Էռնա Յուզբաշյան. Օրբելյանական սերունդը հրաժեշտ է տալիս

Էռնա Յուզբաշյան. Օրբելյանական սերունդը հրաժեշտ է տալիս

Ինչո՞ւ մեկնեց ԱՄՆ և մնաց շատ երկար ժամանակ և ինչպե՞ս է ապրում հիմա: newmag-ի հետ անցած օրերն է հիշել ու անկեղծացել Էռնա Յուզբաշյանը, ով այս տարի նշում է բեմական գործունեության 35 ամյակը:

erna-texekan

Մայրանալու մեծ ցանկությունը Էռնա Յուզբաշյանին ստիպեց հեռանալ Հայաստանից: Երգչուհին չէր կարողանում երեխա ունենալ: Միայն ԱՄՆ-ում էին նրան խոստացել արդյունավետ բուժում: Այդ պատճառով 1994-ին այն ժամանակ 36-ամյա Էռնա Յուզբաշյանը հայտնվեց ԱՄՆ ամենահայկական քաղաքում` Լոս Անջելեսում: Հայրենիք վերադաձավ երկար ժամանակ անց. «Նաև փաստաթղթերի խնդիրներ ունեի: Հետո աղջիկս ծնվեց: Երբ երեխաս մի քիչ մեծացավ, նրա հետ եկա Հայաստան: Եթե հնարավորություն ունենայի, վաղուց կգայի»:

«Օրբելյանական սերնդի բաքվեցի մեներգչուհի» ֆրազը լսելիս Էռնա Յուզբաշյանը ամեն անգամ ուղղում է` երևանցի. «Ես ծնվել եմ Երևանում: Հանգամանքների բերումով եմ հայտնվել Բաքվում: Այնտեղ ապրել եմ մինչև 20 տարեկանը, հետո վերադարձել եմ Հայաստան: Բաքուն պարզապես ինձ համար մանկության քաղաք է: Քաղաք, որտեղ հորս, տատիկիս, պապիկիս գերեզմաններն են, որոնք, կարծում եմ, վաղուց բուլդոզերով հողին են հավասարեցրել: Ես պարզապես երբեմն կարոտում եմ այն Բաքուն, որտեղ ապրում էին իմ հարազատները»:

Բաքվի համադասարանցիների և գործընկերների հետ շարունակում է շփվել Facebook-ով: Երգչուհին նկատել է` նրանք էլ կարոտում են այն Բաքուն, որտեղ հայերն էին ապրում. «Չգիտեմ՝ ադրբեջանցիները փոխվե՞լ են, թե՞ ոչ: Բայց ընկերներս, որոնք ամենևին այդ երկրի ամենավերջին մարդիկ չեն, զարգացած են, ֆինանսապես ապահովված, դժգոհ են իրենց երկրից: Նոստալգիայով են հիշում համերաշխ կյանքի տարիները: Նաև շատ նրբանկատ են. ցեղասպանության, Արցախի թեմաներով իմ հրապարակումներին երբեք վատ բառ չեն գրել»:

Թերարժեքության կոմպլեքսով տառապող երկրից ու դրա բնակիչներից Էռնան հիասթափվեց 1980-ականների վերջին. «Երբ սկսվեցին կոտորածները, սպանությունները, գետի պես հոսեց հայի արյունը, Բաքվի և Ադրբեջանի հետ կապված ամեն բան ինձ համար ավարտվեց»:

Տարիների ընթացքում ավելի սառնասիրտ է դարձել: Շատերին ու շատ բան է ներել: 57-ը պատկառելի ու զարհուրելի տարիք է. «Մերիլ Սթրիփն ասում է՝ երջանկության համար անհրաժեշտ է սեր, սեքս և լավ ուտելիք: Ես համաձայն չեմ: Սերն ու սեքսը ինձ վաղուց չեն հետաքրքրում, փողն ու առողջությունը՝ այո՛: Հիմա անդադար ու ապարդյուն պայքարում եմ ավելորդ քաշի դեմ: Եվ ի տարբերություն Մերիլ Սթրիփի՝ ես կարողանում եմ համեղ ուտել»:  NewMag1

