[Կարծիք] ԱՄՆ-ի` Երուսաղեմը Իսրայելի մայրաքաղաք ճանաչումը, կարող է ճակատագրական դառնալ

ԱՄՆ կողմից Երուսաղեմը որպես Իսրայելի մայրաքաղաք ճանաչելու մասին հայտարարությունը Մերձավոր Արևելքում կարող է աննախադեպ նոր իրավիճակի պատճառ դառնալ: Թեև Վաշինգտոնի տարածաշրջանային մուսուլմանական դաշնակիցները վերջին տասնամյակում ոչ միայն մոռացել են իրենց հակասությունները Իսրայելի հետ և նույնիսկ համագործակցության եզրեր են գտել, բայց Երուսաղեմի՝ հրեական մայրաքաղաք ճանաչելը հակասում է նրանց գաղափարախոսությանը, քանի որ Երուսաղեմը մուսուլմանական աշխարում երրորդ սբավայրն է՝ Մեքքայից և Մեդինայից հետո: Եվ պատահական չէ, որ ԱՄՆ նախագահ Դոնալդ Թրամփի հայտարարության առաջին քննադատությունը հնչեց Անկարայից:

Վերջին 2 տարվա մեջ Թուրքիան փորձում է վարել ինքնուրույն քաղաքականություն, հետևողականորեն լարվում են թուրք-ամերիկյան հարաբերությունները: Ներկայումս Անկարան ավելի է սերտացնում կապերը Մոսկվայի և Թեհրանի հետ՝ մանավանդ Սիրիայի հարցում, և նման հայտարարությունն էլ ավելի կգցի Թուրքիային դեպի Ռուսաստան-Իրան առանցքը: Բնական է՝ դժվար թե Անկարան կկարողանա հեշտությամբ մարսել իր հակավաշինգտոնյան դեմարշը: Եվ եթե ԱՄՆ անմիջական ջանքերով Հյուսիսային Իրաքում՝ այդ երկրի մասնատումը կանխելու նպատակով կասեցվեց քրդական պետության հռչակումը, չի բացառվում, որ Միացյալ Նահանգները ձեռնամուխ կլինեն արդեն իսկ Թուրքիայի մասնատմանը և հենց այդ երկրի տարածքում քրդական պետության հիմնմանը, ոչ առանց Իսրայելի անմիջակական մասնակցության:

• Ինչո՞ւ է Իսրայելը մնում մերձավորարևելյան «խաղից» դուրս


• Սիրիական դեժավյու. Էթնո-կրոնական մասնատումը` քաղաքական ճակատագիր


• 10 պատերազմներ, որ կարող են սկսվել Իսլամական պետության կործանումից հետո

Թեժանալու է իրավիճակը նաև Պաղեստինում, որտեղ արաբ բնակչությունը նոր խոչընդոտների կբախվի իսլամական սրբավայրեր ազատ այցելելու տեսանկյունից: Եվ դա կարող է նոր ինթիֆադայի (ապստամբության) պատճառ դառնալ, որին բացահայտ կաջակցի Իրանի Իսլամական Հանրապետությունը: Եվ սա կարող է լինել եզակի դեպքերից, երբ Սաուդյան Արաբիայի, Եգիպտոսի ու Իրանի շահերը ոչ թե կհակադրվեն, այլ կհամընկնեն:

Հեղինակ՝ Բագրատ Մովսիսյան