Ի՞նչ կապ ունի ՀԲԸՄ-ն Tumo-ի հետ

Ի՞նչ կապ ունի ՀԲԸՄ-ն Tumo-ի հետ

ՀԲԸՄ-ն շարունակում է իր նպաստը բերել Հայաստանի զարգացմանը. երկու «Թումո». մեկը՝ Գյումրիում, մյուսը՝ Ստեփանակերտում և երկու կենտրոն. մեկը՝ երիտասարդական, մյուսը՝ բժշկական:

Երկու «Թումո». մեկը՝ Գյումրիում, մյուսը՝ Ստեփանակերտում: Երկու կենտրոն. մեկը՝ երիտասարդական, մյուսը՝ բժշկական: Ու մի համաժողով՝ Հայաստանի էլեկտրոնային կառավարման խնդրի արդյունավետ քննարկումներով. ՀԲԸՄ-ն շարունակում է իր նպաստը բերել երկրի բազմակողմ զարգացմանը:

14-ամյա Գևորգը «աշխարհը թնդացնող երաժիշտ և DJ» է դառնալու.13-ամյա Անգինը՝ «նախագահ… չէ, բայց ֆրանսերենի լեզվաբան և թարգմանիչ… Լավ, դե՛, ուրեմն Ֆրանսիայի նախագահ»: Մինչև այդ պահը 14-ամյա Նարեն Երևանի «Թումոյում» նախանձով էր շրջել: 2015-ի մայիսի 25-ին «ԹՈՒՄՈ x ՀԲԸՄ» Գյումրիի նորաբաց կենտրոնի առաջին հպարտ այցելուներից էր. «Սա մեր բոլորի երազանքի իրականացումն է»,– ասում է նա: Մոտ հինգ տասնյակ գյումրեցի հասակակիցների հետ Նարեն նույնպես «ԹՈՒՄՈ x ՀԲԸՄ» Գյումրիի կենտրոն մտավ համարձակ երազանքներով: Այստեղ բոլորին սպասում են այդ երազանքներն իրագործելու ռեալ հնարավորությունները:

AGBU-1

ԹՈՒՄՈ-ական ստեղծարար ու նորագույն կրթությունը գյումրեցի երեխաներինը դարձնելու նախաձեռնությունը նախագահ Սերժ Սարգսյանինն էր: Սիմոնյան կրթական հիմնադրամն ու Հայկական բարեգործական ընդհանուր միությունը միասին կյանքի կոչեցին այդ նախագիծը: «Շանթ» հեռուստաընկերության անցկացրած մեկնարկային դրամահավաքով ստացված գումարը նշանակալիորեն բազմապատկեց ՀԲԸՄ-ն: «ԹՈՒՄՈ x ՀԲԸՄ» Գյումրիի կենտրոնն այդպես դարձավ իրականություն: Կենտրոնը ժամանակավորապես տեղակայված է Գյումրիի տեխնոպարկի շենքում, որն ունի 1000 ուսանող ընդունելու հնարավորություն: Նախատեսվում է կենտրոնը առաջիկայում տեղափոխել Գյումրիի առաջին թատրոնի շենք:

Կնունյանցների 2, Ստեփանակերտ, ԼՂՀ. սա է հիմա Դիանայի ապագայի կերտման հրաշավայրի հասցեն. ««ԹՈՒՄՈ»-ի մասին միայն լսել էի, տեսել համացանցում: Անգամ ամենահամարձակ երազում չէի կարող պատկերացնել, որ երբևէ կդառնամ «ԹՈՒՄՈ»-ի սան»,- ասում է 13-ամյա աղջնակը, որի երազանքը իրականություն դարձավ ԼՂՀ Անկախության օրը:

Սեպտեմբերի 2-ին բացվեց «ԹՈՒՄՈ x ՀԲԸՄ» Ստեփանակերտի կենտրոնը: ԼՂՀ Կառավարության նախաձեռնությամբ ու «ԹՈՒՄՈ»-ի և ՀԲԸՄ գործակցությամբ կենտրոնը հայկական 2-րդ հանրապետությունում հիմնվեց ուժեղ, առաջադեմ, ինքնավստահ մարդիկ կրթելու առաքելությամբ: ՀԲԸՄ-ն իր վրա է վերցրել կենտրոնի տեխնիկական զինման ու կահավորման, տարեկան գործառնական ծախսերը. տարածքը նորոգել է «Ղարաբաղ Տելեկոմը»: Հոկտեմբերի 5-ից Ստեփանակերտում սկսվել է «ԹՈՒՄՈ x ՀԲԸՄ»-ի նոր անդամների ուսումնական և ինքնաբացահայտման ճանապարհորդությունը:

