ՌեԱնիմանիա. Մի շնչով նայելու ֆիլմեր

ՌեԱնիմանիա. Մի շնչով նայելու ֆիլմեր

newmag-ի խնդրանքով կինոքննադատ Դիանա Մարտիրոսյանն առանձնացրել է Երևանում անցկացված անիմացիոն փառատոնի լավագույն 7 ֆիլմերը:

image-00«Հայկական թղթերը», Ռեժիսոր` Օռնելա Մաչիա, Իտալիա

Այս ռեժիսորը չի վախենում էքսպերիմենտներից, և նրա անիմացիոն ոճը տարաբնույթ է. պլաստիլինե մարդուկներից ու ավազից մինչև հայկական զարդանախշեր և մինիմալիզմ: Ռեժիսորը ահռելի աշխատանք է արել. նա օրերով նկարահանել ու ձայնագրել է վերնիսաժի առևտրականներին և ստացել է ֆոտո սլայդշոու: Այն կամաց-կամաց վերածվում է պատմական էքսկուրսի, որը եվրոպացու հայացքով է՝ նետված հայկական մշակույթին: Հայ տղամարդկանց խիստ հայացքները, սովետական ատրիբուտիկայում լվացվող մրգերը և մի փոքր փարաջանովյան շունչը դուր կգան էքսպերիմենալ և էկլեկտիկ ժանր սիրող սինեֆիլներին:

 

 

 

 

1-prophet_poster_exclusive«Մարգարե», Ռեժիսոր` Ռոջեր Ալերս , ԱՄՆ, Ֆրանսիա, Կանադա, Լիբանան, Քաթար

Ֆիլմը բեսթսելերի էկրանավորում է, նախագծում էլ ներգրավված են հոլիվուդյան աստղեր Սալմա Հայեքը և Լիամ Նիսոնը, սակայն սա դիսնեյ ֆիլմերի և փառատոնային կինոյի միքս է: Գերբնական կարողություններ ունեցող գլխավոր հերոս, սոցիալ-քաղաքական ենթատեքստ, արևել յան կինոյին բնորոշ փիլիսոփայական երկխոսություն բնության հետ: Ֆիլմը կարելի է դիտել երեխաների հետ. այն չափազանց գունավոր է, որպեսզի չձանձրացնի, և հաջող է փոքրաբյուջե անիմացիոն դրամայի համար: Սակայն դիսնեյյան ակնկալիք ունենալ պետք չէ: Սա ավելի շուտ արևել յան տրամադրություն ունեցող ֆիլմ է, չնայած Սալմա Հայեքը համպրոդյուսեր է:

 

 

 

Ernie-Tuxedo-Teeshirt«Էրնի Բիսքուիթ», Ռեժիսոր` Ադամ Էլիոթ , Ավստրալիա

Ավստրալիական անիմացիայի կնքահայր, սև ու սպիտակ տրագիկոմեդիայի վարպետ ու մենության պոետ Ադամ Էլիոթը կինոմաններին հայտնի է որպես լեգենդար «Մերին և Մաքսը» ֆիլմի հեղինակ: Ռեժիսորի նոր կարճամետրաժը կրկին այդ ժանրում է, ոճում և տրամադրության մեջ: Կարծես Էլիոթից լավ ոչ ոք չի կարող պատմել միայնակ մարդկանց և նրանց բարդույթների մասին: Էլիոթի ֆիլմերը հաճախ համեմատում են համաշխարհային այն ֆիլմերի հետ, որոնց կենտրոնում երազկոտ ու իր սեփական աշխարհում ապրող ոչ բոլորի պես մեկն է, ինչպես «Ամելին» կամ «Պարոն Ոչ ոքը»: Չայկովսկու ուղեկցությամբ հանդիսատեսին սպասում են բազում էմոցիոնալ պահեր՝ ընկճախտի եզրին կանգնած տարօրինակ, բայց համակրելի հերոսների հետ:

 

