Newmag-ի թարգմանած ու հրատարակած Շառլ Ազնավուրի գրքերը՝ ֆրանսիայի Կլամար քաղաքում (լուսանկարներ)

Կլամարը գտնվում է Փարիզից 10 կիլոմետր հարավ-արևմուտք, կանաչապատ ու անառապատ այս քաղաքը համարվում է մշակութային գողտրիկ կենտրոն Եվրոպայի սրտում։ Ի դեպ, Արտաշատն ու Կլամարը քույր քաղաքներ են և այստեղ տարիներ առաջ բացվել է «Արտաշատի» հրապարակ: Ֆրանսիայում ամենից շատ հայերով բնակեցված քաղաքներից է, որի հայկական համայնքը մեծ է ու ակտիվ մշակութային կյանքում: Օրեր առաջ՝  հոկտեմբերի 1-ին, Կլամարի կոնսերվատորիայում բացվեց Շառլ Ազնավուրի անվան համերգասրահ։ Միջոցառման ընթացքում տեղի նվագախումը կատարեց Ազնավուրի հանրահայտ երգերը:

Հիշատակի միջոցառմանը ներկա են եղել ու ելույթներով հանդես են եկել Կլամարի քաղաքապետ, Իլ-դը-Ֆրանս ռեգիոնի առաջին փոխնախագահ Ժան-Դիդիե Բերժեն, Շառլ Ազնավուրի որդին՝ Միշա Ազնավուրը և Ֆրանսիայում ՀՀ դեսպանը։ Շառլ Ազնավուրի մահվան երրորդ տարելիցի օրը նրա անունը կրող համերգասրահի բացման արարողությանը ներկա էին նաև Օ-դը-Սեն դեպարտամենտի նախագահ Ժորժ Սիֆրեդին, սենատոր Ֆիլիպ Պեմզեկը, Անտոնիի և Բուլոն-Բիլանկուրի ենթապրեֆեկտ Ֆիլիպ Մաֆրը, Ֆրանսիայի քաղաքապետերի միության գլխավոր քարտուղար, Սոյի քաղքապետ Ֆիլիպ Լորանը, հայ համայնքի հարյուրավոր ներկայացուցիչներ։

«100 տոկոսով ֆրանսիացի և 100 տոկոսով հայ» մեծ Արտիստի անգնահատելի դերակատարությանը մեծ է եղել հայ-ֆրանսիական բարեկամության և Հայաստանի ու Ֆրանսիայի միջև սերտ հարաբերությունների ամրապնդման գործում։ Իր ելույթում ՀՀ դեսպան Հասմիկ Տոլմաջյանն անդրադարձել է Ազնավուրի՝ Հայոց Ցեղասպանության ճանաչմանը բերած կարևոր ավանդին, և, հակառակ պատմականորեն մեր ժողովրդի դեմ հառնած դժվարին մարտահրվերներին, Հայաստանի վերածննդի և նրա լավագույն ապագայի հանդեպ նրա անսասան հավատին:

Հոկտեմբերի 2-ին Կլամարում տեղի ունեցավ արդեն ավանդույթ դարձած «Հայաստանի և Արցախի օր» միջոցառումը: Տոնավաճառի ընթացքում Ֆրանսիայում գործող հայկական կազմակերպությունները ներկայացրին իրենց առաքելությունն ու տարբեր հուշանվերներ: Այս տարի «Ազնավուր»  հիմնադրամն առաջին անգամ մասնակցեց տոնավաճառին՝ իր տաղավարում ներկայացնելով մեծ արտիստի թողած մշակութային ժառանգությունը:

Այցելուները հնարավորություն ունեցան աջակցելու հիմնադրամի ծրագրերին, և իրենց հետ  տանելու Ազնավուրի հուշանվերներ՝ նրա  որդի Միշա Ազնավուրի ստորագրությամբ:1000-ից ավելի երգերի հեղինակ Ազնավուրը նաև մեկ տասնյակից ավելի գրքերի հեղինակ է, որտեղ զետեղված են նրա կյանքի փիլիսոփայությունն ու պատմությունները։

2018 թվականից սկսած Newmag-ը տարին 2 անգամ՝ Ազնավուրի ծննդյան ու մահվան օրերին, ներկայացնում է նրա գրքերը հայերեն։ Տոնավաճառի ընթացքում նվիրատվություն կատարած այցելուները ստացան նաև Newmag-ի հրատարակած գրքերից, որոնք ցուցադրված էին «Ազնավուր» հիմնադրամի տաղավարում:

Ազնավուրի մահվան տարելիցի օրը արդեն 3-րդ տարին անընդմեջ միջոցառում է կազմակերպում նաև Newmag հրատարակչությունը։ Հոկտեմբերի 8-ին տեղի կունենա 6-րդ գրքի՝ «La Bohème. Անցած օրերի» շնորհանդեսը, ինչպես նաև նրա ամենահայտնի ու սիրելի երգերից մեկի պրեմիերան՝ հայերեն ու նոր գործիքավորմամբ։