«Լեգենդների վերադարձը». Newmag Summerfest 2026-ը միավորեց գրքերը, սպորտն ու հազարավոր ընթերցողներին (լուսանկարներ)

Փառատոնի գլխավոր իրադարձությունը հայկական ֆուտբոլի լեգենդ, Իտալիայի կրկնակի չեմպիոն Հենրիխ Մխիթարյանի հանդիպումն էր երկրպագուների և ընթերցողների հետ։ Երազ այգում հավաքվել էին հազարավոր մարդիկ՝ սպասելով սիրելի ֆուտբոլիստի հետ հանդիպմանը։

Newmag-ի ղեկավար Արտակ Ալեքսանյանը Մխիթարյանի հետ զրուցեց նրա՝ «Իմ կյանքը՝ միշտ կենտրոնում» գրքի շուրջ։ Հրատարակչությունը ինքնակենսագրականը ներկայացրել էր տարվա սկզբին։ Այդ ժամանակ ֆուտբոլիստը ներկա չէր գրքի շնորհանդեսին, բայց խոստացել էր հանդիպել հայ ընթերցողների հետ։ 

Հազարավոր երկրպագուներ լսեցին Մխիթարյանի մոտիվացնող, ոգեշնչող խորհուրդները, լուսանկարվեցին նրա հետ ու ստացան լեգենդի մակագրությունը։ Հայկական ֆուտբոլի լեգենդը պատանիներին խորհուրդ տվեց երազել. 

«Ապագա ֆուտբոլիստներ ջան, իմ ցանկությունն է, որ առաջին հերթին երազեք, երազեք ու հասնեք ձեր երազանքերին։ Ինչպես եք հասնելո՞ւ. աշխատանքի շնորհիվ, զոհարաբերությունների գնով ու չհանձնվելով։ Եթե հանձնվեք, չեք հասնի ձեր նպատակներին»։

Փառատոնի համակազմակերպիչն արդեն 6-րդ տարին անընդմեջ Yeraz Projects ընկերությունն է։ Ողջույնի խոսքով հանդես եկավ ընկերության զարգացման գծով տնօրեն Օնիկ Առաքելյանը.

«Տարեցտարի այս փառատոնն ավելի հնչեղ ու ճանաչելի է դառնում գրքասերների շրջանում։ Մեծ պատիվ է այս այգում տեսնել բոլորին»։

Փառատոնի գլխավոր գործընկեր ROQ Capital ընկերությունն արդեն մի քանի տարի համագործակցում է Newmag-ի հետ։ Ընկերության հիմնադիր Արամ Կայֆաջյանն ամփոփեց գործակցության պտուղները. 

«Միասին ներկայացրել ենք հայտնի ֆինանսիստ Ռեյ Դալիոյի գիրքը, որը հայ ընթերցողները շատ սիրեցին։ Այս անգամ շատ ուրախ ենք, որ դարձել ենք ոչ միայն հայազգի թենիսի լեգենդ Անդրե Աղասիի «Անկեղծորեն» ինքնակենսագրականի գործընկերը, այլև փառատոնի գլխավոր գործընկերը։ 

Եթե առաջին գիրքն ավելի շատ ֆինանսական ուղղություն ուներ, այս մեկը կօգնի բոլորիս ուժ, ոգեշնչում գտնել մեր նպատակներին հասնելու համար։ Հուսով եմ, մեր համատեղ աշխատանքը կշարունակվի ի նպաստ հայ ընթերցողի»։

Հայազգի լեգենդար թենիսիստի գրքի շնորհանդեսին մասնակցեց նաև Հայաստանի առաջին ռակետ Միքայել Ավետիսյանը, որը Հայաստանի թենիսի ֆեդերացիայի մարզիչների հետ անցկացրեց բաց դաս՝ հատուկ փառատոնի համար կառուցված մինիկորտում։ ROQ Capital-ն այցելուների համար պատրաստել էր նաև հատուկ ֆոտոզոնա։

