#50 ՄՈՆԻԿԱ ԲԵԼՈՒՉԻ. Մեղսավոր գեղեցկություն

#50 ՄՈՆԻԿԱ ԲԵԼՈՒՉԻ. Մեղսավոր գեղեցկություն

50 տարին բոլորած կուռքի էկրանային դրաման, կենցաղային կոմեդիան և անձնական տրագեդիան:

Monika

Իտալացի կինոաստղ, մոդել Մոնիկա Բելուչին նախորդ տարի տոնեց իր հիսնամյակը: «Մաքսիմ» ամսագրի` 2002-ին կազմած «Պատմության ամենասեքսուալ 100 կանայք» ցանկում նա 9-րդն է եղել: Կանանց շրջանում սարսափելի համարվող տարիներն ակնհայտորեն բարեգութ են Մոնիկայի հանդեպ: Վստահաբար կարելի է ասել, որ այսօր նման անվանացանկ կազմելու պարագայում հոբելյարն առավել բարձր հորիզոնականի կարժանանար: Մոնիկա Բելուչին երկու դուստր է մեծացնում, նկարահանվում է միմիայն իր հավանությանն արժանացած ֆիլմերում և պարբերաբար հանդես է գալիս որպես համաշխարհային բրենդներ ներկայացնող դեմք:

«Եթե գեղեցկությամբ ես օժտված, մնում է՝ համբերատար լինես, մինչև այդ գեղեցկությունը կանցնի հիվանդության պես»:

Ժամանակակից եվրոպական կինոյի ամենաթանկ և պահանջված դերասանուհին գեղեցկության մասին մեկնաբանություն ակնկալող լրագրողի հարցին այսպես է պատասխանել՝ առանց սեթևեթանքի: Նա դեռևս մանկության տարիներից է հասկացել, որ գեղեցկությունը հավասարազոր երկու կողմ ունի. և՛ պարգև է, իսկ նրա դեպքում` շատ շռայլ, և ՛ անեծք:

Մոնիկան ծնվել է 1964-ի սեպտեմբերի 30-ին Իտալիայի Չիտա դե Կաստելո անունով գյուղակում: Ծնողները նրա ծնունդը որպես պարգև են ընդունել, քանի որ բժիշկների պնդմամբ` Պասկուալե Բելուչին և Բրունելա Բրիգանտին անպտուղ էին:

Մոնիկան ցավով է հիշում գյուղում իրեն տրված պիտակավորումը՝ «Գեղեցիկ է, ինչպես դժոխային մեղքը»: Դիվական հմայքի պատճառով նույնիսկ համադասարանցիները նրա հետ ընկերություն չէին անում: «Գեղեցկությունը ոգեշնչում է պոետներին, բայց վրդովեցում հասարակ մարդկանց: Շատերն իբրև անձնական վիրավորանք են ընդունում ուրիշի գեղեցկությունը»:

Նա երազել է իրավաբան դառնալ, սակայն 16 տարեկանից սկսել է մոդելի կարիերայով զբաղվել: Գլամուրային կյանքի հմայքը նրան ստիպել է հրաժարվել մանկության երազանքից և թողնել համալսարանը: «Մոդելի աշխատանքն ամենահեշտ տարբերակն էր իտալական գավառից փախչելու համար: Իրավաբան դառնալու երազանքից հրաժարվելն ու համալսարանը թողնելն ինձ համար պարզապես ապրելու ընտրություն էին»: Ֆոտոմոդել է աշխատել Միլանում, Նյու Յորքում, Փարիզում:

Belucci-2

1992-ին ամսագրերից մեկում Բելուչիի լուսանկարները գրավեցին ամերիկացի նշանավոր կինոռեժիսոր Ֆրենսիս Ֆորդ Կոպոլայի ուշադրությունը, և նա Մոնիկային հրավիրեց նկարահանվել «Դրակուլա» ֆիլմում: Այդ կինոնկարում Բելուչին ընդամենը մի քանի վայրկյան է երևում, բայց սա դարձավ նրա այցեքարտը դեպի մեծ կինո: Մինչև օրս նա նկարահանվել է ավելի քան 50 եվրոպական և հոլիվուդյան ֆիլմերում. առավել հայտնի են «Բնակարան» (ռեժ.՝ Ժիլ Միմունի, 1996), «Մալենա» (ռեժ.՝ Ջուզեպե Տորնատորե, 2000), «Անդառնալիություն» (ռեժ.՝ Գասպար Նոե, 2002), «Մատրիցա» (ռեժ.՝ Վաչովսկի եղբայրներ, 2003, 2004), «Քրիստոսի չարչարանքները» (ռեժ.՝ Մել Գիբսոն, 2004), «Գինդ ի՞նչ է» (ռեժ.՝ Բերտրան Բլիե, 2005) ֆիլմերը:

Մոնիկա Բելուչիի կյանքում բախտորոշ էր Ժիլ Միմունիի «Բնակարան» մելոդրաման: Ասում են՝ Մոնիկան այդ ֆիլմի գլխավոր դերում հանդես է եկել այն ժամանակ արդեն մեծ համբավ վայելող իր ապագա ամուսնու՝ Վենսան Կասելի միջնորդությամբ: «Երբ Մոնիկան սկսեց խաղալ ֆիլմի առաջին կտորը, բոլորը պապանձվեցին,- պատմում է Կասելը:- Ինքս էլ կարծես սուզվեցի տաք ջրի մեջ, որտեղից դուրս գալու ցանկություն չունեի: Մտաբերեցի միջնադարյան կախարդուհիների մասին ավանդազրույցները, որոնք մեկ ժպիտով, մեկ հայացքով ու կոնքերի թեթև շարժումով գերում էին տղամարդկանց և առհավետ կործանում նրանց: Այդ ժամանակ ինքս էլ գիտակցեցի, որ կորած եմ»: Մինչև «Բնակարան» ֆիլմի պրեմիերան «վատ տղայի» համբավ ունեցող Կասելն արդեն Մոնիկայի գեղեցկության ծուղակում էր:

Աստղային ամենահմայիչ զույգերից մեկի համատեղ կյանքը նախանձելի չի եղել:

«Երբեմն ինձ թվում է, թե իմ կնոջը կիսում եմ միլիոնավոր տղամարդկանց հետ»,- մի հարցազրույցում անկեղծացել է Կասելը:

Դերասանը մի քանի անգամ նույնիսկ ոստիկանությունում է հայտնվել խանդի հողի վրա ծեծկռտուք հրահրելու համար: Նա ամեն ինչ անում էր դեր ստանալու համար այն ֆիլմերում, որոնցում Մոնիկան էր հրավիրված նկարահանվելու: Ժամանակակից կինոյի ամենամեծ սկանդալներից մեկը կապված է Գասպար Նոեի «Անդառնալիություն» կինոնկարի հետ, որտեղ նկարահանվել են Մոնիկա Բելուչին և Վենսան Կասելը:

Belucci-1

Այդ ֆիլմում ռեժիսորն առանձնակի դաժանությամբ և նատուրալիստորեն է նկարահանել Մոնիկայի հերոսուհու՝ Ալեքսի բռնաբարության տեսարանը, որը ձգվում է 9 րոպե (կինոյի պատմության մեջ սա ռեկորդային տևողություն է): Ֆիլմի փակ դիտման օրը Կասելը ծեծկռտուք է սարքել Գասպար Նոեի հետ: Մամուլը հեղեղված էր ամուսինների բաժանման կանխատեսումներով: Սակայն «Անդառնալիություն»-ի համաշխարհային շնորհանդեսից հետո Մոնիկան ինքնախոստովանության պես հարցազրույց տվեց. «Ես հոգնել եմ իմ մարմնից: Ինձ անբնական է թվում, որ կրծքավանդակս ու որովայնս շարունակում են այնպիսին մնալ, ինչպես 18 տարեկանում: Տարիքով և փորձառությամբ ես փոխվում եմ, դառնում այլ անհատականության, բայց իմ մարմինը նույնն է մնում… Իմ կուրծքը ստեղծված չէ զուտ երեկոյան հագուստները զարդարելու համար, և ժամանակն է, որ ծառայի իր իրական նպատակին»:

