Ազնավուրի երգերը՝ հայերեն. Newmag Winter Fest-ին կհնչի մեծ շանսոնյեի հայաֆիկացված 5-րդ երգը

ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: Ֆրանսիական նրբագեղությամբ, բայց հայկական հնչեղությամբ ու շնչով. Ազնավուրի երգերը  Newmag-ը շարունակում է թարգմանել հայերեն ու ներկայացնել նորովի՝ գրական ու երաժշտական։  

«Արմենպրես»-ի հաղորդմամբ՝ հինգերորդ երգի պրեմիերան տեղի կունենա Newmag գրքի ձմեռային փառատոնի շրջանակում։

«Վենետիկն է տխրում» - Que C'est Triste Venise 

Աշխարհահռչակ շանսոնյե Շառլ Ազնավուրի «Վենետիկն է տխուր» երգը Newmag հրատարակչության նախաձեռնությամբ թարգմանվել է հայերեն։ Սա Newmag-ի թարգմանությամբ Ազնավուրի թվով 5-րդ երգն է։ Երգը կատարում է Անդրեն, տեսահոլովակի պրեմիերան տեղի կունենա փետրվարի 18-ին Newmag Winter Fest 2023 գրքի փառատոնի ժամանակ։

Ազնավուրի ամենամեղեդային, սիրառատ ու տպավորիչ գործերից մեկի տեսահոլովակի նկարահանումները կատարվել են հենց Վենետիկում:

Rest- «Մնա»

Ազնավուրյան արվեստի հայաֆիկացումը Newmag հրատարակչությունը նախաձեռնել էր դեռևս 2021 թվականին՝ առաջին երգը ներկայացնելով Ազնավուրի հայերեն հրատարակված 5-րդ գրքի «Հայրս՝ այդ հսկան»  շնորհանդեսի ժամանակ։ Rest, հայերեն՝ «Մնա» ստեղծագործությունը կատարել է  Էրիկ Կարապետյանը:

Emmenez-moi-«Տարեք ինձ»

«Տարեք ինձ այդ ափերը հեռու, տարեք այնտեղ, ուր ամառ է արև, արևի տակ այս կյանքի բեռը միգուցե կլինի մի քիչ թեթև». այսպես է հնչում Ազնավուրի Emmenez-moi երգի հայերեն թարգմանված տարբերակը, որը կոչվում է «Տարեք ինձ»։ 2021 թվականի հոկտեմբերին ներկայացված երգը կատարում է Շուշան Պետրոսյանը։ Օրիգինալ երգի բառերի և երաժշտության հեղինակը շանսոնյեն է, թարգմանությունը կատարել է Պերճ Թյուրաբյանը: «Տարեք ինձ» տեսահոլովակի ռեժիսորը Հարութ Շատյանն է, նկարահանումները կատարվել են Սևանա լճում: Newmag-ը  երգի պրեմիերան նախաձեռնել էր Ազնավուրի La Bohème. «Անցած օրեր» գրքի շնորհանդեսի ժամանակ:

Qui` «Ով»

Շառլ Ազնավուրի՝ 20 տարվա տարիքային տարբերությամբ սիրո մասին պատմող Qui` («Ով»)  երգի հայերեն տարբերակը ևս հանրայնացվեց Newmag-ի թարգմանությամբ։ Երգը թարգմանել է Սամվել Գասպարյանը,  կատարում է Սոֆի Մխեյանը, երաժշտական պրոդյուսերը՝ Մարտին Միրզոյանն է: 

«Մեռնել սիրելով»- Mourir d'aimer

Երգ, որի ոգեշնչումը ողբերգական սիրո իրական պատմություն է։

1969-ին Ֆրանսիայում 39-ամյա ուսուցչուհի Գաբրիելա Ռուսիեյը սիրահարվել էր իր անչափահաս աշակերտին: Ծնողները կնոջը դատի էին տվել, բայց սիրահարված կինը, չսպասելով դատավճռին, ինքնասպան էր եղել։ Կինը մեռնում է սիրելով, իսկ Ազնավուրն այս հուզիչ սիրո պատմությունը վերածում է երգի՝ այն նկարագրելով իր ուրույն ոճով, մեղեդային ու նուրբ հնչեղությամբ։

Բանաստեղծության թարգմանության հեղինակը Սամվել Գասպարյանն է: Ազնավուրի «Մեռնել սիրելով» երգը կատարել է Սյուզաննա Մելքոնյանը:

Newmag Winter Fest 2023-ը տեղի կունենա փետրվարի 18-ին «Կոնգրես» հյուրանոցում։ Փառատոնի շրջանակում նախատեսվում են շնորհանդեսներ, տարբեր հանդիպումներ ու պանելային քննարկումներ, համագործակցության հուշագրերի ստորագրում և գրքերի վաճառք մինչև 40% տոկոս զեղչով։