Արդեն հինգերորդ տարին Summerfest-ի գլխավոր հովանավորը Evocabank-ն է՝ որպես ընթերցանության, մշակույթի և նորարարական գաղափարների հավատարիմ գործընկեր։ 

Բանկը կազմակերպել էր խաղարկություն բոլոր այն այցելուների համար, որոնք փառատոնում գիրք էին գնել, իսկ ակտիվ հանգստի սիրահարների համար ստեղծել էր բասկետբոլային chill zone։

Evocabank-ի մարկեթինգի և հասարակայնության հետ կապերի բաժնի ղեկավար Լյուսի Սարուխանյանը նշեց, որ հրատարակչության ամառային փատատոնի վեց տարիներից հինգի գլխավոր հովանավորը Evocabank-ն է եղել. 

«Newmag-ի ու Evocabank-ի գործակցությունը սկսվել է շատ ավելի վաղ։ Միասին հրատարակել ենք գրքեր, օրինակ՝ Քիմ Քարդաշյանի կենսագրականը, Աստղիկ Սահակյանի «Նախագծերի կառավարում» գիրքը, իսկ անցյալ տարի դարձանք «Թիմ. Ինչպես միասին հասցնել բոլոր գործերը» գրքի գործընկերը, որից հետո ստեղծեցինք ևս մեկ մեծ նախագիծ՝ Evocabank Conference-ը։ Newmag-ի հետ Հայաստան հրավիրեցինք հայտնի խոսնակների։ Դա մեր ամենամեծ համատեղ նախագիծն էր»։

Փառատոնի գլխավոր գրական իրադարձություններից մեկն Ալեքսանդր Դյումայի «Երեք հրացանակիրները» վեպի նոր հայերեն հրատարակությունն էր։ Առաջին անգամ ստեղծագործությունը թարգմանվել է բնագրից՝ ֆրանսերենից։ Հրատարակության գլխավոր գործընկերը ՎՏԲ-Հայաստան Բանկն է։

Բանկի հանրային կապերի պատասխանատու Գայանե Հարությունյանն ասաց, որ հրատարակչության գաղափարը միանգամից ոգեշնչել է նաև իրենց թիմին. «Հատուկ շնորհակալություն եմ ուզում հայտնել թարգմանիչ Սամվել Գասպարյանին, որը նման ծավալուն աշխատանք է կատարել։ Դյուման համաշխարհային գրականության լեգենդար հեղինակներից է, և հայ ընթերցողն արժանի է, որ այն կարդա բնօրինակից թարգմանությամբ»։

Summerfest-ում ներկայացվեց նաև ժամանակակից եվրոպական գրականության ամենանշանակալի վեպերից մեկը՝ Գեորգի Գոսպոդինովի «Ժամանակի ապաստարանը», որն արժանացել է 2023 թվականի «Բուքերյան» միջազգային մրցանակին։ Գրքի գլխավոր գործընկերը Եվրոստան Ույուտ ընկերությունն է։

Հայերեն հրատարակության առիթով փառատոնին ներկա էր նաև Հայաստանում Բուլղարիայի արտակարգ և լիազոր դեսպան Նիկոլա Նիկոլովը։ Նա հիշեցրեց, որ Գոսպոդինովի վեպը առաջին բուլղարական գիրքն էր, որն արժանացել է այդ հեղինակավոր մրցանակին, ու դարձել է փոքր լեզուներով ստեղծագործող հեղինակների միջազգային ճանաչման խորհրդանիշ. 

