10 աշնանային լավագույն պոլիտֆիլմերը

10 աշնանային լավագույն պոլիտֆիլմերը

«Թեժ աշնան» նախաշեմին առաջարկում ենք դիտել 10 քաղաքական դրամա հենց այն քաղաքականության մասին, որ ոչ թե հրապարակներում, այլ կուլիսներում է տեղի ունենում:

Հայաստանում քաղաքական «թեժ աշնան» մասին խոստումներն ավանդական են դարձել. մարդիկ արդեն ոչ այն է հավատում են, ոչ այն է ոչ: Բանն այն է, որ զանգվածային քաղաքական միջոցառումները սովորաբար ածանցյալն են լինում քաղաքական կուլիսային խմորումների ու վերադասավորումների, ու եթե դրանք տարվա ընթացքում տեղի չեն ունեցել, գործող իրականության մեջ էլ էական փոփոխություններ չեն գրանցվել, դժվար թե պետք է «թեժության» ակնկալիք ունենալ:

Mr. Smith Goes to Washington«Պարոն Սմիթը մեկնում է Վաշինգտոն» («Mr. Smith Goes to Washington»), 1939

Եթե այս ֆիլմը լեգենդար «Քամուց քշվածների» տարեկիցը չլիներ, 1940-ի «Օսկար»-ների մեծ մասը գուցե նրան բաժին հասներ: Այդուամենայնիվ, ամենահայտնի մելոդրամաներից մեկն այս քաղաքական դրամային զիջեց «Լավագույն սյուժե» անվանակարգում: Իսկ «Պարոն Սմիթն» այնքան պոպուլյար դարձավ Միացյալ Նահանգներում, որ այն ցանկանում էին նույնիսկ արգելել հակահայրենասիրության համար: Բնական էր՝ հորինված անունների ու իրադարձությունների տակ ներկայացվում էր ամերիկյան քաղաքական համակարգի նկուղների ամբողջ գարշահոտությունը:

 

 

11169181_ori«Արգո» («Argo»), 2012

Բեն Աֆլեքի օսկարակիր ֆիլմը երևի ավելի շատ թրիլեր է, քան դրամա, բայց այն կրքերը, որոնք տիրում են ամբողջ սյուժեի ընթացքում, լի են խոր դրամատիզմով: «Արգոն» զուգահեռ պատմում է 1979-ի իրանական հեղափոխության, այդ քաոսից դուրս պրծած ու կանադական դեսպանատանը թաքնվող վեց ամերիկացի դիվանագետների և, ամենակարևորը, նրանց ազատագրման անհավանական սցենարի նախապատրաստական աշխատանքի մասին: Ֆիլմը նկարահանված է իրական փաստերի հիման վրա, և սա արդեն վկայություն է, թե ինչ սկզբունքով ու տրամաբանությամբ են որոշումներ ընդունվում ամերիկյան քաղաքական կուլիսներում:

 

 

president«Նախագահի արքունիքը» («All the President’s Men»), 1976

Քառակի օսկարակիր այս ֆիլմը հիմնված է «Վաշինգտոն պոստ» թերթի լրագրողներ Բոբ Վուդվորդի և Կառլ Բրնսթինի փաստագրական տվյալների վրա, որոնք առաջացրեցին Ուոթերգեյթյան հայտնի սկանդալը: Ռիչարդ Նիքսոնի ընտրությունների նախօրեին հայտնաբերված մեքենայությունների, դրանց հետևանքների մասին պատմող ֆիլմը լույս աշխարհ եկավ բուն իրադարձություններից ընդամենը երեք տարի անց ու ցնցող հաջողություն ունեցավ ամերիկյան կինոդիտողների շրջանում:

 

 

 

West_Wing_S4_DVD«Արևմտյան թևը» («The West Wing»), 1999-2006

Ի տարբերություն այս շարքում գտնվող այլ ֆիլմերի՝ ամերիկյան թերևս ամենաերկարատև քաղաքական սերիալը (7 եթերաշրջան) պատմում է ոչ թե դավադրությունների ու դավաճանությունների մասին, այլ նախագահական աշխատակազմի առօրյա կենցաղի: Չնայած այստեղ դժվար է գտնել մեր օրերի համար այդքան պահանջված խճճված ու խորհրդավոր իրադարձությունները, բայց սրամիտ երկխոսություններն ու այս աշխարհը փոքր-ինչ ավելի լավը դարձնելու անձնուրաց փորձերի նկարագրությունները երկար ժամանակով կարող են գամել էկրանին:

 

 

Political«Գազանաբարո քաղաքականություն» («Political Animals»), 2012

Վեց սերիաներից բաղկացած այս կինոդրամայում ինտրիգներ` ինչքան ուզեք: Ոչ միայն քաղաքական, այլ նաև ընտանեկան, միջանձնային: Հետաքրքիր երկխոսություններ, անընդհատ փոփոխվող սյուժե, ամեն ինչ, ինչպես իրական կյանքում: Սյուժեն էլ հեռու չէ իրականությունից. նախկին նախագահի կինը փորձում է նախագահ դառնալ ու ամբողջությամբ ընկղմվում է ընտրական գործընթացների մեջ (Սիգունի Ուիվերը` Հիլարի Քլինթոնի դերում՝ փոխված անունով): Խանգարում են ամերիկյան կինոյին բնորոշ, երբեմն ծիծաղաշարժ կլիշեները, բայց դերասանական հրաշալի խաղն այս բացը լիովին կոմպենսացնում է:

 

 

