[100 մոնոլոգ] Արմինե Հայրապետյան. «Իմ երգի մեջ դժվար է պեղել «սեր» բառը»
![newmag-y-n](https://newmag.am/public/assets/images/posts/5201/0626121954a49609dd3ce98609999df3.jpg)
բարդերը
Մի լավ ընկեր ունենք` Արեգ Նազարյանը, նա մի շատ լավ երգ է գրել մեր մասին: Ասում է` բարդ մարդիկ են բարդերը: Իրականում սովորական մարդիկ են, պարզապես մարդիկ են, որ ունակ են արտահայտվել խոսքի և երաժշտության միջոցով: Բարդի մեջ ամեն տեսակ զգացում կա: Ցանկացած երևույթի նկարագիր կարող են տալ: Բարդն իր ժամանակի հայելին է:
կիթառս
Ես կիթառի առումով տառացիորեն ինքնուս եմ: Առաջին կիթառս նվեր եմ ստացել, երբ յոթ տարեկան էի: Քեռիս` իմ աշխարհընկալման վրա մեծ ազդեցություն ունեցած մի մարդ, ինձ փոքրիկ կիթառ նվիրեց: Դեռ նվագել չգիտեի, բայց վերցնում էի գործիքը, շոյում էի, ափերս տաքանում էին: Նվագել սկսեցի 15 տարեկանում: Զգացի, որ էլ չեմ կարող առանց կիթառի ապրել: Այն ժամանակ բոլորիս համար թանկ էին Ռուբեն Հախվերդյանի երգերը: Ավեի ուշ սկսեցին հայտնվել նոր անուններ` Արմեն Մովսիսյան, Էդուարդ Զորիկյան, Վահան Արծրունի: Ամենահետաքրքիրն այն է, որ կիթառը ձեռքս վերցնելուն մեկտեղ զգացի, որ ուզում եմ նոր բան ասել: Ես սովորաբար կիթառի կողքով չեմ կարողանում անտարբեր անցնել: Տանը կիթառներիցս մեկը բաց դրված է: Անցնելիս վերցնում եմ, շոյում եմ, սովորության համաձայն` ծլնգացնում…
Կիթառի հնչյունները իրականում մարդու հոգուն ամենից մոտիկ հնչյուններն են: Ֆիզիկոսները ավելի լավ կբացատրեն երևի, բայց ես գիտեմ, որ կիթառի հնչյունները մոտ են մարդու բնական ձայնային համակարգին, էներգետիկ համակարգին: Ամեն դեպքում կիթառը հարազատ գործիք է: Անկախ նրանից` ինչ տրամադրության մեջ եմ՝ ցանկացած լավ հնչող կիթառ ցանկացած պահի ինձ ստիպում է վերանալ:
անխուսափելի պահը
Երգ գրելու պահը, որից չես կարող փախչել, սկսում է ուռչել իմ մեջ, ուռչել-ուռչել, ու զգում եմ, որ, ա՛յ, հիմա կպայթի: Այդ «հիմա կպայթի»-ն կարող է պատահել ցանկացած պահ ու տեղ: Գալիս է ու ասում` գրի՛ր ինձ:
առաջին երգը
92 թվականն էր: Գարնան մասին էր երգը: Մեկ տարի էլ չկար, որ կարողանում էի նվագել: Շատ արագ սկսեցի հասունանալ երգի առումով: 94-ին ներկայացա հեղինակային երգի փառատոնին իմ երգերով: Վախենում էի: Ինձնից առաջ կանգնած էին փորձառու մարդիկ, իսկ ես` անփորձ, դողդոջուն: Վախենում էի` չկրկնեմ մի գաղափար, որ մինչև այդ որևէ մեկն ասել է:
համեմատությունները
Արծաթափայլ աշնան մասին երգս հաճախ համեմատում են Ռուբենի երգերի հետ: Մի օր Ռուբենին ասում եմ. «Ինձ քննադատում են քեզ կրկնօրինակելու համար»: Ասեց. «Իսկ ո՞ւմ երգերին պետք է նման լինի. ինչ լսել ես, դա էլ սովորել ես: Մենք միշտ ազդվում ենք մեր ընկերներից»:
ժամանակը փոխվում է
Ես չէի կարող միշտ մնալ եղանակները նկարագրող, ռոմանտիկ աղջնակ: Աչքս տեսնում էր հակասական երևույթներ: Սկսեցի զանազանել գույները, կյանքի նրբերանգները, ոչ միայն սևն ու սպիտակը, գույնի աստիճանները, անգամ խավարի, սևի մթության աստիճանները: Տեսա անարդարություններն ու անկախ ինձնից՝ պետք է դրանց այլ կերպ նայեի:
տիկնիկը
95 թվականին գրեցի, և հիմա , երբ հետադարձ հայացք եմ նետում, 19 տարեկան աղջնակի համար վատ չէր, բավական լուրջ պահանջ ուներ. չլինել ոսկեհեր տիկնիկ, որը փոշոտվում է ցուցափեղկում և զվարճացնում է մարդկանց, այլ ազատվել բոլոր տեսակի կաղապարներից, կարծրատիպերից: Երգի մեջ ասում եմ` կոտրի՛ր ապակին, փախի՛ր այդտեղից, մոռացի՛ր քո անգույն երազները… 95 թվականին ինձ համար արդեն ամեն ինչ այլ էր: Էլ չէի ուզում տիկնիկ լինել, ուզում էի՝ իմ մեջ գնահատեն անհատականությունը: Սկսեցին հայացքները ուղղել ոչ միայն դեպի դուրս, այլև դեպի ներս: Շատ երգեր այդ շրջանից ի վեր բառացիորեն ունեին ներքինը, ընդերքը փորելու միտում:
[ newmag #40 մարտ, 2013 ]
![100 Մոնոլոգ](https://newmag.am/public/assets/images/books/e5dbd3a619673259f162b95c91a2f772.jpg)
Նյումեգ
4800 ֏
Նկարագրություն
Newmag-ի 100 մոնոլոգները մի քանի սերնդի հետաքրքիր ներկայացուցիչների փսիխոգենեզի ցուցիչներ են, որոնք ուղեկցվում են սև-սպիտակ լուսանկարներով: Այդ ֆոտոները զերծ են գունային խաբկանքից և մեր հերոսներին պատկերում են իրենց բնական հոգեվիճակում: Լուսանկարներն արվել են ըստ գործող անձանց խոստովանության տարեթվերի և այս գրքում չեն փոխարինվել նորերով:
Նպատակը մեկն է. մեր ժամանակների հերոսներին պատկերել՝ պահպանելով իրենց ապրած օրերի դիմագիծը, ոչ հեռավոր անցյալին բնորոշ խոհերն ու հասարակական այն դերը, որը նրանք ստանձնել էին Newmag-ի համարներում հայտնվելու շրջանում: Ահա ինչու յուրաքանչյու մոնոլոգի կողքին արձանագրված են Newmag-ի համարը, ամիսը, ամսաթիվը: Բարի գալուստ անցյալ, բարի գալուստ 100 պարզ անհատականության բարդ ներաշխարհ:
Կարդա նաև
![ԱԲ դարաշրջանն արդեն սկսվել է. Յուվալ Նոյ Հարարին՝ նոր գրքի մասին](https://newmag.am/public/front/assets/images/placeholder.jpg)
ԱԲ դարաշրջանն արդեն սկսվել է. Յուվալ Նոյ Հարարին՝ նոր գրքի մասին
![ՀԱՄԱՇԽԱՐՀԱՅԻՆ ՇՆՈՐՀԱՆԴԵՍ / Յուվալ Նոյ Հարարիի նոր գիրքը հայերեն հրատարակվում է բնօրինակի հետ նույն օրը](https://newmag.am/public/front/assets/images/placeholder.jpg)
ՀԱՄԱՇԽԱՐՀԱՅԻՆ ՇՆՈՐՀԱՆԴԵՍ / Յուվալ Նոյ Հարարիի նոր գիրքը հայերեն հրատարակվում է բնօրինակի հետ նույն օրը
![«Մեզնից մեկը հաջորդն է» գիրքը նոր շունչ է դետեկտիվ ժանրում (տեսանյութ)](https://newmag.am/public/front/assets/images/placeholder.jpg)
«Մեզնից մեկը հաջորդն է» գիրքը նոր շունչ է դետեկտիվ ժանրում (տեսանյութ)
![Որ մասնագիտություններն են նորաձև AI դարաշրջանում (տեսանյութ)](https://newmag.am/public/front/assets/images/placeholder.jpg)
Որ մասնագիտություններն են նորաձև AI դարաշրջանում (տեսանյութ)
![Վեպ՝ զարմանալի, անկանխատեսելի կյանքի, ընտանիքի ու ընկերների մասին (տեսանյութ)](https://newmag.am/public/front/assets/images/placeholder.jpg)