«Կարդալով «Ժամանակի ապաստարան» վեպը՝ ձեզնից յուրաքանչյուրը թող ինքն իր համար պատասխանի հետևյալ հարցին. «Ի՞նչ կլիներ, եթե մեզ հաջողվեր փախչել այս դժվարին ժամանակներից դեպիանցյալի որևէ «կլինիկա»»։ Հայ ընթերցողին մաղթում եմ հաճելի ընթերցանություն և հույս հայտնում, որ Գեորգի Գոսպոդինովի և բուլղարացի այլ ժամանակակից ականավոր հեղինակների գրքերը բացահայտելու առիթներ նույնպես կունենաք»

Գրքի շնորհանդեսն առանձնահատուկ ձևաչափ ուներ․ այն ներկայացրեցին Newmag-ի գրական ակումբի անդամները, որոնք նախապես ընթերցել էին վեպը։ Նույն ձևաչափով ներկայացվեց նաև Ռիչարդ Օսմանի «Մարդը, որ նորից էր մահացել» վեպը՝ «Սպանությունների ակումբ՝ ամեն հինգշաբթի» բեսթսելլերի շարունակությունը։ Գրքի գլխավոր գործընկերը Բուկինիստ ընկերությունն է։ 

Բուկինիստի տնօրեն Խաչիկ Վարդանյանը նշեց, որ Newmag-ի գրքերը կարևոր տեղ են զբաղեցնում հայկական գրաշուկայում. «Հրատարակչությունն ունի մոտ երեք հարյուր գիրք, որոնք բոլորն արդիական են ու մեծ պահանջարկ ունեն։ Գործեր կան, որ կմնան հայ գրքի պատմության մեջ, օրինակ՝ Ազնավուրի շարքը։ Հրատարակչությունը գտնում է այն բացերը, որոնք պետք է լրացնել։ Ես ինքս Newmag-ի գրքերը հաճույքով եմ կարդում»։

Ֆուտբոլային թեման շարունակվեց նաև Լուչիանո Վերնիկեի «Ինչու են ֆուտբոլ խաղում 11-ն ընդդեմ 11-ի» գրքի շնորհանդեսով։ Քննարկումը վերածվեց զրույցի ոչ միայն ֆուտբոլի պատմության, այլև աշխարհի առաջնության շուրջ։ 

Գիրքը Newmag-ը նվիրել է մարզական լրագրող, հրատարակչության սպորտային մատենաշարի ղեկավար Դավիթ Մարտիրոսյանի հիշատակին։ Հենց նա էր առաջարկել հայերեն հրատարակել այս աշխատությունը և արդեն սկսել էր թարգմանությունը։ Թեև Դավիթը չհասցրեց ավարտին հասցնել իր նախաձեռնությունը, հրատարակչությունը որոշեց շարունակել նրա սկսած գործը։

Փառատոնի ամենակարևոր միջազգային նախաձեռնություններից մեկը ներկայացրեց Հայաստանում ԱՄՆ դեսպանատունը։ Newmag-ն ու դեսպանատունը հայտարարեցին «Պուլիցերյան» մատենաշարի մեկնարկի մասին, որի շրջանակում հայերեն կհրատարակվեն Պուլիցերյան մրցանակի արժանացած գրքերը։

ԱՄՆ դեսպանատան խոսնակ Անաստասիա Կոլիվասը համոզված է, որ այս մատենաշարն ավելին է, քան պարզապես թարգմանությունը. «Այն մշակութային, գաղափարական և մարդկային կապերի մասին է։ Ամերիկայի Միացյալ Նահանգները հպարտ է աջակցել այս նախաձեռնությանը։ Newmag-ի հետ մեր գործընկերությունը ֆինանսական չէ։ 

Այն հիմնված է ընդհանուր արժեքների վրա՝ հավատ գրականության ուժի, գաղափարների հասանելիության կարևորության և ամերիկացի ու հայ ժողովուրդների բարեկամության հանդեպ։ Մեծ ուրախություն է լինել Newmag-ի ամառային փառատոնին, որտեղ ընթերցողները մեզ պես հավատում են, որ գրքերն աշխարհը փոխելու ուժ ունեն»։

Փառատոնի մշակութային ծրագրում ընդգրկված էին նաև երաժշտական և բեմական ելույթներ։ «Էքսպրոմտ» պարային համույթը։

