«Ինչ է պոպուլիզմը» Ֆրասնիայում. Ազգային ճակատն ու Մարինը

«Ինչ է պոպուլիզմը» Ֆրասնիայում. Ազգային ճակատն ու Մարինը

Newmag-ը շարունակում է խոսել իր նոր գրքի մասին և այդ առիթով ներկայացնում համաշխարհային պոպուլիստներին։ Այսօր Ձեր ուշադրությանն ենք ներկայացնում ֆրանսիացի թերևս ամենահայտնի պոպուլիստական ուժին և նրա առաջնորդին։

Ֆրանսիայի «Ազգային Ճակատ» աջակողմյան կուսակցության առաջնորդ Մարին Լե Պենի քաղաքական կարիերայում 2017 թվականի նախագահական ընտրությունները որոշիչ էին: Ազգայնամոլ Լե Պենը պարտվեց կենտրոնամետ Մակրոնին, բայց ստացավ իր կուսակցության պատմության մեջ ռեկորդային թվով քվե: Քարոզարշավի ընթացքում Լե Պենն առատորեն օգտվում էր պոպուլիզմի ամենաազդեցիկ գործիքներից:

Ով կամ ինչն է մեղավոր – Կրկին միգրանտներ, իսլամաֆոբիա և քսենոֆոբիա: Եվրոպական երկրներում պոպուլիստների գլխավոր թիրախը: Լե Պենը հայտարարում էր` զանգվածային միգրացիայի հետևում աղետալի ահաբեկչություններ են թաքնված: Նա նաև ընդգծված եվրոսկեպտիկ է: Քարոզարշավի ընթացքում «Ազգային Ճակատ»-ի առաջնորդը պնդում էր, որ Եվրոպական Միության կազմում Ֆրանսիայի ինքնիշխանությունն է նվազում, իջնում են աշխատավարձերը և խրախուսվում է միգրացիան: Լե Պենի համոզմամբ` մրցունակ լինելու համար ֆրանսիացիները պարտավոր չեն չինացիների նման աշխատել օրը քսան ժամ:

Հակառակ իսթեբլիշմենթին – 2017-ի ընտրություններում Լե Պենը պարտվեց, բայց փոխարենը հաղթանակ տարավ երկու տարի անց` Եվրոպական խորհրդարանի ընտրություններում: Նրա կուսակցությունը մեկ տոկոսով առաջ անցավ և 23 տեղ ապահովեց խորհրդարանում: Սա հնարավոր դարձավ, որովհետև Լե Պենը ընտրությունը վերածեց հակակառավարական բողոքի ալիքի: Նախագահ Մակրոնին ներկայացրեց որպես հասարակությունից կտրված էլիտայի ներկայացուցիչ և սկսեց պայքարել միջազգային բյուրոկրատների ու տեղի էլիտայի դեմ: Այս հաղթանակից հետո, Լե Պենը պաշտոնապես հայտարարեց` չի բացառում իր մասնակցությունը Ֆրանսիայի 2022 թվականի նախագահական ընտրություններին:


newmag-ում կարդացեք նաև․ 


Մեդիայի հետ հարաբերություններ – Լե Պենի քաղաքական կարիերայում լրատվամիջոցները միշտ են որոշիչ դեր ունեցել: Նա հիմնականում հաջող ելույթներ է ունեցել, բայց վատ դրության մեջ է հայտնվել դեբատների ընթացքում: Քաղաքագետները պնդում են, որ նախագահական ընտրության երկրորդ փուլին ընդառաջ Մակրոնի հետ հեռուստատեսային բանավեճը որոշեց ընտրության ելքը: Լե Պենի խարիզմատիկ ելույթների հետևում թաքնված կցկտուր տնտեսական ծրագիրը օգնեց Մակրոնին տապալել Լե Պենի ստեղծած պոպուլիստական կերպարը:

Բարդ խնդիրներին հեշտ լուծումներ – Քարոզարշավի ընթացքում Լե Պենն առաջարկում էր լուծումներ, բայց որևէ կերպ չէր բացատրում դրանց հասնելու ճանապարհը: Նա առաջին փուլում մեծ թվով ձայներ ստացավ գյուղական համայնքներում, որտեղ մարդիկ անտեսված էին զգում բազմազգ ֆրանսիական քաղաքների կողքին: Նրանց չէին հետաքրքրում փախստականները, փոխարենը Լե Պենն առաջարկում էր բարձր թոշակներ և գյուղատնտեսական բարեփոխումներ: Այս ծրագրերը հստակ էին միայն բանավոր խոսքում, իսկ թե ինչպես էին այդ հեղափոխական փոփոխություններն արվելու կամ ինչպես էին ֆինանսավորվելու` դեռ չէր քննարկվում:

Առաջնորդը ժողովուրդն է – «Ազգային Ճակատ»-ը հայտարարում է, որ ներկայացնում է ժողովրդի շահերը և պաշտպանում նրանց իրավունքները: 2017-ի նախագահական ընտրության երկրորդ փուլում Լե Պենը հայտարարեց` եկել է միավորվելու պահը: Ընտրությունը Ֆրանսիայի ապագայի դեմ է կամ կողմ, երրորդ ճանապարհ չկա: Մակրոնին հաղթելու համար աջ ծայրահեղական կուսակցության առաջնորդը նույնիսկ փորձեց ստանալ ձախ ծայրահեղականների աջակցությունը: Փոխեց իր կարգախոսը` «Խաղաղված Ֆրանսիա»-ն դարձնելով «Ժողովրդի Անունից»:


Հետևեք newmag-ին Telegram–ում և  Instagram–ում


Գրել կարծիք