Ինչպե՞ս Ռոնալդուն խաղաց Ռեալի երկրպագուների նյարդերի հետ

Ինչպե՞ս Ռոնալդուն խաղաց Ռեալի երկրպագուների նյարդերի հետ

Ինչպե՞ս Ռոնալդուն դարձավ հերոսից հակահերոս, և հակառակը. newmag-ը պատմում է այս շաբաթվա ֆուտբոլային ամենահնչեղ սկանդալի մասին:

Կամակոր մադեյրացին իր եսասիրությամբ ֆուտբոլային աշխարհին հայտնի է վաղուց, սակայն այն, ինչ Ռոնալդուն հայտարարեց մադրիդիան դերբիում կրած պարտությունից հետո, իսկական սառը ցնցուղ էր Արքայական ակումբի ղեկավարության եւ երկրպագուների համար: Այդ խաղից հետո, որտեղ Ռեալը պարտվեց մեկ գնդակի տարբերությամբ, լրագրողների հետ բրիֆինգի ժամանակ Ռոնալդուն հանդես եկավ կտրուկ հայտարարությամբ.

Եթե «Ռեալում» բոլորը ցուցադրեին իմ մակարդակի խաղ, մենք կլինեինք առաջինը:

Այս տողերն ամեն մեկը կարող է հասկանալ յուրովի: Օրինակ՝ Ռոնալդուն դա ասել է զայրույթի պատճառով, Ռոնալդուն ասել է այն, ինչ մտածում է, կամ Ռոնալդուն ցույց է տվել իր իրական դեմքը: Սակայն փաստը մնում է այն, որ Ռոնալդուի հայտարարությունը զայրույթի մեծ ալիք առաջացրեց ֆուտբոլային աշխարհում: Այն հասավ ակումբի ղեկավարությանը: Ամբողջ միջազգային մամուլը գրեց, որ Ռոնալդուի օրերն Արքայական ակումբում հաշված են:

Ռոնալդուն աղբամանն է նետում խաղընկերներին Ծաղրանկարիչ`Օմար Մոմանի, Goal.com
Ռոնալդուն աղբամանն է նետում խաղընկերներին
Ծաղրանկարիչ`Օմար Մոմանի, Goal.com

Եւ, իսկապես, «Ռեալի» ղեկավարությունը հիասթափված էր Ռոնալդուի մեծամիտ հայտարարությունից ու նրա տրանսֆերի համար սահմանել էր շատ ցածր հրաժարագին: Հետո թիմի գլխավոր մարզիչ Զինեդին Զիդանն ասուլիսի ժամանակ հերքեց այդ լուրը: Բայց մինչեւ այդ Ռոնալդուն հասցրել էր հանդարտեցնել կրքերը: Մարզման ժամանակ Ռոնալդուն իր հայտարարության համար ներողություն է խնդրել թիմակիցներից՝ նշելով, որ նկատի է ունեցել խաղընկերների ֆիզիկական պատրաստությունը:

Դա չի արդարացնում Ռոնալդուի հայտարարությունը, քանի որ խոսքը, որը հնչում է լրագրողների ներկայությամբ, շատ արագ դառնում է հանրության սեփականությունը՝  հատկապես, երբ սկանդալային է ու հերոսն էլ Ոսկե գնդակի եռակի հաղթողն է:

Ռոնադուն իր ամպագորգոռ հայտարարությունը «հերքեց» խաղադաշտում: «Լեւանտեի» հետ խաղում «Ռեալի» բոլոր ժամանակների լավագույն ռմբարկուն դարձավ գոլի եւ գոլային փոխանցման հեղինակ, խաղաց թիմային ֆուտբոլ, եւ առանձին դրվագներում նրա վերաբերմունքն ու ջերմ շփումը թիմակիցների հետ ապացուցեց, որ Արքայական ակումբի ճամբարում խնդիրներն արդեն հարթվել են:

Ռոնալդուն շահում է խաղընկերների սիրտը Ծաղրանկարիչ` Օմար Մոմանի, Goal.com
Ռոնալդուն շահում է խաղընկերների սիրտը
Ծաղրանկարիչ` Օմար Մոմանի, Goal.com

Գրել կարծիք