Երբ ինքն իր տեսքից գոհ լինի, կմտածի նաև առաջին երկու կետերի մասին: Յուրաքանչյուր տարիք իր գեղեցկությունն ունի, նոր կյանք է, նոր փուլ. երգչուհին այս թեզին չի հավատում. «Աղջիկս միշտ ասում է. «Մա՛մ, դու դեռ 50 տարեկան ես ու այսուհետև այդքան էլ լինելու ես: Տարիքը անձնագրում գրված թիվ է միայն»: Կան մարդիկ, որ, իրոք, անկեղծորեն հավատում են դրան: Ցավոք, ես շատ սթափ եմ նայում իրերին: Ու հիմա մտածում եմ՝ Աստված իմ, մի՞ թե 3 տարի անց 60 տարեկան եմ լինելու…»:

Էռնա Յուզբաշյանը Մադոննայի տարեկիցն է: Ամերիկայի փոփ դիվայի կարիերան տարիների հետ դեպի վեր է գնում: Միակ բանը, որ Հայաստանում անում են 50-ն անց արտիստները, վերապրելն է: Յուզբաշյանը նկատում է՝ որակյալ երգի պահանջարկ չկա: Ռաբիսը գրավել է բոլոր հարթակները. «Էստրադան մեռնում է: Չգիտեմ՝ ինչ պետք է անել: Քիչ թե շատ սիրունիկ դիմագծերով ու հարուստ հայրիկով կամ սիրեկանով աղջիկը կարող է հիմար մի երգ ձայնագրել, վճարել եթերաժամանակի համար, մարդիկ էլ կարծում են՝ դա է ճիշտը»:

Ռետրո երգացանկով, բայց նորովի` Էռնա Յուզբաշյանը, այդուամենայնիվ, վերադառնում է հայկական բեմ. «Օրբելյանական սերունդը, թվում է, հրաժեշտ է տալիս: Նորմալ է: Կյանքն այնքա ՜ն դժվար է, երբեք չես իմանա՝ ինչ կլինի վաղը: Ուղղակի ուզում եմ՝ այն, իրոք, լավ անցնի: Գուցե հրաժեշտի համերգ է: Գուցե ոչ: Քանի երգվում է, երգում եմ»: Յուզբաշյանը խոստանում է` հին երգերի նոր ինտերպրետացիաներից բացի՝ նոր երգեր էլ կլինեն:

«Էռնան և ընկերները» երաժշտական նախագիծը բեմ կբարձրանա աշնանը. «Նոր սերնդի մեջ էլ կան երիտասարդներ, որ լսում են իմ երաժշտությունը, իմ սերնդի երաժշտությունը: Մյուս կողմից էլ՝ թող որ երիտասարդությանը հետաքրքիր չլինեմ: Փոխարենը ասելիք ունեմ ի՛մ սերնդին»:

Էռնա Յուզբաշյանի 18-ամյա աղջիկը դերասանուհի է ուզում դառնալ: Մայրն ամեն կերպ օգնում է, թեև Հոլիվուդի մասին չի էլ երազում: Ամերիկյան կենսակերպի վտանգները չեն անհանգստացնում: Աղջկան դեռ դպրոցում են զգուշացրել թմրադեղերի վատ հետևանքների մասին:

Էռնան էլ իր օրինակով է խորհուրդներ տվել. «Մարիհուանա փորձել եմ դեռ Բաքվում թինեյջերական տարիքում: Կոկաինն էլ գիտեմ՝ ինչ է: Բայց թմրադեղերից կախվածություն չունեմ: Աղջկաս համար չեմ մտածում: Նա այդ ամենից հեռու է: Ավելին, անգամ ինքն է ինձ խնդրում թողնել ծխելը»:

New-Mag-Cover

«Սխալնե՞ր: Իսկ ո՞վ չի արել». Էռնա Յուզբաշյանը չի զղջում իր որևէ քայլի համար: Ափսոսանք հիշելու բան էլ չկա: Թեպետ ոչ միայն իր աղջկա, այլ նաև բոլոր կանանց համար կյանքի ճակատագրական սխալներից խուսափելու սեփական կանոնակարգն ունի. «Առաջինը՝ միացնել ուղեղը, անջատել սիրտը: Գտնել սերը, բայց ուղեղով որոշում կայացնելու պայմանով: Ես իմ բոլոր սխալները հենց էմոցիոնալ լինելու պատճառով եմ արել: Պետք է ունենալ շատ երեխաներ. ես շատ եմ ցավում, որ մի երեխա ունեմ. սխալ է: Երկար մնալ 25 տարեկան: Հետևել արտաքինին: Չծերանալ հոգով»:

Գրել կարծիք