Գրքի սրտում՝ էջերի արանքում

Այն կգտնեք էջերի մեջ: Այն միանգամից կհուշի ճիշտ տեղը: Այն կարող է լինել նաև լավագույն հուշանվեր: Գրքի անբաժան մասնիկը՝ էջանշանը, մոռացկոտության դեմ պայքարելու ամենալավ միջոցն է: Գրքերի դեպքում կարող եք վստահ լինել. Ձեր փոխարեն էջանշանն է հիշելու: Առանց գիրքը փչացնելու և առանց ժամանակ կորցնելու՝  էջանշանն ուղղորդում է դեպի ճիշտ էջ: Որքան էլ կլանված լինեք գրքով, մի պահ դադար եք վերցնելու, չէ՞: Հենց այդ ժամանակ չմոռանաք էջանշանի մասին:
Պատմություն
Էջանշանների մասին ամենահին հիշատակումը թվագրվում է 1584 թվականով: Այդ ժամանակ թագավորական գրագիր Քրիստոֆեր Բարքերը Էլիզաբետ I-ին մետաքսե էջանշան նվիրեց: Հետո էջանշանները տարածում գտան: 18-19-րդ դարերում նեղ մետաքսե ժապավեններն ամենասիրելի էջանշաններն էին: Դրանք ամրացնում էին գրքի կազմին և էջից մի փոքր երկար թողնում: Բայց սա կարող էր անհարմարություն ստեղծել՝ փչացնելով գիրքը: Այդ իսկ պատճառով մարդիկ ստեղծեցին շարժական էջանշանները: 1850-ականներին առաջինը անգամ հայտնվեցին մետաքսե կամ ասեղնագործ էջադիրները: