Ծամել է երկտողը և վիրավորական մականուններ է հորինել. ի՞նչ կարելի է կարդալ Թրամփի մասին գրված նոր գրքում
ԱՄՆ նախագահ Դոնալդ Թրամփի նախկին օգնական և հաղորդակցության կառավարման հասարակության հետ բաժնի էքս-տնօրեն Օմարոսա Մանիգոլտ Նյումանն այսօր ընթերցողներին է ներկայացրել «Unhinged: An Insider Account of the Trump White House» («Անհավասարակշիռ: Սպիտակ տան մասին ինսայդերի՝ ներսից մարդու պատմությունը Թրամփի օրոք») գիրքը:
Մանիգոլթ Նյումանը պատմում է, որ Թրամփը պատրաստվում էր իր երդմնակալության օրը Աստվածաշնչի փոխարեն երդվել իր գրած գրքի վրա, իսկ մի անգամ էլ գրություն է կերել: Բայց ոչ բոլորն են վստահ, որ կարելի է հավատալ նախագահի նախկին օգնականի բառերին:
Մանիգոլտ Նյումանը Թրամփին ճանաչում է 2004-ից, երբ մասնակցեց «The Apprentice» ռեալիթի-շոուին, որտեղ բիզնեսմենը հաղորդավար էր: Կոպիտ բնավորության և վատ վարքի համար լրատվամիջոցները Թրամփին ներառել են հեռուստատեսության չար մարդկանց ցուցակում: 2016 թվականին նախագահի ընտրությունների ժամանակ Թրամփի շտաբում նա պատասխանատու էր աֆրոամերիկացիների շրջանում քարոզչության համար: 2016 թվականի սեպտեմբերին Frontline-ի հետ հարցազրույցում հայտարարել է, որ քվեարկությունից հետո «յուրաքանչյուր քննադատ, յուրաքանչյուր թշնամի պետք է երկրպագի նախագահ Թրամփին », որը կդառնա «տիեզերքում ամենահզոր մարդը»:
2017-ի հունվարին, Թրամփին ընտրելուց հետո, հայտարարվել է, որ Մանիգոլտ Նյումանը միացել է նրա ադմինիստրացիային: Այնտեղ նա դարձավ ամենաբարձրաստիճան աֆրոամերիկացին: Հեռուստալրագրող Մեգին Քելիի հետ հարցազրույցում ռեալիթի շոուի նախկին աստղն ինքն իրեն անվանել է «թրամփահանրապետական» (Թրամփ+հանրապետական): Նա համարվում էր Թրամփին ամենահավատարիմ մարդկանցից մեկը:
Շուտով ամեն ինչ փոխվեց: 2017 թվականի դեկտեմբերին պարզվեց, որ Մանիգոլտ Նյումանը լքում է Սպիտակ տունը: Ըստ որոշ աղբյուրների, Մ. Նյումանը կոնֆլիկտ է ունեցել Սպիտակ տան աշխատակազմի ղեկավար Ջոն Քելլիի հետ: Ըստ Նյումանի, ոչ ոք մինչև վերջ չհասկացավ, թե հատկապես ինքն ինչ օգուտ է բերել թիմին: Մանիգոլտ Նյումանը սկզբից հաստատում էր, որ իրեն չեն հեռացրել, ընդհակառակը, ինքն է հեռացել: Բայց գրքում նկարագրում է, թե ինչպես է Ջոն Քելին իրեն կանգնեցրել հեռանալու փաստի առաջ: Դոնալդ Թրամփը դեկտեմբերին թվիթերում Նյումանին շնորհակալություն է հայտնել աշխատանքի համար և հաջողություններ է մաղթել:
Thank you Omarosa for your service! I wish you continued success.
— Donald J. Trump (@realDonaldTrump) December 13, 2017
Արդեն այս տարվա փետրվարին Մանիգոլտ Նյումանը հրապարակային քննադատել է Թրամփի ադմինիստրացիային: Հայտարարել է, որ երկրորդ անգամ չէր քվեարկի նրա օգտին:
Ըստ նրա գրքի որոշ հատվածների, որոնք հրապարակել են լրատվամիջոցները, Սպիտակ տան նախկին աշխատակիցը, որը, ինչպես պարզվել է, ամբողջ ժամանակ ձայնագրել է գործնական հանդիպումները, խիստ քննադատաբար է խոսում Դոնալդ Թրամփի մասին, որին մի ժամանակ համարում էր իր ուսուցիչը: Նյումանը կասկածի տակ է դնում Թրամփի հոգեկան առողջությունը, նկարագրում է նրան որպես անհավասարակշիռ և ազդակները չկառավարող մարդ: Ահա մի քանի հատված նրա պատմությունից:
Կարդացեք նաև.