«ԹՈՒՄՈ x ՀԲԸՄ» Ստեփանակերտի կենտրոնում կարող են անվճար ժամանակակից կրթություն ստանալ 12-18 տարեկան արցախցի 1000 երեխաներ անիմացիայի, կայքերի մշակման, խաղերի և ֆիլմերի ստեղծման ոլորտներում, ձեռք բերել նաև լրացուցիչ հմտություններ, սովորել ծրագրավորում, լուսանկարչություն, 3D մոդելավորում, երաժշտություն:

Հայաստանի և Սփյուռքի երիտասարդների հանդիպման վայրն այսուհետև հստակ հասցե ունի` Երևան, Զաքարիա Քանաքեռցու 1: ՀԲԸՄ «Վահե Կարապետյան» կենտրոնը հենց այստեղ է գտնվում: Ազգային բարերար ու ամերիկահայ գործարար Վահե Կարապետյանը 5500 քմ տարածք զբաղեցնող շենքը 2014-ին նվիրաբերեց Հայկական բարեգործական ընդհանուր միությանը: Նորաբաց կենտրոնն էլ ՀԲԸՄ-ն անվանակոչեց բարերարի անունով. «Դա հպարտություն է ինձ համար: Նվիրաբերելով այդ շենքը՝ հայրենիքում ես կարողացա իրականացնել մի ծրագիր, որն անպայման օգտակար կլինի երիտասարդ սերունդներին»,- ասում է բարերարը:

Agbu-2

Նա Հայաստանի, Արցախի ու Սփյուռքի հայ երիտասարդությունը համարում է ամենից արժեքավոր կապիտալը: ՀԲԸՄ նախագահ Պերճ Սեդրակյանը վստահեցնում է, որ հենց այդ առաքելությամբ էլ պիտի գործի ՀԲԸՄ «Վահե Կարապետյան» կենտրոնը. «Կենտրոնը պիտի ծառայե հատկապես Սփյուռքի և հայրենիքի երիտասարդներու միջև փոխհարաբերություններու ամրապնդման: Բուն գաղափարը Սփյուռքի զանազան գաղութներեն համալսարանական տարիքի երիտասարդներ հայրենիք բերելն է, անոնց հայրենիքի կյանքին ծանոթացնելը և հայաստանցի երիտասարդներու հետ շփում ապահովելը: Այդ նպատակով այստեղ պիտի կազմակերպվին կրթական, մշակութային և հասարակական միջոցառումներ»,- վստահեցնում է ՀԲԸՄ նախագահը:

Վահե Կարապետյանը ՀԲԸՄ անդամ չէ, բայց մշտապես հետևել է հայկական ամենամեծ և հին կազմակերպության գործունեությանը: Երբ եկավ բարեգործության ժամանակը, Վահե Կարապետյանը հիշեց ՀԲԸՄ հայաստանակենտրոն ու հայանպաստ գործունեության մասին. «Այս շենքը կենտրոն դարձնելու նպատակով չսկսեցինք կառուցել: Շատ բծախնդիր աշխատեցինք, իսկ հետո, երբ ամեն ինչ պատրաստ էր, մտածեցինք` վաճառելն ափսոս է, վարձով տալն ափսոս է, օգտագործելն ափսոս է: Եվ մտածեցի, որ միայն և միայն կարող եմ տալ այն կազմակերպությանը, որը միշտ մտածել է մեր ազգի միասնականության մասին»,- ասում է Կարապետյանը: Բարերարության առիթով Վահե Կարապետյանը ՀԲԸՄ նախագահից ստացավ ՀԲԸՄ բարերար անդամի ոսկե մեդալ և վկայական: Կենտրոնում արդեն գործում է «Սիրիահայերի հիմնախնդիրները համակարգող կենտրոն» հասարակական կազմակերպությունը:

AGBU-3

Գլխուղեղի, ողնուղեղի, սրտի պաթոլոգիաների, որովայնի խոռոչի և փոքր կոնքի, ոսկրային համակարգի ճշգրիտ ախտորոշումն այլևս երազանք չէ հայ ռադիոլոգների համար: 1400000 դոլար արժողությամբ «General Electric» ընկերության «Brivo MR 355 1,5T» նորագույն գերհզոր մագնիսառեզոնանսային տոմոգրաֆը Հերացու անվան առաջին համալսարանական հիվանդանոցին են նվիրաբերել ՀԲԸՄ հոգաբարձուների խորհրդի անդամ Նազար Նազարյանը, նրա տիկինը` Արտեմիս Նազարյանը, և նրանց որդին` ամերիկահայ առաջատար ռադիոլոգ, ԱՄՆ «Թոմաս Ջեֆերսոն» ուլտրաձայնային և ռադիոլոգիայի հետազոտական ինստիտուտի ղեկավար և ՀԲԸՄ Կենտրոնական վարչության անդամ Լևոն Նազարյանը: Նորագույն այդ սարքով հնարավոր է օրգանը տեսնել միկրոսկոպիկ խորությամբ և կատարել խորը ախտորոշում: ՀԲԸՄ անդամ Նազարյան ընտանիքի և առաջին համալսարանական հիվանդանոցի գործակցությունը տասնամյա պատմություն ունի: ՀԲԸՄ նախագահ Պերճ Սեդրակյանը Հայաստանի բժշկական ոլորտում ներդրումների բաց տեղեր է տեսնում. «Մենք վստահ ենք, որ ավելի առաջ պիտի երթանք: Հաջողություններ պիտի ունենանք, և հայերը այս երկրին մեջ պիտի ունենան պետք եղած բժշկական սպասարկումը և ստիպված պիտի չըլլան դուրս երթալ բուժվելու համար»:

Դեռ 2000-ական թվականներից գործում է ՀԲԸՄ օժանդակությամբ հիմնված ուլտրաձայնային կենտրոնը: 2010 թվականին այդ հիվանդանոցում բացվել էր «Լևոն և Քլոտիա Նազարեան» ռադիոլոգիայի կենտրոնը: Մագնիսառեզոնանսային տոմոգրաֆիայի բաժանմունքը ՀԲԸՄ և առաջին համալսարանական հիվանդանոցի երկարամյա համագործակցության արդյունքն է:

Յոթ գումարած երեք. 10 միլիոն հայության ներուժի համատեղում ու արդյունավետ կառավարում: Հայաստանում ԵՄ պատվիրակության, Էստոնիայի դեսպանության և «Թումո» ստեղծարար տեխնոլոգիաների կենտրոնի հետ Հայկական բարեգործական ընդհանուր միությունը Երևանի իր նորակառույց շենքի դահլիճում համախմբել էր մասնագետների ու պաշտոնյաների` քննարկելու Հայաստանի «էլեկտրոնային կառավարման» ապագան: ՀԲԸՄ Կենտրոնական վարչության անդամ Վազգեն Յակուբյանը Հայաստանում էլեկտրոնային կառավարման ոլորտի կայացման հարցում անհրաժեշտություն է համարում վստահության մթնոլորտի ստեղծումը և Սփյուռքի առավել ակտիվ ներգրավվածութունն այդ գործընթացում. «Այս պլատֆորմի հնարավորությունները չափազանց մեծ են, և մենք պետք է մտածենք, թե ինչպես կարող ենք օգտագործել այդ հնարավորությունները, համախմբել և համակարգել մեր ռեսուրսները թե՛ Հայաստանում և թե՛ Սփյուռքում` հզորացնելու համար մեր ազգը, պլատֆորմի հնարավորությունները հասանելի դարձնելու Սփյուռքի համար, որպեսզի Սփյուռքն էլ կարողանա օգտվել և միևնույն ժամանակ օգնել Հայաստանին»:

agbu-4

Էլեկտրոնային փաստաթղթերի կառավարում, հարկային փաստաթղթաշրջանառության էլեկտրոնայնացում, ավտոմեքենաների գրանցում մեկ պատուհանով. էլեկտրոնային կառավարման համակարգը Հայաստանի Կառավարությունը օգտագործում է 2012-ից: Այն թափանցիկ է ու ժողովրդավարության առաջին ցուցիչներից է: Օրինակ՝ քաղաքացին կարող է ինտերակտիվ բյուջեի միջոցով տեսնել, թե ինչպես է ծախսվում պետբյուջեն: Հայաստանում համակարգը ներդրվել է ԵՄ աջակցությամբ էստոնական փորձի հիման վրա: Հայաստանը մոտենում է էլեկտրոնային կառավարման համակարգի հաջորդ` որակական զարգացման փուլին:

Գրել կարծիք