Հին Երևանի վերջին վկաները. Ո՞ր շենքը կարող է լինել հաջորդը Արամի 30-ից հետո

Հին Երևանի վերջին վկաները. Ո՞ր շենքը կարող է լինել հաջորդը Արամի 30-ից հետո

newmag-ը լուսանկարել է այն շենքերը, որոնք գուցե շուտով էլ չտեսնեք այսպիսին կամ չլինեն ընդհանրապես:

Արամի փողոցը վաղուց ասոցացվում է ակտիվիստների բողոքի ու հին Երևանի պատմական նշանակության շենքերի ոչնչացման հետ: Հատկապես Արամի 30 հասցեում գտնվող կարմիր տուֆից փոքրիկ շենքը քանդելուց հետո կրքերը թեժացան: Քաղաքապետարանն ու քաղաքաշինության նախարարությունը հայտարարեցին, որ շենքը պատմական ու ճարտարապետական նշանակություն չուներ, ոչ էլ հանրային գերակա շահ էր, այլ ընդհակառակը, խանգարում էր երթևեկությանը: Շենքի փոխարեն ոչինչ չի կառուցվի, միայն մայթը կլայնացվի: Հիմա արդեն քննարկվում է հարևան մյուս շենքերը քանդելու հավանականությունը: newmag-ը ներկայացնում է այն շենքեր, որոնք կարող են լինել հաջորդը:


Ամբողջական ֆոտոշարքը՝

Հին Երևանի քանդվող շենքեր


Արամի 9

yvn-4

Փողոցը բացվել է 1837 թվականին և Նիկոլայ Առաջին ցարի պատվին անվանվել Ցարսկայա փողոց:  1919 թվականին`Առաջին հանրապետության արտաքին գործերի նախարար Արամ Մանուկյանի մահից հետո, փողոցը վերանվանվում է նրա անունով։ Խորհրդային կարգերի հաստատումից հետո փողոցը կրկին անվանափոխվում է: Փողոցը 1921թ.-ին կրում էր Սուրեն Սպանդարյանի անունը:  1991 թվականին, Հայաստանի անկախացումից հետո, այն պաշտոնապես կոչվեց Արամի փողոց։ Արամի  9 շենքը կառուցվել է 1910թ. և պատկանել է Ֆադեյ Քալանթարյանին: Ճարտարապետը Բորիս Մեհրաբյանն է եղել: 1917-1919 թթ. Այս տաննապրել է Արամ Մանուկյանը: 2005 թվականից շենքի վերակառուցումը ներառված է Երևանի քաղաքապետարանի «Հին Երևան»  ծրագրում: 11 տարի անց, սակայն, շենքը կիսավեր վիճակում է: Շենքի իրավական կարգավիճակը` պահպանման ենթակա, իսկ փաստացի վիճակը` կանգուն` տարածքն օտարված: Տարածքի օգտագործողը «Գլենդել Հիլզ» ՓԲԸ-ն է:


Արամի 21

yvn-19

Բնակելի տունը նույնպես շատ հին կառույց է:  Կարմիր աղյուսից առանձնատունը կառուցվել է 1887թվականին: Այժմ տարածքն օտարված է: Տնից մնացել են միայն ֆասադը և ներսի մի քանի կիսավեր պատ:


Դոլմամա

yvn-29

Դեռևս 2013թ. Աբովյան-Պուշկին-Սախարովի հրապարակ եռանկյունին ճանաչվել է բացառիկ գերակա հանրային շահ: Մամուլում լուրեր տարածվեցին, որ վտանգի տակ է նաևՊուշկինի 10 հասցեում գտնվող Դոլմամա ռեստորանը`հարակից մի քանի շենքերի հետ: Այդ շենքերը 19-20-րդ դարի են: Քաղաքապետարանը հերքեց Դոլմամայի շենքը քանդելու մասին լուրը: Ռեստորանի հիմնադիր Ժիրայր Ավանյանը հայտարարեց, որ չի հավատում քաղաքապետարանի հայտարարությանը:


Պուշկինի 4

pudkinnn

Դոլմամա ռեստորանից մոտ  20 մետր ներքև դեպի Սախարովի հրապարակ, գտնվում է հանրահայտ գինեգործներ Թաիրովների շենքը: Շենքի բնակիչ` 78 ամյա տիկին Հերմինեն (ազգանունը չասաց) պատմեց, որ շենքը կառուցվել է 1887թ. և պատկանել է հենց Թաիրովներին: Արդեն տասը տարի ցանկանում են շենքը քանդել, իսկ բնակիչներին տրամադրում են արժեքի 1/3-ը: Տասը տարի շարունակվող դատական գործընթացներից, սակայն, տիկին Հերմինեն ոչ մի հույս չունի:


Տերյան  23 և 25

yvn-21

Այս շենքերի կողքով անցնելիս ուշադրությունը գրավում է «SOS.Քանդում են» պաստառը: Փակցված են նաև հանրահայտ դերասանների նկարները, որոնք ժամանակին ապրել են այդտեղ: Շենքն առավել հայտնի է որպես դերասանների շենք: Շենքերի բնակիչներին վաղուց առաջարկում են լքել բնակարանները, սակայն նրանք համաձայն չեն: 2015 թվականի հունիսի 10-ին մի խումբ ակտիվիստների հետ ստորագրահավաք են կազմակերպել` շենքը չքանդելու համար: Շենքի քանդվել-չքանդվել ու հարցը մինչև հիմա մնում է օդից կախված:


Հանրապետության 2-րդ փակուղի

yvn-35Թե ինչ պատմություն ունի շենքը և երբ է կառուցվել` հայտնի չէ: Բնակիչները միայն փաստում են, որ շատ հին շենքում են ապրւմ և յուրաքանչյուրն իր այդտեղ ապրած տարիների քանակով է հաշվում կառույցի հնությունը: Շենքից մնացել են  միայն ֆասադը և կողքի պատերը:

Գրել կարծիք