Newmag հրատարակչությունն Արմենիա Հ/Ը «Բարի լույս» ծրագրում ներկայացրել է պատանիների, դեռահասների ու ամենափոքրիկների համար չորս նոր գիրք (տեսանյութ)

Գիրքն առաջին անգամ հայերեն հրատարակվել է անցյալ դարի վաթսունականներին։ Newmag-ը վեպը վերահրատարակել է՝ նոր խմբագրությամբ, նոր, մի քանի գլուխների թարգմանությամբ, նոր շապիկով։ Հրատարակչության մուլտիմեդիա բովանդակության պատասխանատու Մանու Իրիցյանը պատմեց, որ վեպը հայերեն հրատարակվել է մի քանի անգամ, բայց թարգմանությունը եղել է ոչ թե իտալերենից, այլ ռուսերենից։ 

Բացի այդ, այս գրախանութներում գիրքն այլևս չկա, գրադարաններում էլ հիմնականում հին ու մաշված օրինակներ են. «Խմբագրական աշխատանքն անելիս հասկացանք, որ տասից ավելի գլուխներ բնագրից երբևէ հայերեն չեն թարգմանվել ու հրատարակվել։ Այդ գլուխները իտալերենից թարգմանեց Սիրուշ Օհանյանը։ 

Գիրքը հրատարակվել էր խորհրդային գրաքննությամբ. թագավորների, Իտալիայի անկախության համար մղվով պայքարի մասին դրվագներն ու գլուխները պարզապես չէին թարգմանվել։ Newmag-ն առաջին անգամ Էդմոնդո դե Ամիչիսի «Սիրտը» հրատարակել է ամբողջական թարգմանությամբ, նոր խմբագրությամբ ու նոր շապիկով»։

«Սիրտը» վեպն ամառային ընթերցանության պարտադիր ցանկում է։ Ուսում դպրոցի հայոց լեզվի և գրականության ուսուցչուհի Մարիամ Սահակյանն իր աշակերտների հետ անցկացրել է նաև բաց դաս, որի ժամանակ աշակերտները վերլուծել են պատմությունը, հերոսներին ու գրքում արծարծված ամենակարևոր թեմաները։ Մարիամ Սահակյանն ասում է, որ գիրքը երեխաները մեծ սիրով են կարդացել.

«Այս վեպի միջոցով աշակերտները կարդում են իրենց պես դպրոցականի օրագիրը, տեսնում, որ նրանք նույնպես սխալվում են, կատաարյալ չեն, նեղանում են, նեղացնում են, ներում են։ Այս պատմությունները պատանիները բերում են հուզական դաշտ, իրենք էլ սովորում են։ Դեռահասության փուլում նրանց համար շատ հետքրքիր են ընկերության, սիրո, բարեկամության մասին պատմությունները։ Գրքի հերոսների օրինակով նրանք ինքնաճանաչողության կարևոր դասեր են ստանում»։

Newmag հրատարակչությունը Երազ մատենաշարով ներկայացրեց նաև համաշխարհային բեսթսելլեր դարձած Ջեֆ Քինիի «Վտվտիկի օրագրի» երրորդ մասը, Վիոլետ Վաիսի «Բրիոշն ու Տարտինը» և Աննա Ստարոբինեցի «Գազան դետեկտիվը»։ Հրատարակչության ծրագրերի ղեկավար Անի Հակոբյանը պատմեց երեք գրքերի մասին. 

«Վտվտիկի երրորդ մասը՝ «Համբերության վերջին կաթիլը», և բոլոր մյուս հատորները կարդում են ամբողջ աշխարհում։ Գիրքը պարզ, հասկանալի ու հումորային լեզվով է, նկարազարդումներ կան, որոնք երեխաներին օգնում են հեշտ ընթերցել, սիրել գիրքը։ Այս զվարճալի կոմիքսը կարծես բանալի գիրք լինի, որը կօգնի ընթեցանությունը դարձնել սիրելի զբաղմունք։ Գրքի չորրորդ մասը հայերեն լույս կտեսնի աշնանը»։

Եվս մեկ բազմահատոր գիրք, արդեն դետեկտիվ բեսթսելլեր՝ Աննա Ստարոբինեցի «Գազան դետեկտիվը», նույնպես հրատարակվել է հայերեն. «Պատմության հերոսները անտառի բնակիչներն են։ Նրանք պետք է բացահայտեն անտառում տեղի ունեցած սպանությունը»։

Ամենափոքրերի համար հրատարակչությունը նույնպես հրատարակել է գիրք՝ «Բրիոշն ու Տարտինը»։ Նկարազարդ պատմությունը նախադպրոցական տարիքի երեխաների համար է։ Զվարճալի ու գունեղ կոմիքսը ֆրանսիական հումուրով ու նուրբ լեզվով է գրված։ Հրատարակվել է գրքի առաջին մասը, այն եռագրություն է։