«Ծիլ տուր հայերեն-2025» մրցույթի հանդիսավոր փակումը՝ Newmag Winterfest-ին
01/23/2026
«Ամրոց» ազգային զարգացման հիմնադրամի նախաձեռնությամբ իրականացվող «Ծիլ տուր հայերեն–2025» ամենամյա ստեղծագործական մրցույթի պաշտոնական փակումը և մրցանակաբաշխությունը տեղի կունենա փետրվարի 7-ին՝ Winterfest-ի շրջանակում, Newmag հրատարակչության հետ գործընկերությամբ։
Մրցույթը միավորում է Հայաստանում և սփյուռքում բնակվող 14–ից 17 տարեկան հայ պատանիներին՝ ստեղծելով համահայկական հարթակ, որտեղ լեզուն դառնում է ինքնարտահայտման հիմնական միջոց։ Այս տարվա խորագիրն է «Իմ անունով երկիրը», որը մասնակիցներին հնարավորություն է տվել հայերենով և օտար լեզուներով արտահայտել իրենց պատկերացումները հայրենիքի, ինքնության և պատկանելության մասին։
2025 թվականին մրցույթին ներկայացվել է շուրջ 200 հայտ՝ արևելահայերենով, արևմտահայերենով, հայերենի տարբեր բարբառներով, ինչպես նաև ռուսերեն, անգլերեն և իսպաներեն լեզուներով։ Մասնակիցները ներկայացրել են գործեր երեք ուղղությամբ՝ գրական ստեղծագրություն, տեսողական արվեստ և օտարագիր (խրախուսական) անվանակարգ։
Հիմնական անվանակարգերում ընտրվել են երեքական լավագույն աշխատանքներ, որոնց հեղինակները կստանան դրամական և խրախուսական մրցանակներ։ «Օտարագիր» անվանակարգում հաղթողները կպարգևատրվեն հայագիտական կրթական ծրագրերով, ժյուրիի անդամներից կստանան խրախուսական մրցանակներ։
Այս տարի մրցույթի շրջանակում առաջին անգամ ներկայացվելու է նաև «ԾիլՏա» թերթոնը, որտեղ ամփոփվելու են մրցույթի լավագույն և խրախուսված ստեղծագործությունները։
«Ծիլ տուր հայերեն» մրցույթն իրականացվում է 2022-ից՝ «Ամրոց» հիմնադրամի նախաձեռնությամբ և Վիվա հեռահաղորդակցության առաջատար օպերատորի ֆինանսավորմամբ, ինչպես նաև գործընկեր կազմակերպությունների մասնակցությամբ։ Այս տարի մրցույթն անցկացվում է Newmag հրատարակչության հետ գործընկերությամբ՝ Newmag Winterfest-ի հարթակում։
«Ծիլ»-ը շարունակում է ձևավորել համահայկական պատանեկան ստեղծագործական համայնք՝ խթանելով հայերենով ստեղծագործելը, ինքնարտահայտման ազատությունը և լեզվի կենդանի ներկայությունը պատանիների միջավայրում։
Տարածել
Կարդա նաև
Newmag-ը ներկայացնում է գերմանացի ռեժիսոր, դրամատուրգ Նուրան Դավիթ Քալիսի գրական դեբյուտը՝ «Լուսինը մեր արևն է» վեպը (թրեյլեր)
Ուշագրավ փաստեր «Անունները չփոխե՛լ» գրքի հեղինակ Մարիաննա Հակոբյանի մասին (տեսանյութ)
Newmag-ը Արմենիա Հ/Ը եթերում ներկայացրել է Գանեսա Նագառաջանի «Վաղը՝ մեկ ուրիշ օր» գրքի հեռուստաշնորհանդեսը (տեսանյութ)
Newmag-ը Ազգային գրադարանում ներկայացրեց նոր գրքերն ու առաջիկա ծրագրերը (լուսանկարներ)