 

image-2«Լիթլը ձկան խանութից», Ռեժիսոր` Ժան Բալեժ, Չեխիա, Սլովակիա, Գերմանիա

Թիմբարթոնական երանգներ ունեցող եվրոպական պատմության հիմքում դասական սյուժե է՝ «Մի թագավոր 3 որդի ուներ» չհնացող կոնցեպտով: Մեխն այն է, որ թագավորը ստիպված լքել է իր ծովային աշխարհն ու ընտանիքի հետ տեղափոխվել է մի փոքր վեր՝ մարդկանց մոտ: Երեք արքայադուստրերից այս պատմության մեջ ամենակարևորը, իհարկե, կրտսերն է՝ Լիթլը, և նրա սիրավեպը: Անդերսենի հայտնի հեքիաթի պես՝ նույնպես ջրային էակի սերը հոմո սափիենսին կարող է պարզապես կործանել: Մռայլ մթնոլորտը և անիմացիոն ոճը դուր կգան տխուր հեքիաթների սիրահարներին՝ հիշեցնելով դասական դարձած բազում պատմություններ:

 

 

 

Sovy-Rudickaya«Նուրբ բուերը», անիմատորներ տարբեր երկրներից, Հայաստանից՝ Նաիրա Մուրադյան, Ռուսաստան

«Les Pires» ֆրանսիական խմբի երգ-կատակը՝ բուերի մասին, մի քանի անիմատորների ոգեշնչել էր 2005-ին, և ինը տարի անց ծագեց կարճամետրաժ ֆանտասմագորիա ստեղծելու գաղափարը: Ռուսական տրամադրություն ունեցող կատակային տեքստը քաոսային անիմացիայի զուգընկերությամբ տևում է շատ կարճ, սակայն հետաքրքիր, էքսպերիմենտալ, անսյուժե ճանապարհորդություն է նրանց համար, ովքեր սիրում են էկլեկտիկա: Գրեթե սյուրռեալիստական կերպարները, դրանց հայտնվելն ու կորչելը կարող են հիշեցնել Դալիի ու Բունյուելի «Անդալուզյան շունը», սակայն այստեղ բուեր են՝ ամենատարբեր բուեր, որոնք պարզապես ժպիտ առաջացնելու համար են:

 

 

2-the-wanted-18«The Wanted 18», Ռեժիսոր` Ամեր Շոմալի, Փոլ Քովն, Կանադա, Պաղեստին

Սա այն բացառիկ դեպքն է, որ պաղեստինյան 18 կովերի մասին խոսում էր ԱՄՆ հեռուստատեսությունը: Ցանկացած փառատոն սիրում է գեղարվեստական ստեղծագործության միջոցով քաղաքական խնդիր բարձրացնել, և «ՌեԱնիմանիայում» նմանատիպ ֆիլմերը քիչ չեն: Պատմությունը Բեյթ Սահուրայի պաղեստինցիների և առաջին ինտիֆադայի մասին է։ Սև ու սպիտակ անիմացիան միքսված է դոկումենտալ հարցազրույցների և արխիվային կադրերի հետ, ինչն էլ աշխատանքը սադրիչ է դարձնում: Յուրահատուկ մոտեցման և օրիգինալ գաղափարի շնորհիվ ֆիլմն արգելվեց որոշ հանրային դիտումների ժամանակ և տարածում գտավ համացանցում: Սա ծրագրի ամենաքաղաքական և սուր աշխատանքներից է։

 

 

 

6-mune«Մունե», Ռեժիսոր` Ալեքսանդր Հեբոյան, Բենո Ֆիլիպոն, Ֆրանսիա

Փառատոնի բացման ֆիլմը հավանաբար ամենաշատն է դիտվելու, ուստի տեղ է գտել ցուցակի վերջում: «Մունեն» փառատոնի ամենաընտանեկան ֆիլմն է և համապատասխանում է մեյնսթրիմի բոլոր չափանիշներին: Կարող է հիշեցնել հոլիվուդյան դասական ոճը: Ֆրանսահայ ռեժիսոր Հեբոյանը վաստակավոր անիմատոր է և իր մասնակցությունն է ունեցել «Քունգ ֆու պանդա» և «Հրեշներն ընդդեմ այլմոլորակայինների» ֆիլմերում։ Ռեժիսորի այս ֆիլմը ֆավնի մասին է, որը դարձել է լուսնի խնամակալ։ Ֆենթեզի ժանրի ֆիլմում ներգրավված է «1+1» կատակերգության աստղ Օմար Սին. նրա ձայնով է խոսելու գլխավոր հերոսներից մեկը: Ֆիլմի տեմպն ու ռիթմը, կատակներն ու զվարճալի մթնոլորտը տրամադրում են ընտանեկան կինոդիտման:

 

 

 

Գրել կարծիք