- «Ապուշը» Սպիտակ տանը. Թրամփի վարչակազմի մասին բամբասանքների գիրքը Վաշինգտոնում սկանդալ է առաջացրել: Ի՞նչ է կատարվում
- Կրակ և Ցասում. Ի՞նչ է կատարվում Թրամփի Սպիտակ տանը
- Գնել Նալբանդյան. Թրամփի մենամարտը ամերիկյան մամուլի ու հետախուզական համայնքի դեմ
Բեսթսելլերը՝ Աստվածաշնչի փոխարեն և Fox News-ի հետ խորը գործակցությունը
Մանիգոլտ Նյումանը հաստատում է, որ Դոնալդ Թրամփը ցանկացել է երդմնակալության ժամանակ Աստվածաշնչի փոխարեն երդվել իր՝ «Գործարքի արվեստը» գրքի վրա: «Նա հարցրեց ինձ. «Օմարո՛սա, ի՞նչ ես կարծում, իսկ եթե երդվեմ «Գործարքի արվեստի» վրա»,-իր գրքում գրել է նախագահի նախկին օգնականը: «Ես հարցրի. «Աստվածաշնչի փոխարե՞ն»: «Այո՛, «Գործարքի արվեստը» բեսթսելլեր է: Սա գործարքների մասին բոլոր ժամանակների լավագույն գիրքն է: Սա այն է, թե ինչպես եմ ես պատրաստվում երկրի համար խոշոր գործարքներ կնքել: Պարզապես մտածիր, որքան օրինակ կվաճառեի, հնարավոր է, (արժե՞ մտածել) հիշարժան ինագուրացիոն օրինակի մասին»: Մանիգոլտ Նյումանը հաստատում է, որ նրան հեռու է պահել այդ մտքից և Թրամփն այնպիսի տեսք է ընդունել, ասես կատակում էր: Նյումանն իր գրքում գրել է, որ Թրամփը, որին աջակցում են բազմաթիվ հավատացյալ քրիստոնյաներ, ընդհանրապես գաղափար չունի, թե ինչ է Աստվածաշունչը. «Նրա համար նույն հաջողությամբ պարզապես կարող էր թղթե աղյուս լիներ»:
2017-ի սկզբին Մանիգոլտ Նյումանը Թրամփի անձնական փաստաբանին ուղեկցում էր Օվալաձև սրահ և տեսավ, որ նախագահը ծամում է թղթի կտորները. «Ես տեսա, թե ինչպես թղթի կտորը դրեց բերանը»,-գրել է նա: «Քանի որ Թրամփը հերմոֆոբ է, ես ապշած էի, որ նա ծամում և կուլ էր տալիս թուղթը: Հնարավոր է, որ ինչ-որ շատ, շատ զգայուն բան էր»:
Մանիգոլտ Նյումանը նաև նկարագրում է Fox News հեռուստաալիքի հետ Թրամփի հարաբերությունները, որոնք, ինչպես նա է փաստում, նույնիսկ ավելի խորն են, քան թվում է: Ըստ Նյումանի, 2016 թվականի ընտրությունների ժամանակ շտաբի ընտրված անդամների փոստերին ամեն օր նամակներ էին գալիս Fox News-ի պրոդյուսերներից: Այդ նամակներում համառոտագրված էին օրվա իրադարձությունները և խորհուրդներ էին գրված, թե ինչպես դրանց պատասխանել: «Օրինակ @foxnews.com հասցեից նամակ էր գալիս, որտեղ Հիլարի Քլինթոնի ամբողջ խոսքի սղագրությունն էր գրված՝ իր վերլուծություններով: Կային հստակ առաջարկություններ, թե ինչպես արձագանքել դրանց»:
Բացի այդ, Սպիտակ տան նախկին աշխատակցի խոսքով, Թրամփը սիրում էր շրջապատի մարդկանց համար վիրավորական մականունններ հորինել: Օրինակ, կրթության նախարար Բեթսի Դեվոսին նա անվանել է «Ditzy DeVos» («տխմար Դեվոս»), իսկ գլխավոր դատախազ Ջեֆ Սեշնսին՝ Բենջամին Բաթոն: «Նա նաև, կարծես, Ջարեդ Քուշների մեծ երկրպագու չէր, երբ Քուշները սկսեց հանդիպել իր աղջկա հետ, նրան անվանել է «մի փոքր քաղցր», որը Թրամփն օգտագործում է «համասեռամոլ» բառի փոխարեն»,- գրում է նախագահի էքս-օգնականը:
Մանիգոլտ Նյումանի խոսքով, երբ ինքը լքել է Սպիտակ տունը, նախագահի հարսնացու Լարա Թրամփը նրան նոր գործարքի առաջարկ է արել: Նյումանը պետք է 2020 թվականին նախագահական ընտրությունների ժամանակ աշխատեր իրենց համար և ամսական 15 հազար դոլար վաստակեր: Դրա փոխարեն Նյումանը պետք է համաձայնագիր ստորագրեր, որ երբևէ Թրամփի, նրա ընտանիքի կամ որևէ մեկի մասին չի կարող այնպիսի բան ասել, որ կվնասի նախագահին: «Ես մերժեցի առաջարկը: Թրամփի աշխարհի հետ խզեցի իմ կապերը»,-իր գրքում գրել է Սպիտակ տան նախկին աշխատակիցը: The Washington Post-ը, որն ուսումնասիրել է Մանիգոլտ Նյումանի առաջարկը, ընդգծում է, որ այդպիսի համաձայնագրերով Թրամփն անընդհատ երկարաձգում է իր կարիերան, որպեսզի քննադատներին և մեղադրողներին ստիպի լռել:
Սպիտակ տանը համարում են, որ գիրքը « կեղծիքով է լցված»
Ամերիկյան բազմաթիվ լրատվամիջոցներ կասկած են հայտնել, որ Մանիգոլտ Նյումանի բառերին կարելի է հավատալ. նա իսկապես ունի Սպիտակ տանն անցկացվող ամենօրյա հանդիպումների ձայնագրությւոնները, բայց իր գրքի ավելի հետաքրքիր հատվածները փաստեր չունեն: Նյումանը նաև հայտնում էր, որ Թրամփը մի անգամ չէ, որ օգտարգործել է «N-word» (սևամորթների համար վիրավորական «նիգեր» բառն է), բայց մինչև հիմա չի ապացուցել, չնայած խոստովանել է, որ երկար ժամանակ է ծախսել ձայնագրությունը լսելու և այդ բառը գտնելու համար: The Washington Post-ն ընգծում է, որ նաև փաստ չկա, որ Թրամփը թուղթ է ծամել: Սպիտակ տան որոշ խորհրդատուներ ծիծաղել են այդ հայտարարության վրա և այն կեղծիք են անվանել: Ըստ The Washington Post-ի աղբյուրների, Սպիտակ տան աշխատակիցները ամիսներով զգուշավորություն են ցուցաբերել, որ Մանիգոլտ Նյումանը կարող է ձայնագրել իրենց աշխատանքային խոսակցությունները: Չնայած խորհրդականների զգուշացումներին, Թրամփը շարունակել է զրուցել նրա հետ և նրան հրավիրել Օվալաձև սրահ:
Սպիտակ տան մամուլի խոսնակ Սարա Սանդերսը ասել է, որ Մանիգոլտ Նյումանի գիրքը կեղծիք է. «Ցավալի է, որ Սպիտակ տան դժգոհ նախկին աշխատակիցը փորձում է նման մեղադրանքների միջոցով շահ ստանալ, իսկ ավելի վատ է, որ լրատվամիջոցները հիմա նրան հարթակ են տալիս, չնայած, որ լրատվամիջոցները նրան լուրջ չեն ընդունում: Սպիտակ տանն աշխատելիս Մ. Նյումանը նախագահի մասին միայն դրական բառեր էր օգտագործում»:
Պատասխանելով հարցին, թե իրեն դավաճանե՞լ են, Թրամփը Նյումանին կոչել է ոչնչություն:
Reporter: "Do you feel betrayed by Omarosa?"
President Trump: "Lowlife. She's a lowlife." pic.twitter.com/UeRgHSdYGJ
— MSNBC (@MSNBC) August 11, 2018
Հետևեք newmag-ին Telegram-ում և Instagram-ում։
Տարածել
Կարդա նաև
Գիրք-ճանապարհորդություն տարածության և ժամանակի միջով՝ Փարիզից մինչև սենեգալյան հեռավոր մի գյուղ (տեսանյութ)
«Կյանքը Շառլի աչքերով» / Ազնավուրի անտիպ խոհերն ու խոստովանությունները նկարազարդ անթոլոգիայում (տեսանյութ)
Newmag-ը ներկայացնում է The New York Times-ի 21-րդ դարի 20 գրքերից մեկը / Ջոան Դիդիոնի, «Մոգական մտքերի տարին» (թրեյլեր)
Հոգնած, մոլորված չքնած մայրիկների համար գիրք-դեղատոմս Աստղիկ Նադիրյանից (տեսանյութ)