Մի քանի ամիս անց՝ 2004-ի սեպտեմբերի 12-ին, ծնվեց Մոնիկայի և Վենսանի դուստրը՝ Դևա Կասելը: Աստղային ընտանիքում հարաբերական անդորր էր, թեև նրանք առավել հաճախ միևնույն տան տարբեր բնակարաններում էին ապրում, քան միասին: 2010-ին լույս աշխարհ եկավ նրանց երկրորդ դուստրը՝ Լեոնին: Անցյալ տարի Մոնիկա Բելուչին և Վենսան Կասելը պաշտոնապես հայտարարեցին իրենց ապահարզանի մասին:

«Ես երբեք կապված չեմ եղել ամուսնական կապանքներով,– բացատրեց Բելուչին:

– Ինձ երբեք չի գրավել մեծ տան գաղափարը, որտեղ երեկոյան վերադառնում են ընտանիքի բոլոր անդամները, ընթրում՝ հեռուստացույցի առաջ նստած, ապա՝ անկողին մտնում: Առօրեական ընթացքը սպանում է կիրքը: Սիրելու միակ բանաձևն ինձ համար ազատ լինելն է: Ոչ ոք մեզ չի պատկանում՝ ո՛չ մեր երեխաները, ո՛չ ամուսինը: Մենք միայն կարող ենք որոշակի բաներ կիսել նրանց հետ, ում սիրում ենք… Ինձ համար վիրավորական և անընդունելի է, որ գիշերվա սիրուց հետո տղամարդը շրջվում է հակառակ կողքին ու քնում, իսկ կինը մտքերին է տրվում»:

Սուրբ ծննդյան տոնին մամուլը հեղեղվեց լուրերով, որ Մոնիկան և Վենսանը տոներն անցկանցնում են Փարիզում՝ դուստրերի հետ: Քրիստոֆ Հանսի «Գեղեցկուհին և հրեշը» ֆիլմի շնորհանդեսին նվիրված ասուլիսի ժամանակ գլխավոր հերոսին՝ Վենսան Կասելին, լրագրողները հարցրին Բելուչիի և իր հարաբերությունների մասին. «Սերը չի անհետանում: Շարունակում է ապրել, պարզապես այլ ձև է ստանում: Չի կարելի մոռանալ, որ ինչ-որ ժամանակ Դուք և այդ մարդը ընտրել եք իրար, որ Ձեզ հաճելի է եղել մեկմեկու հետ: Սերը բարձր է ապահարզանից: Բազմաթիվ օրինակներ կան, որ մարդիկ բաժանվում են, ապա՝ որոշ ժամանակ անց՝ կրկին միանում»: Սա կանխատեսո՞ւմ է, թե՞ Մոնիկային ուղղված ֆրազ: Նրանց ապահարզանը ծանր հետք չթողեց որևէ մեկի կարիերայի վրա:

Մոնիկա Բելուչին կյանքի մեծ մասն անցկացրել է Ֆրանսիայում, այսուամենայնիվ, իտալական կինոյի ոսկեդարի լավագույն ավանդույթները կրողն ու շարունակողն է: Կինոքննադատները նրա անունը դնում են Աննա Մանիանիի, Մոնիկա Վիտիի, Սիլվանա Մանգանոյի ու Սոֆի Լորենի կողքին:

Belucci-5

Դերասանուհիներ և կանայք, որոնք, ինչպես Բելուչին է ասում, «մի ափսե իտալական սպագետին երբեք չեն զիջի կազմվածքը կորցնելու վախի պատճառով: Կարծում եմ՝ այսօր ես շատ ավելի գեղեցիկ տեսք ունեմ հենց կնճիռներիս շնորհիվ: Իսկ հետո կտեսնենք՝ ինչ դուրս կգա:

«Ես ծերանալուց չեմ վախենում, ավելի շատ անհանգստանում եմ հիվանդություններից: Երազում եմ առողջ ապրել 150 տարի, կապուչինո խմել ընկերուհիներիս հետ և կյանքից հեռանալ խաղաղ երազում»:

Պատրաստեց Րաֆֆի Մովսիսյանը

Գրել կարծիք