Newmag-ը Ազգային գրադարանում ներկայացրեց նոր գրքերն ու առաջիկա ծրագրերը (լուսանկարներ)

Հրատարակչության նոր գրքերը, առաջիկա ծրագրերը ևամենապահանջված հրատարակությունները գրադարանավարներին ներկայացրեց Newmag-իգրական ծրագրերի պատասխանատու Անի Հակոբյանը։

«Մենք մեծապես կարևորում ենք Ազգային գրադարանի այս նախաձեռնությունը։ Այն հնարավորություն է տալիս անմիջական կապ հաստատել գրադարանավարների հետ և ներկայացնել ժամանակակից հրատարակչական դաշտի նորությունները։ Մեզ համար հատկապես կարևոր է համայնքային գրադարանների հետ սերտ աշխատանքը։ 

Երկու տարի առաջ Newmag-ը նախաձեռնել է մարզային համայնքային գրադարանները նորանուն գրքերով համալրելուն ախագիծ, և մենք հույս ունենք գործընկերների աջակցությամբ նման ծրագիր իրականացնել նաև Երևանի համայնքային գրադարաններում», — ասաց Անի Հակոբյանը։

Հանդիպման ընթացքում գրադարանավարները ծանոթացան Newmag-ի տարբեր մատենաշարերին և հրատարակչական ուղղություններին։ Ամերիկյան ժամանակակից գրականության շարքում մասնակիցների ուշադրությունը գրավեցին հատկապես Ջոան Դիդիոնի «Մոգական մտքերի տարին» և Ջոնաթան Ֆրենզենի «Խաչմերուկները» վեպերը, որոնք արդեն հասցրել են ընթերցողների լայն հետաքրքրություն առաջացնել։

Newmag-ը շարունակում է հայ ընթերցողին ներկայացնել նաև եվրոպական ժամանակակից գրականությունը։ Այդ շարքում առանձնահատուկ հետաքրքրություն են վայելում Էլենա Ֆերանտեի վեպերը։ Հրատարակչությունը հետևողականորեն զարգացնում է նաև ֆրանկոֆոն գրականության հայերեն թարգմանությունները՝ ընթերցողին հասանելի դարձնելով ֆրանսախոս աշխարհի հեղինակներին։ Ազնավուրի կյանքի և ստեղծագործության մասին պատմող հրատարակությունները շարունակում են մնալ Newmag-ի ամենապահանջված գրքերից։

Առանձին անդրադարձ եղավ ոչ գեղարվեստական գրականությանը։ Newmag-ը հայերեն է ներկայացնում ինքնազարգացման, բիզնեսի, հոգեբանության և հասարակական թեմաներին նվիրված գրքեր, նաև հայտնի մարդկանց հուշագրություններ և կենսագրություններ։ Հրատարակչությունը վերջին տարիներին զարգացնում է նաև սպորտային թեմատիկայով գրքերի ուղղությունը՝ պատմելով աշխարհահռչակ մարզիկների կյանքի և հաղթանակների մասին։

Անի Հակոբյանն առանձնահատուկ շեշտադրեց «Երազ» մանկական մատենաշարը։ Այն նախատեսված է փոքրիկ ընթերցողների համար և միավորում է պատկերազարդ, հետաքրքիր ևկրթական պատմություններ, որոնք երեխաներին օգնում են բացահայտել գրքի աշխարհը։

«Newmag-ի առաքելությունը ժամանակակից և պահանջված բովանդակություն ստեղծելն է հայ ընթերցողի համար։ Մենք մեծ ուշադրություն ենք դարձնում նաև թարգմանական գրականության որակի բարձրացմանը՝ փորձելով հայերեն ներկայացնել համաշխարհային գրականության լավագույն հեղինակներին՝ բարձր խմբագրական և թարգմանական չափանիշներով»։

Հանդիպման ընթացքում գրադարանավարները հնարավորություն ունեցան ծանոթանալ նոր գրքերին, քննարկել գրադարանների ֆոնդերի համալրման հնարավորությունները, ընթերցողների հետաքրքրությունների փոփոխությունը և հրատարակիչների հետ գործակցության նոր ձևաչափերը։