Ովքե՞ր են նորաձևության ամենահայտնի ժամանակակից հայերը

Ովքե՞ր են նորաձևության ամենահայտնի ժամանակակից հայերը

Համաշխարհային նորաձևության բնագավառում հայերի ձեռքբերումները շատ չեն: Հնարավոր է՝ հենց այդ պատճառով fashion աշխարհում ցանկացած հայկական հետք մենք ընդունում ենք մեծ ոգևորությամբ:

Մենք միշտ էլ հայտնի ենք եղել մեր հմուտ արհեստավորներով. կաշեգործություն, արծաթագործություն, ասեղնագործություն: Ցեղասպանությունից հետո աշխարհի տարբեր ծայրեր գաղթած հայերը օրվա հացը վաստակում էին իրենց հմուտ ձեռքերով, սուր աչքով և նախնիներից ժառանգած գիտելիքով:

ՀՄՈՒՏ  ՁԵՌՔԵՐ


Նորաձևության նորագույն պատմության առաջին և ամենահայտնի սվիտերը հենց այդպիսի ոսկի ձեռքերի աշխատանք է: Էլզա Սկիապարելին, որը հետագայում լեգենդ դարձավ, 1927 թվականին իր սպիտակ բանտով սև սվիտերի շնորհիվ մեծ բում արեց: Այդ սվիտերը նա տեսել էր մի հայուհու մոտ, որը վաճառում էր իր գործած իրերը:

7223136_orig

Գնելով և հագնելով այս սվիտերը՝ նա հայտնվեց ամբողջ նորաձև Փարիզի ուշադրության կենտրոնում և նույնիսկ խոշոր պատվեր ստացավ ԱՄՆ-ից: Պատվերը ճիշտ ժամանակին հանձնելու համար գործի էին անցել Փարիզի հայ համայնքի գրեթե բոլոր կանայք: Այս սվիտերը նորաձևության իսկական լեգենդ է, որը սկիզբ է դրել հանճարեղ Էլզա Սկիապարելիի նորաձևության տան հաջողություններին:

«LES JARDINS D’ARMÉNIE» ԵՎ «LETTRES D’EREVAN»՝ «HERMES »-ԻՑ


«Hermes» ապրանքանիշը և Հայ-ֆրանսիական միությունը 2004-ին թողարկում են «Les jardins d’Arménie» վզկապը, 2014-ին`«Lettres d’Erevan»-ը: «Hermes» ապրանքանիշի վզկապները ամբողջ նորաձևության աշխարհում թերևս ամենահեղինակավորն են, թանկարժեքը և գեղեցիկը:

Հայկական թեմատիկայով վզկապներն իրենց ուրույն տեղն են զբաղեցնում ապրանքանիշի լեգենդար մոդելներում: Դրանք թողարկվել են սահմանափակ քանակությամբ և այդ պատճառով ավելի արժեքավոր են:

CW51734-a

Վզկապների դիզայնի հեղինակը Կարեն Պետրոսյանն է: «Les jardins d’Arménie» վզկապը ոգեշնչված է նոյյան տապանի լեգենդից. դրա վրա պատկերված են տարատեսակ կենդանիներ: Անցած տարի թողարկված «Lettres d’Erevan»-ը նվիրված է Մատենադարանին և զարդարված է հայկական այբուբենի տառերով:

ՀԱՅԱՍՏԱՆԻ ԱՆՏԱՌՆԵՐԻ ԲՈՒՅՐԸ


«Guerlain» ապրանքանիշի «Bois d’Armenie» օծանելիքը թողարկվել է 2006 թ. և մասնագետների կողմից համարվում է իսկական պարֆյումերային գլուխգործոց:

Բույրը ստեղծվել է՝ ոգեշնչվելով XVI դարում Հայաստանում տարածում գտած բուրավետ թղթից:

Navigations_Sur-mesure

 

ԱՐԴՎԻՆՑԻ  ՀԱՅՈՒՀՈՒ  ԼՈՒՍԱՆԿԱՐԸ


ARMENIAN Գունավոր լուսանկարչության նախահիմնադիր Սերգեյ Պրոկուդին- Գորսկին Ռուսաստանի կայսր Նիկոլայ 2-րդի պատվերով 1909-12 թվականներին շրջում է կայսրության տարածքով մեկ և լուսանկարում տեղացիներին:

Լուսանկարները գունավոր են և պահպանվել են ԱՄՆ Կոնգրեսի գրադարանում: Նա լուսանկարել է նաև արդվինցի հայուհուն` ազգային տարազով: Այս պատկերի միջոցով կարող ենք տեսնել ավանդական հայկական տարազը գրեթե բնական գույներով:

Armenian woman in national costume

Ֆանտաստիկ ուժ ունեցող այս լուսանկարը հիացրել է շատերին և, ասում են, նույնիսկ հայտնվել է «Valentino» նորաձևության տան հավաքածուներից մեկի moodbord-ում:



PROJECT BY ILYA  VARTANIAN

Ռուսական սնդուսի ամենահայտնի լուսանկարիչներից մեկը` Իլյա Վարդանյանը, մի քանի տարի շարունակ Հայաստանում լուսանկարում է իր «Հայկական նախագիծը», որի շրջանակում լուսանկարել է նաև հայկական ավանդական հագուստ հագած հայուհիների: Իլյայի շնորհիվ մենք ունեցանք բարձրաճաշակ և ժամանակակից ֆեշն լուսանկարչության լավագույն նմուշներին համապատասխանող լուսանկարներ, որոնց միջոցով կարող ենք գնահատել մեր ազգային հագուստի ամբողջ գեղեցկությունը: Եվ չնայած նախագիծը դեռ չի ավարտվել, և լուսանկարները դեռ պաշտոնապես հրապարակված չեն, դրանք հասցրել են մեծ տարածում ստանալ և ազդեցություն գործել նորաձևության և փոփ մշակույթի վրա:

newmag59--print-109

ՀԱՅ ԴԻԶԱՅՆԵՐՆԵՐ


Աշխարհով սփռված հայերի մեջ շատ են նրանք, ովքեր ստեղծագործում են հենց նորաձևության բնագավառում: Շատերը հասել են իսկապես մեծ հաջողությունների՝ դիզայներներ, ոճաբաններ, ֆեշն լուսանկարիչներ… ԱՄՆ, Եվրոպա, Ռուսաստան և նույնիսկ Ճապոնիա. հայկական ազգանուններ ֆեշնում այսօր կարելի է հանդիպել ամենուր: Ակնոցի ամենահայտնի դիզայներ Ալան Միքլիի, ճարմանդների արքա Ռոբերտ Թադեոսյանի կամ, ասենք, «Hermes»-ի տղամարդկանց հոսքագծի դիզայներ Վերոնիկ Նիշանյանի անունները ոլորտում գիտեն բոլորը, բայց պակաս խոստումնալից չէ նաև հայազգի դիզայներների նոր սերունդը: Ներկայացնենք 3 անուն, որոնք արդեն հասել են զգալի հաջողությունների:

ԿՐԻԿՈՐ ՋԱԲՈԹՅԱՆ


Բեյրութահայ դիզայների զգեստներն այնքան շքեղ և նրբագեղ են, որ կարծես փարիզյան բարձր նորաձևության նմուշներ լինեն: Զարմանալի չէ, որ այս զգեստները հիացնում են կանաց: Ջաբոթյանն ավելի ու ավելի հայտնի է դառնում Արևելքում ու Եվրոպայում։ Նրա մշտական հաճախորդն է Միջին Արևելքի գլխավոր գեղեցկուհին` Հորդանանի թագուհի Ռանյան:

krikor-jabotian-1

ՏԻԳՐԱՆ  ԱՎԵՏԻՍՅԱՆ


Այս պետերբուրգցի երիտասարդ դիզայները սովորել է Սենթ Մարթինսում, վերապատրաստվել է շվեդական «Acne» բրենդում, այժմ նորագույն նորաձևության վառ դեմք է: Տիգրանին շատ է սիրում համաշխարային ֆեշն մամուլը՝ հաճախ նրան դասելով նոր սերնդի ամենահետաքրքիր ներկայացուցիչների շարքին: «Տիգրան Ավետիսյան» պիտակով հագուստներն արդեն վաճառվում են Ռուսաստանում, Բրիտանիայում և Ճապոնիայում:

newmag59--print-111

ՆԱՏԱԼՅԱ ԱԼԱՎԵՐԴՅԱՆ


Ժամանակին նա ռուսական «Harpers Bazaar» ամսագրի նորաձության բաժնի տնօրենն էր, բայց արդեն մի քանի սեզոն է, ինչ զբաղվում է միայն իր «A.W.A.K.E.» ապրանքանիշով: Street style աստղերը շատ սիրեցին Ալավերդյանի առաջին հավաքածուներում եղած ընձուղտի փրինթները և աքլորների պատկերներով հագուստները: Դրանք նորաստեղծ բրենդին առաջին հաջողությունները պարգևեցին: Ալավերդյանի «A.W.A.K.E.»-ն ավելի ու ավելի հայտնի է դառնում: Ի դեպ, վերջին հավաքածուի շնորհանդեսին ներկա էր նույնիսկ Քիմ Քարդաշյանը:

newmag59--print-111111

«ՀԱՅԿԱԿԱՆ ՀԱՎԱՔԱԾՈՒՆԵՐ»


Տարբեր երկրներում ապրող հայազգի դիզայներները իրենց հավաքածուներում պարբերաբար անդրադառնում են հայկական մշակութային ժառանգությանը՝ առավել հաճախ ոգեշնչվելով հայկական ճարտարապետությունից և մանրանկարչությունից:

Դա, իհարկե, շատ կարևոր և հետաքրքիր է, բայց ավելի հետաքրքիր է գտնել հայկական հետքը հայկական արմատներ չունեցող դիզայներների գործերում: Ահա մի քանի օրինակ:

newmag59--print-112

2010-ի Jean Paul Gaultier-ի ցուցադրության հրավիրատոմսը մտացածին քարտեզ էր, որում ընդգրկված էին այն երկրները, որոնց մշակույթներից ոգեշնչվել էր ֆրանսիացի կուտյուրիեն այս հավաքածուն ստեղծելիս: Հաճելի էր Ռուսաստանի, Մարոկկոյի և Հնդկաստանի կողքին տեսնել նաև «Armenie» նշումը:

Դժվար է ասել, թե հատկապես ինչն էր հավաքածուում հայկական. առանձնացրել եմ այն սեթերը, որոնք ամենից մոտ են մեր մշակույթին:

newmag59--print-112222

Նույն 2010-ին բրազիլացի դիզայներ Alexandre Herchcovitch-ի հավաքածուն ոգեշնչված էր Փարաջանովի «Նռան գույնը» կինոնկարով: Բրազիլացու շատ ժամանակակից հավաքածուում ակնհայտ նկատելի է հայկական և վրացական ֆեշն ազդեցությունը: Հայկական ֆեշն հետքի ամենաթարմ օրինակը ռուս դիզայներ Ուլյանա Սերգեյենկոյի վերջին հավաքածուն է, որը նա ներկայացրեց Փարիզի բարձր նորաձևության շաբաթի շրջանակում:

Ինչպես Herchcovitch-ը, Ուլյանան նույնպես ոգեշնչվել է հայական և վրացական մշակույթներով, նաև «Նռան գույնը» կինոնկարով: Սերգեյենկոն օգտագործել է հայկական մանրանկարչութան պատկերներ` դրանցով զարդարելով մի քանի զգեստներ, իսկ հավաքածուի շնորհանդեսի համար 160 կիլոգրամ նուռից հավաքել էր մի ամբողջ պատ:

Գրել կարծիք