Newmag-ը հրատարակել է Խորհրդային միության ամենաազդեցիկ կոմպոզիտորի մասին առաջին անգլալեզու գիտական ուսումնասիրությունը (թրեյլեր)

«Առնո Բաբաջանյան. Խորհրդային շրջանի հայկական ռիթմը» գրքի հեղինակ Նունե Մելիքյանը ճանաչված ջութակահար է, գիտնական և մանկավարժ: Նա դարձել է Մոնրեալի համալսարանի մագիստրոսական ծրագրի ամենաերիտասարդ ուսանողը: Առաջին հայուհի ջութակահարն է, որը ելույթ է ունեցել Քարնեգի Հոլի Սթերն սրահում։

ՄաքԳիլի համալսարանում նրա՝ Առնո Բաբաջանյանին նվիրված ատենախոսությունն առաջին համապարփակ ուսումնասիրությունն է անգլերենով: Ջութակահար և մանկավարժ Նունե Մելիքյանի «Առնո Բաբաջանյան. Խորհրդային շրջանի հայկական ռիթմը» գիրքը լույս է սփռում հայ մեծանուն կոմպոզիտորի կյանքի և ստեղծագործական ուղու վրա՝ առաջին անգամ ներկայացնելով նրա ստեղծագործական ուղին անգլերեն:

Գիրքը հիմնված է արխիվային նյութերի, անձնական նամակների և մանրակրկիտ վերլուծությունների վրա: 

Հետազոտությունը փորձ է բացահայտելու, թե ինչու տաղանդավոր կոմպոզիտորը չստացավ իր ժամանակաշրջանում արևմտյան աշխարհի լիարժեք գնահատականը:

Առնո Բաբաջանյանի ստեղծագործությունները՝ հյուսված հայկական ավանդական մեղեդիներով, ժամանակակից ջազի ռիթմերով և դասական երաժշտությամբ, ներկայացնում են ուրույն մի աշխարհ: Նրա երաժշտությունը խորհրդանշում է մի ամբողջ դարաշրջան։

Նունե Մելիքյանի աշխատանքը լուսաբանում է Բաբաջանյանի կյանքի այն փուլերը, որոնք մինչ այժմ գրեթե ուսումնասիրված չէին: Այս գիրքը հրավեր է՝ ճանաչելու և վերաիմաստավորելու մեծ հայ կոմպոզիտորի կյանքն ու արվեստը՝ նոր, խորը և բազմաշերտ հայացքով:

Հատուկ գրքի հրատարակության համար Հայաստան է ժամանում հեղինակը և դեկտեմբերի 5-ին, 18:00 «Զանգակ» գրատանը տեղի կունենա գիտական ուսումնասիրության շնորհանդեսը։ Մուտքն ազատ է։

Գրքարշավի շրջանակում, դեկտեմբերի 4-ին Արմենիա Հ/Ը «Բարի լույս» ծրագրում տեղի կունենա «Առնո Բաբաջանյան. Խորհրդային շրջանի հայկական ռիթմը» գրքի հեռուստաշնորհանդեսը։ Գիտական ուսումնասիրությունը հեղինակը կներկայացնի նաև մասնագիտական ու երաժշտական կրթական հաստատություններում։