Ինչպե՞ս օժտված երեխա դաստիարակել
October 30, 2018
Ո՞ր երեխաներն են համարվում օժտված
Յուրաքանչյուր ծնողի համար իր երեխան յուրահատուկ է, նրա յուրաքանչյուր հաջողությունը` նույնպես: Սակայն մինչև երեխայի 3 տարեկանը, օժտված լինելու մասին խոսելը վաղ է: 4-5 տարեկանից հետո միայն կարելի է որոշ հատկություններ նկատել. եթե Ձեր երեխան որևէ ոլորտում իր հասակակիցներից ավելի մեծ հաջողությունների է հասնում, անհրաժեշտ է ավելի մեծ ուշադրություն դարձնել երեխայի հաջողություններին:
«Ապագա օլիմպիական չեմպիոնը հիանալի կոորդինացիա է ունենում, օպերային երգիչը` կարողանում է ճիշտ վերարտադրել երաժշտությունը, ինժեներն ու ծրագրավորողն էլ աչքի է ընկնում իրերը քանդել-հավաքելու հանդեպ սիրով»:
Տանը հետևեք փոքրիկի վարքին, հարցուփորձ արեք տատիկներին, մանկապարտեզի դաստիարակներին: Երեխաները ենթագիտակցաբար նախընտրում են զբաղվել նրանով, ինչն իրենց մոտ մյուս երեխաներից ավելի լավ է ստացվում: Հոգեբանության մեջ սա կոչվում է հակում:
Ո՞ր տարիքից և ինչպե՞ս զարգացնել այդ հնարավորությունները
Տաղանդը երկար ժամանակ կարող է «քնած» մնալ, հատկապես երբ երեխաները դրանք արտահայտելու հնարավորություն չեն ունենում: Երեխան, որը երբեք ջրաներկով չի նկարել, դժվար, թե նկարիչ դառնա: Այդ պատճառով ձեր հիմնական խնդիրը ոչ թե տաղանդը զարգացնելն է, այլ` երեխայի համար բազմազան հնարավորություններ ստեղծելը:
Ճամփորդեք, պատկերասրահներ ու տարբեր խմբակներ այցելեք, բայց մի պնդեք, որ երեխան պարտադիր երաժշտությամբ զբաղվի, եթե նկատում եք, որ մի քանի դասաժամերից հետ երեխայի մոտ հետաքրքրություն այլև չկա: Եթե երեխայի աչքերը փայլում են, ուրեմն` ճիշտ ուղու վրա եք: Բայց նույնիսկ այս դեպքում երեխային չի կարելի ծանրաբեռնել: Երեխայի նյարդային համակարգը տեղեկության մեծ ծավալին պատրաստված չէ ու չափազանց մեծ ծավալն ու ծանրաբեռնվածությունը կարող է հակառակ էֆեկտն ունենալ: Երեխան շատ շուտ կկորցնի հետաքրքրությունը նույնիսկ ամենասիրելի զբաղմունքի հանդեպ:
Լավ ուսուցչի ընտրությունը նույնպես շատ կարևոր է: Հիշեք` տաղանդը պետք է ծառայի երեխային, ոչ թե` հակառակը: Անհրաժեշտ է համատեղել երեխայի տաղանդը զարգացնելու վարժանքները հետաքրքիր ժամանցի ու լավ տրամադրության հետ:
Ասում են` հաջողության հասնելու գրավականը քրտնաջան աշխատանքն է, իսկ տաղանդը հաջողության միայն փոքր մասն է կազմում: Փոքր քայլերով առաջ շարժվեք, կարևորը` փոքր քայլերը լինեն հետևողական աշխատանքի արդյունքը, դրանք շատ արագ մեծ հաջողության կհանգեցնեն:
Կարդացեք նաև.
Ինչո՞ւ խելախոսները չեն վնասում ձեր երեխաներին
Ինչպես կառավարել օրը. խորհուրդ՝ աշխատող ծնողներին, որոնք ունեն դպրոցահասակ երեխաներ
Փխրուն սերունդ. ինչպե՞ս են ծնողներն իրենց երեխաներին դարձնում անկենսունակ ու դժբախտ
Ի՞նչ է անհրաժեշտ իմանալ ծնողներին օժտված երեխայի ուսուցման մասին
Օժտված երեխան գրեթե միշտ սովորական սցենարի շրջանակում չի տեղավորվում, ծնողներն առաջին հերթին պետք է ուշադրություն դարձնեն երեխայի վարքին ու հնարավորինս շատ հոգատարություն ցուցաբերեն, աջակցեն, սատարեն երեխային:
Պետք է պատրաստ լինեք դպրոցում ուսման հետ անխուսափելի խնդիրներին բախվելուն. որպես կանոն դպրոցական ծրագիրը «վունդերքինդի» համար չափազանց «նեղ ու ճնշող» է:
Հիշեք, որ վատ գնահատականի համար բարկանալ ու երեխային պատժել չի կարելի: Ավելի լավ է փորձեք օգնել նրան անհասկանալի թեմաներն ուսումնասիրելու և հասկանալու հարցում: Մոլբերտի մոտ ժամեր անցկացնող երեխայի համար մաթեմատիկայի կամ երաժշտության առարկայից վատ գնահատական այդքան էլ մեծ նշանակություն չունեն:
Ո՞ր սխալներից պետք է խուսափել
Տաղանդն ու սիրելի զբաղմունքն, իհարկե, կարևոր են, բայց չպետք է թույլ տաք, որ այն վերածվի երեխայի կյանքի միակ և անփոխարինելի մասնիկի:
Հիշեք` նույնիսկ ամենաօժտված ու տաղանդավոր երեխան, ընդամենը փոքրիկ երեխա է, որի համար զբոսանքները, հանգիստը, չարաճճիությունն ուղղակի անհրաժեշտություն են:
Եվ մեկ կարևոր խորհուրդ ծնողներին
Ձեր երեխաների տաղանդը հարգեք, բայց ոչ մի դեպքում հասակակիցներից մի առանձնացրեց, այլապես գոռոզ եսասերի կմեծացնեք:
Հանճարների դաստիարակության գործում ձեզ հաջողություն ենք մաղթում:
Հետևեք newmag-ին Telegram-ում և Instagram-ում