«Գրական առաջնություն. լեգենդները վերադառնում են» խորագրով փառատոնի մասին Արմենիայի եթերում (տեսանյութ)

Գլխավոր իրադարձությունը լինելու է Հայաստանի բոլոր ժամանակների լավագույն ֆուտբոլիստ Հենրիխ Մխիթարյանի հետ հանդիպումը։ Արմենիա TV-ի «Բարի լույս» ծրագրում կազմակերպիչներն ու գործընկերները ներկայացրել են փառատոնի մանրամասները։

Newmag հրատարակչության Ռազմավարական և հատուկ նախագծերի պատասխանատու Գոհար Մանուկյանը պատմեց, որ սովորաբար, փառատոների ֆորմատը ընտրվում է` հաշվի առնելով այդ պահին տեղի ունեցող կարևոր իրադարձություններով. «Այս անգամ միախառնեցինք ֆուտբոլն ու գրական փառատոնը, որպեսզի մարդկանց ուշադրությունը  չշեղենք աշխարհի գլխավոր սպորտային իրադարձությունից։ 

Փառատոնն ունի «Լեգենդները վերադառնում են» խորագիրը։ Գրքատոնի ընթացքում տարբեր զոնաներում՝ թե՛ փակ, թե՛ բաց, կլինեն հետաքրքիր միջոցառումներ, որոնք կբացահայտեն՝ ինչու ենք կոչել «Լեգենդների վերադարձ»։ 

Լեգենդներից մեկը Ալեքսանդր Դյուման է։ Newmag-ն առաջին անգամ «Երեք հրացանակիրները» հայերեն է թարգմանել բնագրից։ Այս դեպքում լեգենդ է Դյուման ու իր լեգենդար գիրքը։ Մյուս ու ամենակարևոր լեգենդը Հենրիխ Մխիթարյանն է, որն այդ օրը լինելու է մեզ հետ, զրուցելու ենք նրա հետ, ու նա մակագրելու է իր ինքնակենսագրականը, որը հրատարակել ենք տարեսկզբին։ Ընթերցողները կլսեն իրենց հերոսին ու կստանան նրա մակագրությունը»։

Փառատոնին ներկա կլինի նաև Դավիթ Մանոյանը, որը բլոգեր Հայկ Ֆրիսթայլի հետ պատրաստել է «Գնդակի կախարդանքը» շոուն։ Փառատոնի մյուս լեգենդը, հայազգի լեգենդար թենիսիստ Անդրե Աղասին է, որի «Անկեղծորեն» ինքնակենսագրականի շնորհանդեսն է լինելու։ 

Գոհար Մանուկյանն ուղիղ եթերում պատասխանեց նաև այն բոլոր հարցերին, որոնք փառատոնից առաջ ստանում է հրատարակչությունը. 

«Սովորաբար, փառատոնից առաջ մի փուլ է սկսվում, բոլորը հարցնում են՝ մուտքն ազա՞տ է, իսկ որքան արժե՞ մասնակցությունը, քանի որ չեն հավատում, որ նման մասշտաբային միջոցառումը կարող է հասանելի լինել բոլորին։ Եվս մեկ անգամ կրկնում եմ, Newmag-ի փառատոնի մուտքն ազատ է։ Բոլոր գրքերը վաճառվելու են 40% զեղչով»։ 

«Yeraz projects»-ի մարկետինգի և հանրային կապերի պատասխանատու Մերի Մելիք-Սարգսյանը ներկայացրեց Newmag-ի հետ գործակցությունը։ Ընկերությունն արդեն 6-րդ անգամ է այս փառատոնի համակազմակերպիչը. 

«Նման փառատոները ստեղծում են բաց մշակութային, հանրային քննարկումների, մտքերի փոխանակման հարթակ։ Մարդկանց մոտ կարծրատիպ կա, որ փառատոները փակ են, բայց սա հիանալի վայր է, որտեղ մարդիկ կարող են գալ, շփվել, նոր կապեր ստեղծել։ Այնպես որ, այս դեպքում, գիրքն իր ավանդական միջավայրից դուրս է գալիս»։

«Yeraz projects»-ն ամեն տարի այգում իրականացնում է մեծ ներդրումներ, որպեսզի մարդիկ գան, ապահով, խաղաղ ու անվճար մասնակցեն նման միջոցառումների, որոնք կլինեն բովանդակալից, ոչ ձանձրալի. 

«Սա մեզ համար ոչ միայն կորպորատիվ պատասխանատվություն է ու քաղաքականություն, այլ նաև ներքին քաղաքականություն, քանի որ արտաքին քաղաքականությունն արտացոլում է ներքին արժեքները։ «Yeraz projects»-ը միայն ժամանցային միջոցառումներ երբեք չի կազմակերպում, դրանք բոլորն ունեն կարևոր արժեքներ, բովանդակություն։ 

Գլխավոր գրասենյակում մենք ունենք մեծ գրադարան, կոլեգաներով ընտրում ենք գիրք, կարդում ենք, հետո նաև քննարկում ենք։ Այգում կազմակերպում ենք նաև Վարդավառի, Խաղողօրհնեքի տոնակատարություններ։ Այգում կա նաև գրադարան-սրճարան, որտեղ այս տարի նույնպես կլինեն փառատոնային միջոցառումներ»։

Newmag-ի Կորպորատիվ և միջազգային գործակցության պատասխանատու Նանե Մանուկյանը ներկայացրեց այն լոկացիաները, որտեղ տեղի են ունենալու միջոցառումները. «Մեր փառատոները երբեք միայն գրքերի մասին չեն լինում. դրանք բազմաբովանդակ, բազմաժանր, մշակութային ու երաժշտական են։ Այս փառատոնին գլխավոր բեմում գրքերի շնորհանդեսներ են լինելու, խաղային զոնայում՝ սպորտային տարբեր միջոցառումներ՝ թենիսի, սուսերամարտի, բասկետեբոլի բաց դասեր ու ֆուտբոլային շոու։ 

Ընթերցողներին շատ հետաքրքիր կլինի մասնակցել ոչ միայն գրքերի շնորհանդեսներին, այլ նաև այդ ակտիվություններին։ Գրադարան սրճարանում էլ կլինեն գրքերի շնորհանդեսներ, բայց միանգամայն այլ ձևաչափով. երկու նոր գրքերը ներկայացնելու են Newmag-ի գրական ակումբի անդամները»։

Փառատոնի գլխավոր հովանավորն արդեն 5-րդ տարին անընդմեջ Evokabank-ն է։ Այս տարի գիրք գնած բոլոր մասնակիցները կմասնակցեն բանկի խաղարկությանը։ Evokabank-ը այցելուների համար պատրաստել է նաև իր բրենդինգով հետաքրքիր բասկտեբոլային չիլ զոնա, որտեղ այցելուները կարող են հանգստանալ, բասկետբոլ խաղալ։

Newmag-ի գրական ծրագրերի պատասխանատու Անի Հակոբյանը խոսեց ևս մեկ գրքի մասին, որը ներկայացվելու է փառատոնին։ Լուչիանո Վերնիկեի «Ինչո՞ւ են ֆուտբոլ խաղում 11-ն ընդդեմ 11-ի»։ Այն ֆուտբոլի ստեղծման, պատմության ու հետաքրիքր կանոնների մասին է. «Գիրքը դուր կգա ֆուտբոլասերներին, պատանիներին, որոնք զբաղվում են ֆուտբոլով։ Կան հետաքրիքր փաստեր, գաղտնիքներ ու առասպելներ, որոնք չեք գտնի գուգլում։ Վերնիկեն արգենտինացի պատմաբան լրագրող է, ուսումնասիրել է աշխարհի տարբեր արխիվներ ու գրել է այս գիրքը։ 

Newmag-ն առաջիններից է, որ սկսեց թարգմանել ու հրատարակել սպորտային գրականություն ու ինքնակենսագրականներ։ Ես որպես նախկին սպորտային լրագրող ու ֆուտբոլի երկրպագու, մասնակցում եմ գրքերի ընտրությանը, բայց Վերնիկեի «Ինչո՞ւ են ֆուտբոլ խաղում 11-ն ընդդեմ 11-ի» հայերեն հրատարակության մեջ մի կարևոր անուն կա, այն նվիրված է մարզական լրագրող Դավիթ Մարտիրոսյանի հիշատակին, նա նաև հրատարակչության սպորտային մատենաշարի ղեկավարն էր։ Դավիթն է առաջարկել, որ հրատարակենք այս գիրքը, ու նա սկսել էր թարգմանությունը, բայց ցավոք, չհասցրեց։ Նրա մահը շատ մեծ կորուստ էր, և ես շարունակեցի թարգմանությունը»։

