Մեծ պրեմիերա. Newmag-ի «Կապույտ մորուքը» հասավ Երգի պետական թատրոնի բեմ

Ամելի Նոտոմբի «Կապույտ մորուքը»  վեպը հայերեն հրատարակել է Newmag-ը։ Պատմության գլխավոր հերոսները՝ վարձով տուն փնտրող Սատուրնինեն ու իսպանացի առեղծվածային ազնվականն են։ Երիտասարդ կինը վարձակալում է Դոն Էլեմիրիոյի բնակարաններից մեկի սենյակը։ Պարզվում է՝ շքեղ բնակարանը տանտերը վարձով է տալիս է միայն կանանց։ Նախկին ութ վարձակալուհիները բնակարանը վարձակալելուց հետո անհետացել են։ Այդպես սկսվում է հայտնի հեքիաթի ժամանակակից ինտերպրետացիան՝ սուր երկխոսություններով, անհավանական հումորով ու չափազանց վառ կերպարներով։

Ներկայացման գլխավոր դերերում Հրաչ Քեշիշյանն ընտրել է Արսեն Գրիգորյանին ու Նարինե Պետրոսյանին. «Գլխավոր հերոսի մասին մտածելիս՝ միանգամից պատկերացրեցի Արսեն Գրիգորյանին։ Իսկ Նարինեն կլրացնի նրան։ Կարծում եմ, շատ համահունչ ու հետաքրքիր խաղ է ստացվել»։

Ստեղծագործությունը բեմականացնել Հրաչ Քեշիշյանին խորհուրդ է տվել Newmag-ի ղեկավար Արտակ Ալեքսանյանը։ Ամելի Նոտոմբի գիրքը Հայաստանում բեմադրվում է առաջին անգամ։ Ըստ Քեշիշյանի, ներկայացումը կառուցված է սարկաստիկ պրիզմայով. 

«Սյուժեն պահպանել եմ, բայց պատմության սիմվոլները, հետաքրքիր հատվածները ներկայացված են երաժշտության միջոցով։ Ներկայացման մեջ հնչում են շատ հայտնի ֆրանսիական, իսպանական հիթեր»։

Երաժշտական համարները կատարելու են Երգի պետական թատրոնի դերասանուհիները։ Թատրոնի տնօրեն Մանե Գրիգորյանն ասում է, որ սա Երգի պետական թատրոնի ու Հրաչ Քեշիշյանի երրորդ համատեղ աշխատանքն է. 

«Ներկայացման գլխավոր դերակատարներից բացի, խաղում են նաև Երգի թատրոնի դերասանուհիները։ Նրանք մարմնավորում են կանանց, որոնք նախկինում վարձակալել են բնակարանը, ու անհետ կորել են։ Երգերը կլինեն կենդանի կատարմամբ, բեմադրվել են նաև պարեր։ 

Նրկայացումը կառուցված է այնպես, որ համապատասխանի թատրոնի երաժշտական ձևաչափին։ Շատ հետաքրքիր, սյուռ լուծումներով ներկայացում է լինելու։ Հագուստների հեղինակը դիզայներ Ֆաինա Հարությունյանն է»։

Շառլ Պերոյի հեքիաթի ժամանակակից վեպի հայկական պրեմիերան կլինի Երգի պետական թատրոնում մարտի 12-ին ու 13-ին՝ երեկոյան 19:00-ին։