Արևելյան մոդա. ինչպես է իսլամը փոխում նորաձևությունը
Մուսուլման կանայք ուզում են գնել նորաձև, հայտնի լոգոտիպերով հագուստ, բայց որը նաև կհամապատասխանի իրենց կրոնին: Եւ նորաձև բրենդներն ակտիվորեն սկսել են մտնել այդ խաղի մեջ: Առաջինը DKNY բրենդն էր, որ թողարկեց Ռամադանին նվիրված կապսուլային հավաքածու: Նրան հետևեցին Uniqlo, Mango ու Tommy Hilfiger ընկերությունները: Dolce & Gabbana-ն էլ մուսուլմանական երկրների համար պատրաստեց հատուկ հավաքածու նույն ֆիրմային «սիցիլիական» պրինտերով:
Բուրկինին լողազգեստ է, որը փակում է մարմինն ամբողջությամբ` գլխից, մինչև ոտքերը: Այն շատ աղմուկ բարձրացրեց Ֆրանսիայում: Marks & Spencer-ը սկսեց այդպիսի լողազգեստներ վաճառել: Uniqlo ընկերությունը վերջերս թողարկեց առանձին «համեստ հագուստի» ոչ թե կապսուլային, այլ ամբողջական հավաքածու: Իսկ Nike-ը մշակեց հատուկ հիջաբներ մարզվելու համար: Նույնիսկ ոչ մեծ լոկալ բրենդները, որտեղ չկան հատուկ մարկետինգային բաժիններ, ուշադիր հետևում են հասարակական պահանջին: Նրանք պարբերաբար անդրադառնում են իսլամին:
Ֆեշն վերալուծաբաններն ասում են, որ Արևելքի մոդան ակնհայտորեն ազդեցություն է սկսում ունենալ համաշխարհային պոդիումների վրա. modest wear-ը դառնում է նոր բովանդակային թրենդ:
Աշխարհն այսօր մի մեծ կաթսա է, որտեղ տարբեր մշակույթների ներկայացուցիչները, ներգաղթյալներն ու բնիկներըապրում են կողք կողքի: Օրինակ, Կրիստոֆեր Լեմերը խոստովանեց, որ գարուն-ամառ տղամարդկանց հավաքածուներում վերնաշապիկ-զգեստները տաբատի հետ ու էլի որոշ կերպարներ ստեղծել է, երբ նմանատիպ հագուստ տեսել է մեծահասակ արաբների հագին: Երբեմն այդ ազդեցությունը շատ նկատելի է, երբեմն` ոչ այնքան, բայց այն կա: Դիզայներներից ոմանք խոստովանում են, որ դա պատահում է անգիտակից, պարզապես, ապրում ես, տեսնում ներգաղթյալներին: Եւ այդ դեպքում էթնիկ ազդեցություններն անխուսափելի են: Կոպիտ ասած, երբ քեզ առաջարկում են լեգինսը կրել երկար, առանց օձիքի վերնաշապիկով, դու դառնում ես Քաթարից եկած հյուր:
Թուփակ Շակուրը մոդայում ու երաժշտության մեջ ոճի թելադրող էր: Նա «Սև լուսաններ» իսլամական խմբավորման անդամ էր, ու դա հստակ երևում էր նրա ոճում ու նույնիսկ սափրվելու ձևն էր դա ցույց տալիս: Նույնիսկ կանացի սիլուետում հայտնված կլորավուն ֆորմաները, ինչպես Քարդաշյանի կազմվածքն է, ինչ-որ առումով արևելյան գեղեցկության ազդեցությունն են:
2050-ին աշխարհում մուսուլմանների թիվը կհավասարվի քրիստոնյաների թվին: Այնպես որ, մոդան նույնպես կփոխվի դեպի Արևելք: Ավելի շատ են դեպքերը, երբ փողոցում մուսուլման կանանց վրայից հանում են հիջաբներ: Եթե համարենք, որ մոդան կանանց ազատության համար է, ուրեմն մուսուլման կանայք էլ իրավունք ունեն ազատ լինել` իրենց հավատի ու դրանից բխող նորաձևության սահմաններում: Նրանք էլ են ուզում մարզվել, լողալ, գիտությամբ զբաղվել, ստեղծագործել: Մշակույթները շարունակում են միախառնվել, աշխարհը շարունակվում է փոխվել, մոդան`առավել ևս:
Տարածել
Կարդա նաև
Գիրք-ճանապարհորդություն տարածության և ժամանակի միջով՝ Փարիզից մինչև սենեգալյան հեռավոր մի գյուղ (տեսանյութ)
«Կյանքը Շառլի աչքերով» / Ազնավուրի անտիպ խոհերն ու խոստովանությունները նկարազարդ անթոլոգիայում (տեսանյութ)
Newmag-ը ներկայացնում է The New York Times-ի 21-րդ դարի 20 գրքերից մեկը / Ջոան Դիդիոնի, «Մոգական մտքերի տարին» (թրեյլեր)
Հոգնած, մոլորված չքնած մայրիկների համար գիրք-դեղատոմս Աստղիկ Նադիրյանից (տեսանյութ)