51XWAVpikFL«Կանոնների փոփոխություն» («Game Change»), 2012

Եվս մեկ մինի սերիալ` նախագահական ընտրությունների մասին, որի գլխավոր հերոսուհին սկանդալային Սառա Պեյլինն է` Ալյասկայի նախկին նահանգապետը և Օբամա – Մաքքեյն ընտրապայքարի ժամանակ Մաքքեյնի ներկայացրած փոխնախագահի թեկնածուն: 2013-ին «Ոսկե գլոբուսի» վարկածով լավագույն հեռուստաֆիլմ ճանաչված այս նկարում 2008-ի ամենահայտնի ամերիկուհուն մարմնավորում է Կաննի դափնեկիր Ջուլիանա Մուրը: Ստացվել է դինամիկ, սկանդալային ու բավական զավեշտալի, ինչպես ինքը` Սառա Պեյլինն էր:

 

 

MV5BMTQ0ODM0MTg2NV5BMl5BanBnXkFtZTcwNTY5NDAxOA@@._V1_SX214_AL_«Բոսսը» («Boss») 2011-2012

Սերիալն այն մասին է, թե ինչ է կատարվում Չիկագոյի քաղաքապետարանում, երբ հայտնի է դառնում, որ քաղաքապետը անբուժելի հիվանդ է, ընդ որում այդ հիվանդությունն ուղղակիորեն ազդում է նրա բանականության վրա: Բանն այն է, որ դա գիտեն միայն քաղաքապետն ու նրան բուժող բժիշկը, ու պետք է ամեն ինչ անել, որ բուժումը չխանգարի ծրագրերն իրականացնելուն ու քաղաքապետին գահընկեց անելու շանս չտա նրա օպոնենտներին: Անսպասելի ու շոկահարույց շրջապտույտներով քաղաքական դրամա, որ կարող էր նաև իրականություն լինել:

 

 

 

600full-wag-the-dog-poster«Խորամանկություն» («Wag the Dog»), 1997

Բավական հին ու ոչ այնքան բարի ֆիլմ՝ անհավանական թվացող, բայց տեսականորեն հնարավոր իրադարձությունների մասին: Երկրի նախագահը սխալ է թույլ տվել, հասարակության ու մամուլի ուշադրությունը պետք է շեղել: Ի՞նչ է պետք անել. դե´, իհարկե, հորինել պատերազմ՝ դրա բոլոր հետևանքներով: Այս ֆիլմում խաղացած դերերը լավագույնները չեն Ռոբերտ դե Նիրոյի ու Դասթին Հոֆմանի արտիստական կարիերաներում, բայց նաև նրանց շնորհիվ է, որ «Խորամանկությունը» շարունակում է մնալ միլիոնավոր կինոմանների «սեղանի ֆիլմը»:

 

 

house«Խաղաթղթե տնակը» («House of Cards»), 2013-2014

Սա մի գանձ է հատկապես այն մարդկանց համար, որոնք Քևին Սփեյսիի անկրկնելի դերասանական վարպետության երկրպագուներ են ու այն վայելելու առիթն աշխատում են բաց չթողնել: Երկու եթերաշրջան (երրորդին էլ սպասում ենք)՝ հագեցած սերալ, որի մասերից յուրաքանչյուրն առանձին ֆիլմի արժեք ունի, ու ամեն մեկում կենտրոնական դերում հենց Սփեյսին է: Հանրապետական կուսակցության ամբիցիոզ կոնգրեսմենը ձգտում է նախագահ դառնալ ու այդ ճանապարհին չի խորշում ոչնչից՝ դավաճանություն, կեղծիք, նույնիսկ սպանություն: Այդուհանդերձ, այս ամենը ներկայացված է այնքան նուրբ տրամաբանական շղթայով՝ հաշվի առնելով նաև հոգեբանական շերտերը, որ թվում է՝ իրական պատմության ճշգրիտ էկրանավորումն ես դիտում: Եթե հաշվի չառնենք զուտ ամերիկյան հասարակարգին բնորոշ հանգամանքները կամ այդ քաղաքական համակարգին վերաբերող տերմինները, կարելի է այնպիսի տպավորություն ստանալ, որ այս ֆիլմը ոչ թե ԱՄՆ, այլ ցանկացած երկրի կուլիսային իրականության մասին է:

 

ides«Մարտյան իդեր» («The Ides of March»), 2011

Իդեր Հին Հռոմում անվանում էին ամսվա մեջտեղի օրերը: «Մարտյան իդեր» արտահայտությունը պատմության մեջ թևավոր է դարձել, որովհետև հենց այդ օրերին է սպանվել Հուլիոս Կեսարը: «Մարտյան իդեր» ասելով՝ հասկանում ենք քաղաքական դավեր, նենգություն, դավաճանություն, ինտրիգներ: Սրանից արդեն իսկ հասկանալի է դառնում, թե ինչ է պետք սպասել ԱՄՆ նախագահի 2004 թ. ընտրությունների մասին պատմող ֆիլմից: Քլունին այս ֆիլմում որոշել է պատմել այն դրվագների մասին, որոնք ունակ են գլխիվայր շուռ տալ քաղաքական գործչի բոլոր ծրագրերը: Որոշ կինոքննադատներ զարմանք էին հայտնում, որ այն «թռել է «Օսկարների» կողքով», ոմանք էլ պնդում էին՝ տեղն է դրան. խճճված սյուժե՝ պիեսի հիման վրա նկարահանված, Ռայան Գոսլինգն ու Ջորջ Քլունին էլ իրենց դերերում առանձնապես չեն փայլում: Մի՛ պարեք քննադատների դուդուկի տակ, պարտադիր դիտե՛ք այս ֆիլմը:

Գրել կարծիք