«Նոր գիրք»-34/25. Խանջյան, Բրուքներ, Լըբլան, Մալիե

«Արմենպրես» լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: 

Այս շաբաթ «Արմենպրես»-ն առանձնացրել է 2025 թվականին հրատարակված և հանրության դատին հանձնված տարբեր հրատարակչությունների ուշագրավ գրքեր՝ տարբեր խորագրերի ներքո:

Հայ հեղինակ․ Գուրգեն Խանջյան, «Ինչկաչկա»

Գուրգեն Խանջյանի «Ինչկաչկա» վեպ-էսսեն ինքնակենսագրական պատում է՝ նրա արձակին բնորոշ անկեղծությամբ, հոգեբանական նուրբ սուզումներով, որոնք միտված են վերարթնացնելու անցյալի, թվում է, թե անհետ կորած դրվագները։ Խմբագիր՝ Արքմենիկ Նիկողոսյան։ Գիրքը լույս է ընծայել «Անտարես»-ը:

Թարգմանական գրականություն․ Պասկալ Բրուքներ, «Իմ փոքրիկ ամուսինը»

Ժամանակակից հեքիաթ՝ մեծերի մասին ու մեծերի համար։ Այս գիրքը սերունդների միջև հավերժական ու ծանր պայքարի մասին է, կյանքի ու մահվան փիլիսոփայական մեկնաբանություն է փոքրիկ տղամարդու ողբերգական ճակատագրի միջոցով։  Կարճահասակ Լեոնն իր ամեն երեխայի ծնվելու հետո կարճանում է 39 սմ։ Չորս երեխաների ծնունդը նրան վերածում է մատնաչափիկ ամուսնու՝ իր փարթամ ու բարձրահասակ կնոջ կողքին։ Պասկալ Բրուքները գեղարվեստական բացառիկ վարպետությամբ բացահայտում է փոքրիկ մարդու տվայտանքը և ի ցույց դնում մարդկանց հարաբերությունների բազմաշերտ հակասականությունը: Երեխայի ծնվելուց հետո ընտանիքն ինչպես է ձևափոխվում, տղամարդու դերն ինչո՞ւ է հետզհետե նվազում ժամանակակից հասարակության մեջ, և ինչպես են զավակները «կուլ» տալիս ու ի վերջո «սպանում» իրենց ծնողներին։ Պասկալ Բրուքների «Իմ փոքրիկ ամուսինը» վեպը փիլիսոփայական առակ է, փոխաբերական պատմություն՝ էկզիստենցիալ պարադոքսների, հայրերի ու որդիների բախման և տղամարդու դերի մասին։ Թարգմանիչ՝ Գոհար Ամիրբեկյան։ Գիրքը լույս է ընծայել Newmag-ը։ 

Մանկապատանեկան գրականություն․ Մորիս Լըբլան, Վենսան Մալիե, «Բարեկիրթ գող Արսեն Լյուպենը»

Հրաշալի նկարազարդումներով այս գիրքը կազմված է ինը ուշագրավ, փոխկապակցված պատմություններից, որոնց օգնությամբ ընթերցողն անցնում է անասելի արկածներով և հայտնվում 20-րդ դարասկզբի ֆրանսիական հասարակության միջավայրում։ Արսեն Լյուպենի ոճը ճանաչելի է, քանի որ նա միշտ թաքցնում է իր հետքերը և ջնջում ինքնությունը, նրա յուրաքանչյուր հանցագործություն ուշադիր մշակված հնարք է։ Վեպի վերջում նա առճակատվում է հայտնի խուզարկու Շեռլոք Հոլմսի հետ, որի անունը Քոնան Դոյլի բողոքներից հետո վերափոխվել է Հեռլոք Շոլմսի։ Թարգմանիչ՝ Թագուհի Բլբուլյան։ Գիրքը լույս է ընծայել «Զանգակ»-ը:

«Նոր գիրք»-ը ներկայացրեց Ռոզա Գրիգորյանը