Փառատոնի գլխավոր հովանավոր և Անդրե Աղասիի գրքի գլխավոր գործընկեր ROC Capital-ի մարկետինգի ղեկավար Աննա Սալոմեն ներկայացրեց հրատարակչության հետ գործակցության պատմությունը. «Կորպորատիվ սոցիալական պատասխանատվության տեսանկյունից շատ ենք կարևորում հայալեզու մասնագիտական գրականության հրատարակությունը։ Ես կարծում եմ, որ այդ ռազամավարությունը կշարունակվի ու ներդրումների, ֆինանսական ոլորտի մասնագիտական նոր գրքեր կհրատարակենք։

Ըստ Սալոմեի, ROC Capital ընկերությունը վերջերս իրականացրել է ռեբրենդինգ։ Ոլորտում բոլորին հայտնի Արմբրոք ընկերությունը դարձել է ROC Capital։ Ռեբրենդինգը կառուցվել է սպորտի, հաղթանակի գաղափարախոսության շուրջ, հատկապես այն սպորտաձևերի, որտեղ դաբլն աշխատում է, այսինքն երկխոսությունը.

Այդ սպորտաձևերից մեկն, իհարկե, թենիսն է։ Մենք մեր մարկետինգային արշավներում հաճախ ենք օգտագործում թենիսը։ Թենիսի աշխարհում Անդրե Աղասին նմանը չունեցող տաղանդ է, այնպես որ շատ կարևոր էր նրա ինքնակենսագրականը ներկայացնել հայ ընթերցողին։ 

Աղասին իր անկեղծ խոստովանությամբ կոտրում է կարծրատիպեր, նա յուրահատուկ մարզիկ է, որը երևում է նաև նրա գրքից։ Այս գրքի շնորհանդեսը կանցկացնենք պանելային քննարկմամբ, որին կմասնակցեն շատ հետաքրքիր մարդիկ, Հայաստանի առաջին ռակետը, հայտնի դեմքեր, որոնք սիրում են թենիս»։

Newmag Summer Fest 2026-ը կանցկացվի հունիսի 27-ին, ժամը 17:00-ից, Երազ այգում։ Մուտքն ազատ է։ «Գրական առաջնություն. լեգենդները վերադառնում են» խորագրով փառատոնին լինելու են սպորտային, դասական ու համաշխարհային բեսթսելլերների շնորհանդեսներ։ Երաժշտական շոուն կներկայացնի PARG-ը։

SUMMERFEST2026-Ի ԾՐԱԳԻՐԸ

Համակազմակերպիչ

• Yeraz Projects
  

Գլխավոր հովանավորներ

• Evocabank
  
• Roq Capital
  
• Cinema Star Armenia
  

Հովանավորներ

• Dargett
  
• Oprint
  

Ինֆորմացիոն հովանավորներ

• Radio Comedy
  
• Corner Football Armenia

Կարդացեք նաև

• Գիտելիքը, շարունակական զարգացումը ցանկացած հաջողության հիմքում են. Արամ Կայֆաջյանի հարցազրույցը՝ Արտակ Ալեքսանյանին (լուսանկարներ)
• Newmag Summer Fest2026. Ամառվա մեծ խաղը՝ գրքերի, լեգենդների ու հաղթանակների հետ (անոնս)
  
• Summer Fest-ին Newmag-ը կներկայացնի «Սպանությունների ակումբ՝ ամեն հինգշաբթի» շարքի 2-րդ գիրքը (թրեյլեր)
• Summer Fest2026-ին Newmag֊ը կներկայացնի Անդրե Աղասիի «Անկեղծորեն» գիրքը (թրեյլեր)
• Summer Fest-ին Newmag-ը կներկայացնի Լուչիանո Վերնիկեի «Ինչո՞ւ են ֆուտբոլ խաղում 11-ն ընդդեմ 11-ի» գիրքը
• Summer Fest-ին Newmag-ը կներկայացնի Գեորգի Գոսպոդինովի «Ժամանակի ապաստարանը» գիրքը (թրեյլեր)
• Summer Fest-ին Newmag-ը կներկայացնի Ալեքսանդր Դյումայի ամենահայտնի ստեղծագործությունը՝ «Երեք հրացանակիրները» (թրեյլեր)