Դյումայի նոր հրատարակության առիթով ներկայացրեց «Սուսերով պար» բեմադրությունը։

Ալբերտ Գրիգորյանի անվան սուսերամարտի մանկապատանեկան մարզադպրոցի սաներն ունեցան ցուցադրական ելույթ։ Երեկոն շարունակվեց Եվրատեսիլի մասնակից PARG-ի համերգով, որի ընթացքում հնչեց նաև երգի պրեմիերա՝ Feel alive ստեղծագործությունը։

Փառատոնի գործընկերները նույնպես բազմաթիվ անակնկալներ էին պատրաստել այցելուների համար։ Գրքերի տաղավարում բոլոր գրքերը վաճառվում էին 40 տոկոս զեղչով։ 

Այցելուները զեղչի կտրոններ ստացան փառատոնի գլխավոր հովանավոր Cinema Star Armenia-ից, Yeraz Projects-ից՝ «Երազ Լաունջ» և Library սրճարաններից օգտվելու համար։ Երեք և ավելի գիրք գնած այցելուները հյուրասիրության կտրոններ ստացան նաև Dargett-ից, որի տաղավարում ներկայացվեց Cherry Ale բալի համով չֆիլտրված նոր քրաֆթային գարեջուրը։ Play Zone-ում Հայկ Ֆրիսթայլն ու Դավիթ Մանոյանը ներկայացրին «Գնդակի կախարդանքը» ֆուտբոլային շոուն։ 

ՀԵՆԱՐ հիմնադրամը «Պաշտպանված սրտի քաղաք Երևան» ծրագրի շրջանակում տեղադրել էր արտաքին ավտոմատ դեֆիբրիլյատոր և անցկացրեց սրտի վերակենդանացման բաց դասեր։ Այցելուները սովորեցին ճիշտ արձագանքել սրտի կանգի դեպքում և առաջին օգնություն ցուցաբերել մինչև մասնագետների ժամանումը։

Newmag Summerfest 2026-ը ևս մեկ անգամ ապացուցեց, որ այն միայն գրքի փառատոն չէ. մշակույթի տարբեր ճյուղերի, գրականության, սպորտի մեծ տոն է, որտեղ լեգենդները ոչ միայն վերադառնում են, այլ նաև կերտում նոր պատմություններ։

Համակազմակերպիչ

• Yeraz Projects
  

Գլխավոր հովանավորներ

• Evocabank
  
• Roq Capital
  
• Cinema Star Armenia
  

Հովանավորներ

• Dargett
  
• Oprint
  

Ինֆորմացիոն հովանավորներ

• Radio Comedy
  
• Corner Football Armenia

Կարդացեք նաև

• Գիտելիքը, շարունակական զարգացումը ցանկացած հաջողության հիմքում են. Արամ Կայֆաջյանի հարցազրույցը՝ Արտակ Ալեքսանյանին (լուսանկարներ)
• Newmag Summer Fest2026. Ամառվա մեծ խաղը՝ գրքերի, լեգենդների ու հաղթանակների հետ (անոնս)
  
• Summer Fest-ին Newmag-ը կներկայացնի «Սպանությունների ակումբ՝ ամեն հինգշաբթի» շարքի 2-րդ գիրքը (թրեյլեր)
• Summer Fest2026-ին Newmag֊ը կներկայացնի Անդրե Աղասիի «Անկեղծորեն» գիրքը (թրեյլեր)
• Summer Fest-ին Newmag-ը կներկայացնի Լուչիանո Վերնիկեի «Ինչո՞ւ են ֆուտբոլ խաղում 11-ն ընդդեմ 11-ի» գիրքը
• Summer Fest-ին Newmag-ը կներկայացնի Գեորգի Գոսպոդինովի «Ժամանակի ապաստարանը» գիրքը (թրեյլեր)
• Summer Fest-ին Newmag-ը կներկայացնի Ալեքսանդր Դյումայի ամենահայտնի ստեղծագործությունը՝ «Երեք հրացանակիրները» (թրեյլեր)
• «Գրական առաջնություն. լեգենդները վերադառնում են» խորագրով փառատոնի մասին Արմենիայի եթերում (տեսանյութ)