Շատ ուրախ եմ, որ գիրքս լույս է տեսնում Հայաստանում։ Գիտեք, մեր երկրները շատ տարբեր են։ Աշխարհի տարբեր ծայրերում մանկությունը տարբեր է, բայց իմ ճամփորդությունների ընթացքում մի բան եմ նկատել. ամենուր, որտեղ ծնողներ, երեխաներ և սմարթֆոններ կան, մենք բախվում ենք նույն խնդիրներին։ Մեր ընտանիքներում նույն վեճերն են։

Տեսնում ենք, թե ինչպես են կախվածություն առաջացնող հավելվածները խլում մեր երեխաների մանկությունը։ Ամբողջ աշխարհում մայրերն ու հայրերը, բայց առաջին հերթին՝ մայրերը, ասում են՝ «ո՛չ, մենք չենք ուզում նման մանկություն մեր երեխաների համար»։

Ըստ Հայթի, կան շատ անելիքներ, բայց դա հնարավոր է միայն համատեղ ջանքերով։ Պետք է միասին գործել, որպեսզի երեխաներին վերադարձնենք իրական աշխարհում խաղալու հնարավորությունը, որպեսզի նրանք սոսնձված չլինեն հեռախոսների էկրաններին.

«Հուսով եմ՝ «Տագնապած սերունդը» կօգնի հայ ծնողներին ու երեխաներին հասնել դրան։ Գիրքը չի ասում, թե հեռախոսը չարիք է։ Գրքի ուղերձն այն է, որ մանկությունն իրական աշխարհում հրաշալի է, և մենք պարտավոր ենք այն վերադարձնել մեր երեխաներին»։

Հեղինակն իր երախտագիտությունն է հայտնել Newmag հրատարակչությանն ու Սարգիս Իզմիրլյանին, «Իզմիրլյան» հիմնադրամին՝ գիրքը Հայաստան բերելու հարցում աջակցելու և դեռ 2024 թվականին նրան առաջին աջակիցելու համար.

««Իզմիրլյան» հիմնադրամը վերջին երկու տարիներին սատարել է ինձ։ Շատ շնորհակալ եմ նրանց և ձեզ՝ իմ գիրքը ձեր երկրում ներկայացնելու համար։ Թող Հայաստանի երեխաները բարգավաճեն թվային դարաշրջանում»։

Հայթը գրքում առաջարկում է հստակ լուծումներ՝ սմարթֆոններ՝ միայն ավագ դպրոցից, սոցիալական ցանցեր՝ 16 տարեկանից հետո, հեռախոսազերծ դպրոցներ, ազատ խաղ և ինքնուրույն մանկություն։ Սա կոչ է ծնողներին, դպրոցներին, տեխնոլոգիական ընկերություններին ու պետություններին՝ գործել հիմա, քանի դեռ ուշ չէ։

Կարդացեք նաև

• Newmag-ը ներկայացնում է ամենակարևոր համաշխարհային բեսթսելլերներից մեկը. Ջոնաթան Հայթ. «Տագնապած սերունդը» (թրեյլեր)
• Career City Fest-ի շրջանակում տեղի ունեցավ Ջոնաթան Հայթի «Տագնապած սերունդը» գրքի շնորհանդեսը
• Տեղի ունեցավ համաշխարհային բեսթսելլեր համարվող «Տագնապած սերունդը» գրքի հեռուստաշնորհանդեսը (տեսանյութ)