Newmag-ը 2021 թվականին կհրատարակի Էլվինա Մակարյանի կենսագրական գիրքը

Օգոստոսի 16-ին հայ երգչուհի և երգահան Էլվինա Մակարյանը կդառնար 70 տարեկան։ Այս առիթով Newmag-ը հատուկ նրա երկրպագուների համար պատրաստել է անակնկալ։

Հայտնի է, որ երգչուհին կյանքից հեռացել է 2007 թվականին։ Մահից մի քանի օր առաջ նա ծավալուն հարցազրույց է տվել լրագրող Արտակ Ալեքսանյանին, որը նա հրապարակել է 168 ժամ կայքում։ Տպագիր տարբերակում տեղ է գտել գրեթե 4 ժամանոց հարցազրույցի մի մասը միայն։ 

ԵՎ ահա, 13 տարի անց Newmag–ը որոշել է այդ ձայնագրությունների հիման վրա ստեղծել անվանի երգչուհու մասին կենսագրական գիրքը։ Գրքի հեղինակը Newmag-ի ղեկավար Արտակ Ալեքսանյանն է։

«Արտակը մի քանի տարի մտածում էր այդ գիրքը գրելու մասին և զբաղվածության պատճառով չէր կարողանում սկսել։ Հիմա, երբ արդեն ունենք նաև գրահրատարակչության փորձ, կարծում եմ, ճիշտ ժամանակն է»,- ասում է Newmag-ի գլխավոր խմբագիր Գնել Նալբանդյանը։

2020-ի աշնանը նախատեսված են հարցազրույցներ հայաստանյան ընկերների և գործընկերներ հետ։ 2021-ի գարնանը՝ հարցազրույցներ Ռուսաստանում և ԱՄՆ-ում։ Նախատեսվում է, որ գիրքը լույս կտեսնի 2021-ի աշնանը։